Read Lelemi Hiob 42 Bible Online

Hiob 42 - Lelemi bible

Hiob 42

¹Hiob ɔ́su ɔnini,

²“Ukyuli biala ulakana na wata wenye-ɔ lɛlɔ, ɔsika awɔ mbo ɔyikun na akana na abla lɛla biala na aayɔ́.

³Éye-mi anini, ‘Ɔma mɔɔtɛmi taasiku ala ani na lɛ́lɛ ugyii lɛlɔ lɛni na lɛla tati kemmo?’ Na sɔsɔ ni, lɛ́tɛmi lɛ́siku ala ani na mina kasusu kétenu kalɔ lɛlɔ. Na ana lɛlɔ ala ku kalɔ bunu ese-mi kalɛ kadi.

⁴“Na ásu-mi anii nse atu na lidie ala ani na adubuye-mi kenye.

⁵Bekyuli kenye na línu ƒula lɛlɔ litemi. Nsu ɔƒaani ni, ami ɔlati lɛ́nu-ɔ ku mina anumi.

⁶Ɔmmɔ ɔsu na mina lɛlɔ lɛ́bɔ-mi na líbo nli ɔtumu ku ntɔ akɔ mɛni. Na mɔɔtina kalɛ na mina lɛlɔ libo kɔnyana.”

⁷Ɔmmɔ kama ni, Katɔti ɔ́su Eliƒas ɔnini, “Livo liiƒí-mi na awɔ ku ƒula bakpana inyɔ bakladi lɛlɔ, ɔsika bítasu litemi geen na mina lɛlɔ aani kalɛ na mina kabla ɔblane Hiob ɔ́su ɔ́siku-mi lɛlɔ.

⁸Anwuɔsu biti ɔmantɛ bakɔ maatɛ ku baƒonu maatɛ na bisie Hiob kudɔ na bitákyula akpala na lɛkpabi lɛlɔ na bina lili. Na ɔmmɔ kama ni, Hiob ɔdubɔkpali-mi uvele, na ndubuti bina ekpidi lɛkyiɛ-mii, na nsɔ lɛɛɛdubo-mii kɔtu bɔni na bina adɔlɔla bɔbla ɔsu.”

⁹Eliƒas ku Bildad ku Soƒar bádi litemi lɛmmɔ lɛlɔ na Katɔti únu Hiob buvele.

¹⁰Ka Hiob ɔ́kpali Katɔti na úvele úte nwuna bakpana ɔ́wɔlɔ lɛni ni, Katɔti ɔ́sɔ ɔ́bla na Hiob únwini ɔlakɛne na ɔ́kɛ ala ani nése-nwu akpa anyɔ.

¹¹Ɔmmɔ kama ni, Hiob ɔ́ya na bánwa adila na ɔ́lɔ nwuna banwani bananabi ku belekubi ku nwuna bakpana na bádi limeyi. Na nwuna bakpana béwulo-nwu kɔnyana na lɛbibo lɛni na Katɔti ɔ́ya na líbo-nwu lɛlɔ ɔsu. Na bana akɔ ɔdi biala úte-nwu sika ɔƒualadi ku ugyiedi kɔkwɛnimi.

¹²Na Katɔti úte Hiob kusɛ kusɛ útulo kudeedi ƒui. Na ɔ́ya na ɔ́kɛ baƒonu mpim leevu-ine ku bebuo ala betine benengudi mpim ɛku ku ɔmantɛ bakɔ mpim inyɔ ku bebuo ala betine apim unwi.

¹³Hiob ɔ́sɔ ɔ́wɔ bebi bananabi maatɛ ku belekubi ɛtɛ.

¹⁴Na belekubi bammɔ anyi ndi Yemima ku Kesia ku Keren Hapuk.

¹⁵Belekubi bammɔ mɔɔdia bɔnu teetulo na kalɔ kammɔ ƒui lɛlɔ, na Hiob úte-ma kadikɔ aani kalɛ na úte bananabi bammɔ lɛnɔ.

¹⁶Hiob ɔ́sɔ úlie ngba akwa eti anyɔ ku aavlene ɔni na úlie ɔ́nu nwuna bawɔ bawɔ.

¹⁷Anwuɔsu Hiob ɔ́bi geen na ngba búmo-nwu asa na úkpi.