Read Lelemi Hiob 36 Bible Online

Hiob 36 - Lelemi bible

Hiob 36

¹Elihu ɔnini,

²“Kɛku-mi kayi blii bu, ɔsika mbo lɛla lɛdi na lɛsu lidie Katɔti kenye.

³Katɔti ɔɔbla ala kaduɛ uwi biala. Na Katɔti ɔmmɔ kudɔ kani na lɛ́ti ɔmɛni lɛ́siku.

⁴Na akana na aƒɔ adi geen ka lɛla lɛni na mɔɔsu mɛni lɛdi sɔsɔ.

⁵“Na ina ka Katɔti ɔdi Ɔyikune Ƒui ni, uleni ukyuli ɔdi, mmomu ɔɔnu lɛla biala kemmo kaduɛ.

⁶Ulaya na balalane beelie teetu uwi, na ɔɔtɛ bawabane etemila teete-ma ulu lɛlɔ siin.

⁷Na bekyuli babuni ama ni, Katɔti ɔɔnu-ma lɛlɔ kaduɛ, na uuti-ma teenyene kesii kani na káƒɔ kuye, na baakɛ́ ɔyikun taadi bekyuli lɛlɔ uwi ƒui.

⁸Nsu si lɛbibo ku lɛlɔ ɔlɛ bunu búnyimi bekyuli aani batɔntɛne na bana ɔbladu ɔsu ni,

⁹Katɔti uudie bana ekpidi ku ablala ani mɔɔta teenye-nwu lɛlɔ taatina-ma.

¹⁰Na ɔɔyá na beenú-nwu bɔlɛ, na bana ekpidi eduo-ma, na benwini kama bakya-nya.

¹¹Na si bádi Katɔti litemi lɛlɔ na baabla-nwu kabla na bana uwi ɔkladi kemmo ni, keyi kaayɔ́ku-ma, na ala aatɛ-ma na beelie ƒaa.

¹²Nsu si béni na bétenu-nwu litemi ni, badubo bukpi na kuwii kenye, na bayii udu ɔni na baaagyi beeese.

¹³“Bekyuli bani na baaagyi Katɔti ni, beeti kɔnyi kukpidi taavili. Na baaagyi kalɛ na bevele Katɔti na ubunku-ma si uwi ɔni na ɔɔní-ma kɔtu.

¹⁴Anwuɔsu na balábi lɛlɔ asa na beekpi ku kɔƒa.

¹⁵Ulu ɔni lɛlɔ na Katɔti uuti taalɔ ukyuli ka ɔsiaku-nwu kama ndi uwi ɔni na ala ényimi-nwu na ɔgbankpi ku ala bamba eekpóku-nwu!

¹⁶“Na uwi ɔmɛni lɛlɔ geen na Katɔti ɔɔwia ka ɔda-a udie lɛbibo lɛmɛni kemmo na use-ɔ adila kadikɔ ku ala abuni geen ani mɔɔyɔ́-ɔ kaƒɔ.

¹⁷Nsu ɔƒaani ni, unye ɔɔní-ɔ kɔtu kɔni námanku-ɔ na ƒula ekpidi ani na ábla ɔsu.

¹⁸Sia lɛlɔ anu, na taya na lɛkɛ iye ala bɔbɛ teete ukyuli bɔtɔlɔ-ɔ na ayila ulu geen ɔmmɔ.

¹⁹Ƒula kenyekɔ ku lɛkɛ iye lɛnyi lɛni na ebo lilakana-a bɔƒɔ na alɛ lɛbibo lɛmɛni kemmo.

²⁰Na tasia anu ka adubɔkɛ bɔnwuna bɔdi na limeyi lɛni na lɛdisa lɛdubɔƒɔ kayawi ƒui, na bayila bekyuli ƒui udu mmɔ lɛnɔ.

²¹Sia lɛlɔ anu na enye kagyumana, na eleti ƒula lɛlɔ alatákya likpidi bɔbla kemmo anii aasia mmɔ na ekeli alɛ lɛbibo lɛmɛni kemmo.

²²“Katɔti ɔyikun uuubo kawɔkɔ, ɔsika ɔgyi ulu ɔni lɛlɔ na ɔdubɔsia ɔtina-a lɛla. Na ukyuli ɔdi uuuse nwuna kalɛ.

²³Ukyuli ɔyawine ɔmani na ɔnii anwu mɔɔtina Katɔti lɛla lɛni na ɔlɛka ɔbla? Munuu ɔmani ndubɔkana na ɔsu Katɔti ɔnii ɔ́bla lɛla lɛdi na lɛɛɛdi ulu lɛlɔ?

²⁴Awɔ lɛnɔ se likpo na ebunku bekyuli bamba bani nánu ala ani na Katɔti ɔ́bla ɔsu na beedie lɛnu teemwi-nwu, na awɔ lɛnɔ emwi-nwu.

²⁵Bekyuli ƒui bánu ɔmɛni báti básiku ɔgyu kakaaka kesii kani na benye baanu teemene.

²⁶Katɔti úbomo utulo bula bekyuli bayawine kasusu ala kalɔ bunu! Lɛni kani na bula ɔdi ulakana-nwu akwa bɔka.

²⁷“Katɔti mɔɔyá na kayaa liƒlukutu lɛɛƒɔ́ ntu, na uunwíni ɔnantu.

²⁸Na ɔɔyá na ɔnantu ɔmmɔ ɔɔna teete abu bekyuli na amii lɛnɔ aayu.

²⁹Ukyuli biala ulakana kalɔ bunu kalɛ na Katɔti uutiku liƒlukutu taavinku kayaa. Lɛni kani na ukyuli ɔdi ulakana na wati kalɛ na kayaa kaabwɛ ogya na katɔ keedu taasi kesii kani na Katɔti uli.

³⁰Katɔti ɔɔyá na katɔ kaabwɛ ogya na kayaa ƒui kekeye, nsu ɔɔbala ɛpu na nwuna kalɔ kemmo ƒui kabla suu.

³¹Ulu ɔmɛni kani udu lɛlɔ na Katɔti ɔɔsia, na ɔɔnu kayawi bekyuli ƒui lɛlɔ na baakɛ́ taadi teemo.

³²Na kayaa kani mɔɔbwɛ ogya kese aani atula ani nkya Katɔti kɔnu, na uubó taalɛ lɛva lɛni lɛlɔ na ɔ́lɛ lɛnumi.

³³Katɔ budu bɔɔtina ɔnantu ku ɔƒɛƒɛɛ kpakplaa ɔni nsia ulu ɔdubo, na bekyuli ku bebuo ƒui baanu ɔmɛni taati.”