Read Lelemi Hiob 8 Bible Online

Hiob 8 - Lelemi bible

Hiob 8

¹Ɔmmɔ kama ni, Bildad ɔni ndi Suhini mmɔ úye Hiob ɔnini,

²“Áawɔlɔ ƒula ala ekpludi ani na enye aaká gyɔlɔɔ mmɔ?

³Bɔbu na aabu anii Unwoti ɔɔnu litemi geen taatu-ni teenwini na uƒu lɛla lɛbuni lɛdi ɔkya?

⁴Alaekpidi ani na ƒula bebi bábla ni, nwuna kɔtu na ɔ́ni-ma.

⁵Anwuɔsu bunwini na ɔlɛka enwini, na ekpi Unwoti Ɔyikune Ƒui kɔtɔ.

⁶Na si adi ukyuli ɔni na nse siin sɔsɔ na lɛla lɛdi lɛɛɛda-a ni, ɔƒɛni muedi Unwoti ɔdubɔta na ubebunku-ɔ na ɔya na asɔ enwini eténye ƒula kenyekɔ kani mbo ɔbu mmɔ.

⁷Na akɛla ani ƒui na ákɛ ábavi ni, aaadubo-nya bɔbu, ɔsika Unwoti ɔdubute-ɔ ala ani ntulo ammɔ ƒui uwi ɔni mebo.

⁸“Ye nu ɔ́si bula bati kuuku uwi ƒui na ati lɛla lɛni na bátɛya,

⁹ɔsika abu bútetu tɔ uwi ɔdi, na kamaaku mɛni kani na báwɔ-bu na bɔɔɔgyi lɛla lɛdi. Bula ngba emeyi ƒui ese aani ɔyuli ɔni mɔɔyii taakya.

¹⁰Na bula bati kuuku bammɔ ama bebo lɛlati na badubɔkana na batina-a lɛla.

¹¹Ketudɔ alakpi alakwɛ kesii kani naaadi lɛba taalɛ lili.

¹²Lɛni kani na si lɛba lɛ́kwii ni, alakpi ani muunye mmɔ aaka livo bamba bukpi taayii udu.

¹³Bekyuli bani mɔɔyiƒala Unwoti Katɔti na beedie-nwu atu ni, lɛni na bana kawɔlɔkɔ kaabla ka báyila bana lɛnunsia ɔsu.

¹⁴Na lɛla bamba biala lɛlɔ na ukyuli úti anu ɔ́sia ni, nina ɔkplu útedu anasi kɔgbu na Unwoti anumi.

¹⁵Anwuɔsu si ukyuli ébo áda lɛla lɛmɛni udu lɛlɔ ni, bubuli kani na adubo bubuli.

¹⁶Na bekyuli bamɛni udu bese aani kugyii kɔni nákɛ ntu ku ɔƒɛ. Kúdie evete na kúgyingya kɔ́ƒɔ kemo kammɔ kesi kesii.

¹⁷Na kuubó kuna ligyiitu taabala atakpɛ ani nkya mmɔ taamana.

¹⁸Nsu si bámami-ku na mmɔ ni, asɔ alanu mmɔ aláti anii kugyii kɔdi kúnye mmɔ dii muedi.

¹⁹Bekyuli bekpidi ebiti ƒui kawɔlɔkɔ na kadi mmɔ, na bekyuli bamba mɔɔƒɔ́-ma kunyekɔ.

²⁰“Nsu Unwoti ulédie bekyuli bani mɔɔdi nwuna litemi lɛlɔ siin atu kudii. Na lɛni kani na ɔɔɔdubo bekyuli bekpidi lɛnɔ kebunku kadi bute kudii.

²¹Anwuɔsu Unwoti ɔdubɔya na asɔ ama ku ebiti, na ebo lɛlɔyɔ kudu momoomo ete-nwu.

²²Na ɔdubɔya na kɔƒa kukpo ƒula bekisine, na balalane kɔduli ƒui kɔyii udu, na basɔ balanu bana ɔdi.”