Read Lelemi Hiob 39 Bible Online

Hiob 39 - Lelemi bible

Hiob 39

¹“Adubɔti asu uwi ɔni na alakpi akɔ bese bani na abi lɛlɔ ku bakwa baawɔ? Na éenye ánu-ma kawɔkɔ dii?

²Agyi abuli ani na beeti taada kaƒɔ?

³Na si bana ɔwɔwi údu ni, adubɔnu ati?

⁴Uwi ulétu asa na bebi bammɔ baabi lɛlɔ, na anu ka ama alati bakɛ baaví.

⁵“Ɔma náya na bebuo ala betine bebo bana kuƒi na bakɛ kesi kesii baaví?

⁶Ami néte-ma bana kakyakɔ na kalɔ kakwiidi kemmo kesii kani na kadi mma kalɔ.

⁷Balátuna ka belie bede lɛma linengudi, kesii kani na lɛsɛ lɛkya. Na balátuna ka batumini-ma.

⁸Mmomu baakɛ taavi abi ƒui lɛlɔ taawia livo lɛni na bakun.

⁹“Bunu na akɔ ɔgyani ɔni na alakpi akɔ na ɔ́si ɔdubunu kalɔ ɔkya-a lɛyu kemmo na unye utaabla kabla kadi teete-ɔ?

¹⁰Adubunye-nwu lɛlɔ na abala-nwu kɔgba anii ugulu kalɔ iye ugyingya lɛti uwi kesii kadi ute-ɔ?

¹¹Áƒɔ ádi ka ɔdi ebuo ɔni na asia lɛnu anii ɔdubuti nwuna ɔyikun unengudi ɔmmɔ na ɔbla kabla kpakplaa kadi ute-ɔ?

¹²Na adubɔsia-nwu anu ka uti kamu ubewi-ɔ kakpa na ebo, na ɔni-ka ku kɛɛkɛ utése-ɔ unwu kudɔ?

¹³“Aasɛ bonwu ɔdi ɔkya ɔni neeeveyi na nwuna unu ɔsu. Uubimi nwuna avwi na lɛlɔtina kani ɔsu. Nsu beleti-nwu balákɔku kasangbii.

¹⁴Aasɛ bonwu ɔmmɔ uudie nwuna avala atu taakya lɛti akɔ na kalɔ kabla gugungu kada-nya.

¹⁵Na ɔɔɔdaku si ebuo ɔdi ɔdububo ubanya-nya ɔbwɛ.

¹⁶Ɔɔbla nwuna avala aani si ɔɔɔdi anwu ɔlati náva-nya. Na ulábla-nwu aani nwuna lɛbibo lɛdubɔbla ukpludi.

¹⁷Ami ɔlati nábla-nwu na ɔ́dɔlɔ lɛni, na uuubo kasusu kadi.

¹⁸Nsu si ánu ka úse kalɔ ku usi bukeli ni, ukyuli ɔni na uli ɔpɔnkɔ ɔni muukeli teetulo muedi ni, bɔma na ɔɔmá-nwu.

¹⁹“Awɔ néte bapɔnkɔ ɔyikun ɔni na bebo ku bana amɔ linwini gyɔlɔɔ lɛni nwi-ma amɔ lɛ́ka lɛ́mana?

²⁰Awɔ náya na baakana bɔƒulu aani bakpɔtilikpɔ, na beekpeyi enwu momoomo ku kudu kɔni mɔɔyila bekyuli?

²¹Asa na bapɔnkɔ bammɔ badubukeli bátásiaku bekisine bammɔ ni, beetú lɛgba kalɔ taatina bana ɔyikun.

²²Na liƒu biala lilakya-ma kemmo, mmomu bɔma na baamá liƒula biala, na baatu lili taakya kekpokɔ mmɔ ku usi.

²³Na uwi ɔmmɔ na bekpone bani nli-ma lɛlɔ mmɔ beeƒwimi bana kuwii ku atula taavinku kayaa, na kuukeye na ɔƒɛ kemmo.

²⁴Balakana na benye liku linwi si bénu ka bávwi kekpo lise, mmomu bɔbla na baabla gyegyengye.

²⁵Kekpo kammɔ ɔnyi ɔɔkya-ma ogya lɛlɔ kemmo si bénu-ka kɔku kakaaka muedi, na beekpeyi enwu kemmo ku kudu teedie kekpo ese ani na baavwi kenye.

²⁶“Si kɔyɔ uwi ɔdubo ni, awɔ mɔɔtina basangbii kalɛ na beveyi bakɔ katɔ katɔ na batɔlɔ beteesie kɔlɔ kɔni nkya kada kakɛ?

²⁷Na kɔdigbo aasɛ nɔɔ? Awɔ muubó-nwu ɔda asa na ɔɔbla nwuna kakyakɔ na abi kangyaa eli na katɔ katɔ?

²⁸Abi ammɔ eli ndi-nwu kama kekpokɔ kpakplaa kani na ɔɔkya.

²⁹Mmɔ na uunye taanu nwuna lɛdila teemene ɔgyu kakaaka, na ɔɔsia-nya kama.

³⁰Nwuna bebi baakun lɛna ku ubugya. Na kesii kani na lɛla lɛdi líkpi lɛtɛ ni, mmɔ na ɔɔkya.”