Read Lelemi Hiob 41 Bible Online

Hiob 41 - Lelemi bible

Hiob 41

¹“Adubɔkana odenge ubendi buƒie ku ɔdaliwa, munuu kabuli na adubuti enyimi-nwu kenye na akalɛ-ka?

²Adubɔkya-nwu kakwɛnimi enwu iye akya-nwu unungla kabuli na ada-nwu ataavinku?

³Na áƒɔ ádi ka ɔdubuvele-ɔ ɔnii nu-nwu kɔnyana?

⁴Ɔdubɔnyonu lɛlɔ ute-ɔ lɛni aani ƒula kabla ɔblane úsela uwi ƒui?

⁵Adubɔkana-nwu lɛgba bunyimi aani kaduli ebuo ɔdi ete belekubi anii bataaƒianku aani aasɛ kalɛ?

⁶Ebuo ɔni na badubɔkana badi-nwu kuye na ɔdi? Bɔdu na badubɔdu-nwu na bekulo-nwu lɛna basia kalɛkɛ lɛlɔ beteeye?

⁷Atula biala udu ɔdi ulabla nwuna ɔlɔna ɔku iye lili lɛla lɛdi.

⁸Na si aaagyi na ébo kɔnu áda-nwu na ɔ́kunku-ɔ ni, asɔ alasu anii aabla anu kudii!

⁹Ɔtɔtɔ ɔni lɛti ndubo-ɔ bɔgyu si éti lɛnumi ánu-nwu muedi ni, alasu anii eeƒie-nwu ataanyuɛ.

¹⁰Na si ebuo ɔmɛni lɛlɔ libo liƒu ɔni na ukyuli ɔdi ulakana bɔsu ɔnii utékpoku-nwu ni, ɔma geen ndubɔkana bɔsu ɔnii uunye ɔsiaku ami?

¹¹Ami mɔɔdi kayawi kemodi kammɔ ƒui lɛlɔ kalɛ na mɔɔyɔ́, na ɔdi uuubo kayu kadi na uuye-mi.

¹²“Nu ɔyikun ɔni udu na liƒu kebweyi kamɛni kebo na nwuna lɛgba ku ɔlɔna ɔsu!

¹³Na ɔma ndubɔkana na unye ɔsiaku-nwu na ɔdi ɔyikun ɔmɛni udu lɛlɔ, iye ubo-nwu lɛkpu ɔkya kɔgba kɔdi kemmo?

¹⁴Ɔma ndubuse kayi ubimi-nwu kenye na ɔnu-nwu kenye kemmo anyi ani mɔɔda liƒu mmɔ?

¹⁵Nwuna kama kémini, na kese ekpobi ekpobi aani lɛgyumanala.

¹⁶Na ɔƒɛƒɛɛ muedi ulakana kasakɔ mmɔ ntɛ bɔvi.

¹⁷Na ka budi na bédi ekpobi ammɔ ɔsu ni, ulámamiku lɛlɔ.

¹⁸“Si liƒu kebweyi kammɔ kékpeyi enwu ni, ogya ɔɔbwɛ taalɛ, na nwuna anumi eekeye aani kadi négye kadubo.

¹⁹Na agyakpabi ku ogya aalɛ́-nwu kenye kemmo.

²⁰Na uyɔ ɔɔlɛ́-nwu enwu kemmo aani kalɛ na liwulu lɛɛlɛ́ libui lɛni nsia ogya kemmo.

²¹Na ɔɔnwuna ɔƒɛƒɛɛ ɔni náƒɔ ogya geen, na uukeyi lɛla biala na nwuna anumi na lɛɛyɛyɛ.

²²“Nwuna limɔ límini geen na ɔɔda ukyuli biala liƒu.

²³Nwuna lɛlɔ kɔsakɔ kɔni na adubɔnu ka kuse kpɛtɛ kpɛtɛ ƒui ni, kubo ɔkplu kutulo abuala.

²⁴Na nwuna kayi kebo ɔkplu ketulo lɛtakpɛ.

²⁵Na si uwi ɔni na liƒu kebweyi kani mbo kudu mɛni káda kálɛ ni, bayikune geen muedi beenwíni kama taatɔlɔ ku liƒu.

²⁶Kewii iye lɛtula lɛdi liiibo na wakana-nwu lɛla lɛdi bɔbla.

²⁷Na atula ani na béti abuala geen ku abuala egyiedi bétu ƒui ni, aaadi lɛla lɛdi na nwuna kudɔ, mmomu buse na ese aani ligyii lɛni nébun.

²⁸Na buse na atabi ani na béƒwimi na kavwinvwi kemmo bálɛ-nwu ese aani kamu ligyɔ. Na kebweyi kammɔ geen ni, kalayia lɛtula biala.

²⁹Si ɔ́nu lɛtula ni, bɔma na ɔɔmá. Na si ugyii lɛnɔ na béti báƒiɛmi-nwu ni, buse na use-nwu aani livete na lɛdi.

³⁰Si ɔ́kpɛ aba kemmo úsela ni, nwuna lɛlɔ ɔku ɔni nse yayaaya mmɔ ɔɔbwɛ kalɔ teegyingya-ka teewi.

³¹“Na si ɔ́tu úduo ntu kalɔ ni, ntu bɔmmɔ ƒui bɔɔnwanɛ lɛlɔ aani nnɔ bɔni muuƒuƒuo.

³²Na kesii kani na ɔ́sia úsela ƒui kaabla ƒututuu ku avlɔvɔ.

³³Kebweyi bamba kadi kasɔ keeebo kalɔ lɛlɔ na kaada liƒu lɛni.

³⁴Anwuɔsu ɔsɔ ulánu kebweyi bamba ɔnii kadi lɛla lɛdi na nwuna anumi.”