Read Lelemi Hiob 37 Bible Online

Hiob 37 - Lelemi bible

Hiob 37

¹“Liƒu líƒie-mi na lɛlɔ ƒui lɛɛtɔ́-mi,

²uwi ɔni na línu Katɔti lɛdi kalɛ na ɔɔkwanyi na katɔ budu bɔmmɔ kemmo.

³Nwuna bukeye bɔ́bwɛ ogya bɔ́vi kayaa kammɔ ƒui.

⁴Ɔmmɔ ƒui kama ni, línu-nwu lɛdi kalɛ na ɔɔkwanyi, na nwuna lɛdi lɛni mbo ogya lɛɛbla kudu momoomo. Na lɛni kani na kayaa kaabwɛ ogya.

⁵Na akɔla budie taatina lidu lidu lɛɛlɛ́ na kayaa, ɔni na bula ɔdi ulakana-nya kalɔ bunu.

⁶“Ɔɔyá na etubankɛ bonwu bonwu ku ɔƒɛƒɛɛ ku ɔnantu kpakplaa ɔɔna teewi kalɔ.

⁷Ɔmmɔ ɔsu ukyuli biala ɔsɔ ulakana nwuna kabla kadi bɔbla. Mmomu uunye teeti kasusu taasiku ɔyikun bonwu ɔni na Katɔti ubo lɛlɔ.

⁸Bebuo ƒui lɛnɔ baabɛ́ taakya bana libu kemmo ku kɔkyakɔ.

⁹Na ɔƒɛƒɛɛ ɔni ndanku kɔyɔ kpakplaa uubo teebekpo, na ɔɔkya ligede uwi biala.

¹⁰Na Katɔti ɔƒɛƒɛɛ ɔni na ɔɔnwuna teewi ntukpa bonwu lɛlɔ ni, ɔɔyá na ntu bɔmmɔ buunwíni etubankɛ.

¹¹Ɔɔyá na liƒlukutu lɛɛdanku ntu na lɛɛbwɛ ogya na kayaa kammɔ ƒui.

¹²Katɔti ɔɔyá na liƒlukutu lɛmmɔ lɛɛkɛ taavi kayawi kemodi kammɔ lɛlɔ ƒui taabla lɛla lɛni na úbo-nwu ɔda ɔnii ɔbla.

¹³Na ɔɔyá na ɔnantu ɔɔna na uuti taaní bekyuli kɔtu na bana ablala ɔsu, iye ɔya na ɔna uwi kalɔ kalɛ na edula adia.

¹⁴“Hiob, wi lɛlɔ buɛɛ na asɔku kasusu abla asiku Katɔti akɔla ala budie taatina lɛlɔ.

¹⁵Bɔgyi na agyi kalɛ na Katɔti ɔɔdanku liƒlukutu taavinku kayaa, na ɔɔyá na kayaa kaabwɛ ogya?

¹⁶Na bɔgyi na agyi kalɛ Katɔti ɔni ngyi ala ƒui ɔ́bla liƒlukutu lɛmmɔ na lɛƒa kayaa ɔsu na lilanu?

¹⁷Si liwulu ɔƒɛƒɛɛ ɔ́si kalɔ kakwiidi lɛlɔ úbo na lɛƒɔ kayawi ni, kayaa kégyie aani abuala egyiedi na use aani bɔyɛɛlɛ na ukyuli ɔdubo.

¹⁸Bɔkana na adubɔkana na ebunku Katɔti na bibimi kayaa bɛƒala katɔ aani lɛbuala ligyiedi kɔɔlɛ kɔni békuo kede kede na kuukeye aani asogya?

¹⁹“Tina-bu lɛla lɛni na bɔdubɔsu Katɔti, ɔsika bula kasusu kese-bu suu, na bɔɔɔgyi lɛla lɛni na bɔsu bɔsiku lɛla lɛmɛni lɛlɔ.

²⁰Buti na muuti mina ngba lɛtu ugyii na lise kayi lɛsu Katɔti nnii mɔɔyɔ́ lɛtɛmiku-nwu na mina ngba bɔyii udu?

²¹Ukyuli ɔdi ulakana ɔƒɛ bɔnu ku anumi nwaa si ɔƒɛƒɛɛ úbo liƒlukutu lɛmmɔ ƒui ɔ́timi-nwu anumi na uukeye.

²²Na Katɔti bukeye bɔni muudie lɛlɔ taasiku kalɔ kammɔ katɔ kakɛ na buuwi lɛla biala lɛlɔ ni, buukeye teetulo ɔƒɛ bukeye ƒui.

²³Bulakana Katɔti bɔnu, nsu nwuna ɔyikun úbomo geen, na ɔɔbla ala ulu lɛlɔ kaduɛ uwi biala.

²⁴Ɔmmɔ ɔsu na abu bekyuli bɔɔyia Katɔti, ɔsika bekyuli bani mɔɔtalaku lɛlɔ katɔ na baakali ka báda anu ni, Katɔti ulánu-ma ɔnii badi lɛla lɛdi na nwuna anumi.”