Read Lelemi Hiob 33 Bible Online

Hiob 33 - Lelemi bible

Hiob 33

¹“Na ɔƒaani ni, Hiob, se atu kaduɛ na enu lɛla lɛni na ndubo-ɔ bɔsu.

²Nu, ndubo mina kenye bubimi na enu etemila, ɔsika asia-mi unyemi lɛlɔ.

³Mina etemila adi ulu na ɔkɔ biala uuubo-nya kemmo. Na ala ani ndubo mina kenye bubimi bɔsu mɛni adi ala ani na ngyi na adi sɔsɔ lɛnɔ.

⁴Katɔti Kɔyu návɔ-mi na kúte-mi ngba ku ɔƒɛƒɛɛ ɔni na ɔkya-mi lɛlɔ kemmo.

⁵Anwuɔsu die lɛla lɛni na ndubuye-ɔ mɛni kenye si adubɔkana. Klibi ƒula etemila pii ammɔ se na eteedie ala ani na ndubo-ɔ buye mɛni kenye.

⁶Lɛti na béti bávɔ bula ƒui, na Katɔti ulánu ukyuli ɔdi anumi taabla lɛla lɛdi.

⁷Anwuɔsu tayia-mi iye lɛla lɛni na ndubo bɔbla.

⁸“Línu unyeƒi ɔni ƒui na enye aakya.

⁹Aasu anii awɔ ni, lɛla lɛdi lɛɛɛda-a na átaƒiɔ lɛnɔ, na átabla likpidi lɛdi.

¹⁰Na aasu taatina ka Unwoti Katɔti úti-ɔ únwini nwuna ukisine.

¹¹Na úbo kɔgba ɔ́bala-a lɛgba, na unye ɔɔtú-ɔ na ƒula kasiakɔ ƒui.

¹²“Nsu mɔɔsu-ɔ geen nnii ƒula litemi liiibo ubo, ɔsika Katɔti utulo ukyuli biala.

¹³Na bi ɔsu na aakyaku-nwu unyeƒi anii ulákpete-ɔ, na ulédie lɛla lɛni na eeye-nwu kenye ulete-ɔ?

¹⁴Katɔti uudie lɛla biala kenye teete ukyuli na lilu pii lɛlɔ. Ɔɔkana na ɔɔsia ulu ɔmɛni lɛlɔ ɔmwi, na ɔsia ulu ɔbambadi lɛlɔ uwi bamba kemmo. Na ukyuli ɔyawine mmomu naaanu taati na unu kalɔ.

¹⁵Usien uwi ɔni na ukyuli ɔtɛ ɔlɛɛ momoomo na úusie ɔgyu ni, ɔɔyá na uugyé ana na uudie ayiala bonwu taatina-nwu.

¹⁶Uwi ɔmmɔ kemmo na ɔɔlɛmi bekyuli atu na ɔɔlɛ-ma kpakplaa lɛnɔ kalɛ na bati lɛlɔ bɔda.

¹⁷“Ɔɔwia ka bekyuli benwini na bada bana udu ukpidi ku lɛlɔ katɔ bɔkɔliku baya.

¹⁸Na ɔɔwia ka bakɛ ngba bɔƒɔ kalɛ na balayii udu ƒui asa na betéduo kekpine.

¹⁹Na uwi bamba lɛnɔ ni, Katɔti ɔɔyá na ɔlɛ kpakplaa ubo ukyuli, na lɛlɔ ekpo ku kɔsakɔ ƒui kɔɔdu-nwu momoomo. Na ɔɔsia ulu ɔmɛni lɛnɔ lɛlɔ na ɔbla ukyuli sɛɛn kede kede ƒui.

²⁰Na ɔlɛ ɔmɛni udu ɔɔdu ukyuli teetédu ka uni adila muedi. Na lɛla lɛni mɔɔda-nwu kubiti geen ni, ɔsɔ ulayɔ-ni.

²¹Na ɔlɔgyii ɔni nátaadia bɔnu dii mmɔ ɔsa ɔyii udu, na anu ka ekubi ekubi kani nébu.

²²Na kukpi kɔɔní teede-nwu, na kaƒiɔtɔ kenye kagyumana ka keƒie-nwu kebweli.

²³“Nsu Katɔti batu pii bammɔ akɔ unwi ɔdubo na ubedie ɔtina-nwu lɛla lɛni ndi lɛbuni lɛni na ɔlɛka ɔbla.

²⁴Na ɔtu ɔmmɔ ɔɔnu ukyuli ɔmmɔ ku lɛƒɔndia na ɔbɔku kukpi ku kaƒiɔtɔ kammɔ ƒui ɔnii betebo-nwu lɛkpu, ɔsika báaƒɔ kayu biala na nwuna lili.

²⁵Ɔmmɔ kama nwuna ɔlɔna ɔɔsɔ teenwini taabla ɔwɔdi aani ubiwɔ ɔdi, na ɔsɔ ɔkɛ nwuna lɛkloƒu bɔdia bɔmmɔ.

²⁶Mmɔ na ɔɔkpali Katɔti, na ɔɔnu-nwu kɔnyana. Na ka ɔɔnu Katɔti anumi ɔsu ni, uubó lɛlɔyɔ kudu. Na Katɔti ɔɔsɔku ukyuli ɔmmɔ teenyene nwuna kenyekɔ kani nse siin.

²⁷Na si úbo ute lɛni ni, ɔɔsu na kadi ƒui anumi ɔnini, ‘Lɛ́bla likpidi na mina ɔdi útatɛ. Nsu Katɔti útani-mi kɔtu kɔni na nka ɔ́manku ka ɔni-mi.

²⁸Údie-mi ɔ́siku kukpi enu kemmo na ńteduo kekpine. Mmomu ɔ́ya na nsɔ nlie ngba.’

²⁹“Katɔti ɔɔbla ɔmɛni teete ukyuli kunyɔ ku kɔtɛ taasia kama.

³⁰Ɔɔwia ka udie-nwu kɔyu na kukpi kemmo ƒui uduoku bukeye bɔni ndubɔya na ulie ngba ku lɛlɔyɔ kemmo.

³¹“Anwuɔsu ni, Hiob, se atu kpoo, na enu lɛla lɛni na mɔɔsu-ɔ, na teƒu-mi kɔtɛ,

³²ina ka ndubɔyɔ ka linu ala ani ƒui na ebo na asu atina ka átaƒiɔ.

³³Na si eeebo lɛla lɛdi na asu ni, amu bile kenye kpoo na enu lɛnunda etemila ani na ndubo-ɔ bɔsu.”