Read Lelemi Hiob 6 Bible Online

Hiob 6 - Lelemi bible

Hiob 6

¹Mmɔ na Hiob údie kenye ɔnini,

²“Uuuse kpɛtɛ kpɛtɛ ka akɔku mina lɛbibo ku ɔlɛ ɔni na muunú anu.

³Ɔsika ubo unu utulo ɛpu kɔnwinimi. Na ɔmmɔ geen náya na mɔɔtɛmi aani si kasusu na ńteti.

⁴Unwoti úbo nwuna atula ɔ́lɛ-mi, na ugyulo ɔmmɔ ɔkɛ ɔ́vi-mi lɛlɔ kemmo ƒui. Na nwuna liƒu akɔla budie taatina bonwu enye-mi anumi aani bekpone.

⁵Ebuo ala utine ulénye taava ukpludi si ɔ́kɛ livo ɔɔkun, iye ɔmantɛ akɔ si unye ɔɔkun livo.

⁶Ukyuli ulati adila ekpludi emini si mma buuubo. Lɛni kani na lɛvala lɛna lɛƒualadi liláyu emini.

⁷Lɛni na mina adila ƒui ani mɔɔdi ese-mi. Na liiibo ɔkwɛ emini liiite adila biala.

⁸“Nsu si mina lɛƒɔyɔ ku lɛla lɛni lɛlɔ na lívele-nwu na ɔbla ute-mi ka nwuna lɛlɔ na mina anu asia ɔsu nka ɔdia-mi.

⁹Na ani ndi ka udie-mi ulu na likpi kani na ɔsa!

¹⁰Na si bɔbla na ɔbla ɔmɛni ute-mi ni, nka ndubɔƒulu ku ebiti ina ka muunú ɔlɛ na mina lɛlɔ kemmo. Ɔsika ngyi ka Unwoti use kedee, na ńtata ńtenye nwuna litemi lɛdi lɛlɔ kudii.

¹¹“Ɔyikun ɛlɛ nsɔ nkya-mi na muulie ntaasia anu ka melie ngba? Na si nlie ngba lɛnɔ ni, bi ndi mina lɛnunsia?

¹²Lɛtabi na mina ɔlɔna ɔdi? Munuu lɛbualagyie?

¹³Bubo na mbo ɔyikun ɔdi na ndubɔkana lɛlɔ bubunku ka lɛbuni biala líkeli-mi, na lɛla lɛla lɛsɔ lilátɛ-mi mɛni?

¹⁴“Na lɛbibo lɛmɛni udu kemmo ni, amii mina bakpana na ɔlɛka bibunku-mi, ina úbo úte ka nnye Unwoti anumi mɔɔtɛmi ku kayi.

¹⁵Mina banwa, naaanu-mii kebunku kadi munu munu. Bise aani utukwalɛ ɔni kemmo na ntu bɔ́kwii.

¹⁶Bise aani utukwalɛ ɔni mɔɔƒɔ́ ntu taagba ku kudu.

¹⁷Nsu si kaƒɛndi kédu ni, ntu bɔmmɔ bɔɔkwii ƒui kɔnakunwi.

¹⁸Na kaatɔ́lɔ beyedine bani nkɛ ku bana kɛɛkɛ ku etila, na baada ulu taava taatáwia ntu taayi udu.

¹⁹Beyedine bani ndanku etila ku kɛɛkɛ ɔmɛni básiku Seeba ku Tema lɛma kemmo ni, baakɛ taawia ntu bɔni na bani.

²⁰Nsu bana lɛnunsia ƒui lɛɛyii na utukwalɛ ɔmɛni ɔsu, ɔsika nka basia anu ka badubɔkɛ ntu bani asa na ɔ́kwii.

²¹Lɛni geen na bise bite-mi aani utukwalɛ ɔni nákwii mɛni, na ɔ́tɔlɔ beyedine bammɔ útákya kalɔ kakwiidi kammɔ kemmo na báyii udu.

²²Buvele na lívele bina ɔdi lɛla lɛdi nnii bite-mi bɛsiku bina lɛlakɛ kemmo, iye bite ɔdi lɛla lɛdi na ami ɔsu?

²³Munuu bɔsu na lɛ́su-mii nnii, bikpo bɛƒɔ-mi na mina ukisine ɔdi lɛkɔkɔ?

²⁴“Ɔdia, ndububile kenye kpoo na bɛtina-mi lɛla lɛdi, na bidie mina bɔƒiɔ bɛtina-mi.

²⁵Litemi geen ani lɛɛtu ukyuli kayi uwi biala kemmo. Nsu amii bina unyeƒi ɔni na bɛɛkya ƒui ni, lɛla likpludi na lɛdi.

²⁶Bɔkali na bɛɛkali ka bɛklibi-mi na mina bɔtɛmi kemmo ka lɛ́yila lɛnunsia na enu áƒɛ-mi ɔsu, na bɛɛnu bɛnii etemila keeke na mɔɔtɛmi?

²⁷Mɔɔnu ka bɛdubɔkana na bɛtu egulabi na ukpinebi lili, na bɛsɔ bɛdi-nwu kuye, ina ka ɔdi bina ɔkpana ubidi!

²⁸“Na ɔƒaani ni, binwini bitaanu-mi ligeen, ɔsika lɛɛɛdubo ɔkɔ bɔnyi bɔtɔlɔ-mii.

²⁹Bɛda-mi kalala kɔtɔ bɔdu bɛya, ɔsika mina kenyekɔ ku lɛnyi lɛni na lɛ́ƒɔ ƒui mɔɔyii udu mɛni.

³⁰Bɔnu na bɛɛnu bɛnii ɔkɔ na mɔɔnyi, iye lɛɛɛgyi lɛbuni ku likpidi kavumana?