Read Lelemi Hiob 7 Bible Online

Hiob 7 - Lelemi bible

Hiob 7

¹“Geen ni, ukyuli kabla kaaatɛ kalɔ na kayawi kamɛni kemmo. Na nwuna emeyi ƒui ese aani ukyuli ɔni nnye ɔɔbla ukyuli bamba kabla na kayu kenye.

²Na útavumanaku kabla ɔblane ɔni na unye ɔgya useyi uwi ɔyuli, iye ɔtumane ɔni na unye ɔgya nwuna lɛyuƒɔla.

³Nsɔ lɛɛɛgyi lili ku lɛgba liiite mina emeyi, na usien lɛnɔ lɛbibo ku kɔnyana buwulo sɔɔn kani na bɔdi-mi.

⁴Si líduo lɛ́tɛ ni, ndubukpoku lɛlɔ laa asa na kadi kegye, na usien ɔmmɔ úne-mi na kadi kelegye-mi pla.

⁵Mina ɔlɔna úbie na beklubi báƒɔ-nwu ƒui, na únwini alɛbi alɛbi sɔɔn ku eƒula ani mɔɔlɛ́ ntu uwi biala.

⁶“Na bɔsa kani mina ngba bɔda aani kalɛ na uleku ɔɔtu unwo ku kedetila.

⁷O Unwoti, tayiƒala ka mina ngba buse aanii kalɛ na banwuna ɔƒɛƒɛɛ ukplodi. Na mina anumi asɔ aaadubo ebiti adi bɔnu kudii.

⁸Ndubo bɔyii bɔkya, na awɔ iye ukyuli ɔdi ɔsɔ ɔɔɔdubo-mi bɔnu lɛnɔ kudii.

⁹Kalɛ na liƒlukutu lɛɛyii taakya ni, lɛni kani na ndubo kubiɔ buduo na nsɔ lɛɛɛdubo bunwini bubo.

¹⁰Nsɔ lɛɛɛdubo mina kaduli bunwini bubo, na uwi ɔsɔ uletu asa na bekyuli badubo-mi bɔyiƒala.

¹¹“Anwuɔsu na lɛɛɛdubo kenye bubile bɔsɔ bulie kpoo, mmomu ndubo-ɔ bɔkpali na lɛsu-ɔ ala ani muukpóku-mi.

¹²Unwoti, ɛpu ɔni na ásia ubili iye liƒu kebweyi kani na ébo lɛkpu ése na ndi ɔsu na ábala-mi ƒui lɛni yoo?

¹³Usien na mɔɔkali ka nka si lɛ́yu lɛ́tɛ ni, na lɛkɛ bɔnwuna lɛsiku mina lɛbibo bonwu lɛmɛni kemmo.

¹⁴Nsu uwi ɔmmɔ na eedie liƒu ala taatina-mi na kɔna kemmo, na ulaya na mɔɔkana bɔlɛɛ.

¹⁵Na nka mɔɔwia ka mina ɔƒɛƒɛɛ ɔsa-mi kɔnakunwi na likpi, utulo si nli ngba muunú ɔlɛ ɔmɛni.

¹⁶Ngyi ka lɛɛɛdubo bulie buteesie uwi ƒui. Na ngba bumodi bɔmmɔ búkpi-mi ɔkwɛ na líni-mu. Anwuɔsu te-mi bɔnwuna na edie-mi ulu na lɛtɔlɔ ngba bɔmɛni kemmo, ɔsika bɔsɔ buuubo-mi kɔsia kɔdi.

¹⁷“Bi ɔsu na bekyuli lɛlɔ lɛ́ƒɔ-ɔ kuye na aasia bana ablala anu lɛni?

¹⁸Na bi ɔsu na enye aakɔ́ku-bu taanu ɔ́si ɔtanta útálɛ useyi lɛni?

¹⁹Bi ɔsu na ƒula anumi alɛ-mi lɛlɔ uwi biala, na anii elédie anumi na ina lisuo muedi na ɔdia-mi bubweli?

²⁰Si bɔƒiɔ bɔdi na lɛ́ƒiɔ-ɔ ni, bi ndi bɔƒiɔ bɔmmɔ, na elédie alatina-mi ka aanu ukyuli ablala kemmo uwi ndi uwi. Bi ɔsu na édie ami lɛti ése na ƒula anumi alɛ-mi lɛlɔ lɛni aani si etila ebendi na línwini líte-ɔ?

²¹Na bi ɔsu na eléti mina alaekpidi alakyiɛ-mi na anu-mi kɔnyana? Úbu blii kani na badubo-mi lɛti bubi ɔni na adubɔwia-mi anɔ na asɔ alanu-mi.”