Read Lelemi Hiob 4 Bible Online

Hiob 4 - Lelemi bible

Hiob 4

¹Eliƒas ɔni nási Teman ɔ́kya Hiob litemi kenye ɔnini,

²“Hiob, kɛ kayi na enu lɛla lɛni na ndubo-ɔ bɔsu, ɔsika kesii kani na éedu ni, ukyuli ɔdi uuubo na wakana bɔsɔ bulie kpoo.

³Kali nu bɔlɛ bɔni na álɛ bekyuli pii bani na ala ékpoku ku bani na enu áƒɛ-ma.

⁴Na bani náya ulu bɔyii ƒui ni, ƒula etemila áya na bénwini bébo ulu geen ɔmmɔ lɛlɔ. Na bani akɔnkɔ mɔɔtɔ́ lɛnɔ lɛgba lɛ́yu ɔkplu.

⁵Na ɔƒɛni amu awɔ ɔlati na ala ammɔ udu aalɛ́ku, amu na alákana ɔkplu bɔkya na áyila lɛnunsia lɛni?

⁶Kalɛ na aayia Unwoti, na aabla ala ulu lɛlɔ siin ni, utalɛka aya na ɔmmɔ lɛti ute-ɔ lɛnunsia lɛdi?

⁷“Sɔku kasusu bla na anu si eenyimo ka ukyuli ɔni na use siin na lɛla lɛdi lɛɛɛda-nwu úkpi ɔ́yii udu lɛni dii?

⁸Ami lɛ́ɛnu dii, kalɛ na bekyuli bani muunye likyulikpi ala bɔbla lɛlɔ aani kalɛ na ɔtumane uugúlu kalɔ taava edula ni, beedé bana likpidi ebi ani na báva.

⁹Unwoti kɔnyi kuubo-ma lɛlɔ aani kalɛ na ɔƒɛƒɛɛ kpakplaa uukpó taayila lɛla lɛdi udu.

¹⁰Balalane baakwanyi na beebó adi aani bagyata, nsu Unwoti ɔɔƒɛ-ma anyi ƒui.

¹¹Ɔmmɔ ɔsu beekpi ka basɔ beeebo lɛla lɛni na beƒie, anwuɔsu na bana bebi beegyingya.

¹²“Mina kɔtu kúnu lɛbɛla litemi lɛdi, na kabɛnsɛ butemi bɔdi kemmo.

¹³Uwi ɔni na nka lɛlɛɛ líiti-mi líselaku ɔgyu ƒui ni, kɔna kemmo liƒu ala bɔnu bɔmɛni bɔ́gyila-mi.

¹⁴Liƒu lɛdi udu líƒie-mi, na mina lɛlɔ ƒui lɛɛtɔ́ útálɛku mina ekubi kemmo muedi.

¹⁵Na ɔ́bla aani kɔyu kɔdi návi-mi anumi, ɔni na mina lɛlɔ linwini ƒui lɛ́ta línye-mi lɛlɔ.

¹⁶Lɛla lɛmmɔ lísie lítédi línye-mi anumi geen, nsu naaanu lɛla lɛni na lɛdi taati. Ɔ́bla blii kani na línu butemi bɔdi lɛ́siku kesii kani na nka kese diin mmɔ ɔnini,

¹⁷‘Bɔbla na ukyuli ɔyawine ɔdubɔbla siin bɔwɔlɔ na Katɔti anumi? Munuu buse na ɔdubɔkana na use sɛɛn ɔwɔlɔ na nwuna Udiene ɔmmɔ anumi?

¹⁸Unwoti ulánu nwuna batu bani na bakya-nwu kudɔ na katɔ mmɔ muedi ka bese sɛɛn. Mmomu uudie-ma bɔƒiɔ.

¹⁹Na dɛ na ɔdubo buse bute ukyuli ɔni na lɛti na béti bávɔ-nwu na ɔtumu kani na ɔdi? Bakana na banya-nwu babwɛ aani agyangbaala!

²⁰Na ɔ́si usien utátaalɛ kadi bugye ni, baanya-ma taabwɛ. Na baaadaku-ma lɛda na báyii udu ƒui.

²¹Buse aani kevo kani na bálɛ na básɔ báda-ka bágyu ku kana akpa bédie kana kenyekɔ. Nsu bɔɔɔdubo Unwoti kasusu kalɔ bunu.’ ”