Read Lelemi Kɔgya 101 Bible Online

Kɔgya 101 - Lelemi bible

Kɔgya 101

¹O Unwoti! Ndubudie ɔnu limwi-ɔ na kalɛ na aayɔ́-bu uwi ndi uwi na aatɛ litemi ulu siin lɛlɔ ɔsu.

²Bo na ebebunku-mi. Mmɔ na ndubɔkana lɛlɔ bɔda kaduɛ ntaabla lɛbuni kalɛ na naaaƒiɔ-ɔ na mina kaduli.

³Na lɛɛɛdubo bɔtunaku likpidi udu biala ɔdi, ɔsika naaayɔ nnii mina anumi aanu ɔmmɔ udu iye lɛsala ku bekyuli bekpidi badi. Na ami ni, ntaabla ala na anumi kemmo.

⁴Na lɛɛɛdubo bɔtuna ku kenwini ku ɔkɔ ala bɔbla bɔdi.

⁵Ukyuli ɔni mɔɔbɛla lɛlɔ taalɔ bekyuli anyikpi ni, ndubɔyila-nwu udu. Na ukyuli ɔni mɔɔtina lɛlɔ na ɔɔkun lɛmɛnɛ ni, lɛɛɛdubo bɔtunaku-nwu.

⁶Ndubɔsia anu na bekyuli bani mɔɔdi Katɔti litemi lɛlɔ na kalɔ kamɛni lɛlɔ na ami ku-ma bulie. Na bekyuli bani mɔɔbla ala ulu geen lɛlɔ ni, ama ndubɔbla-mi kabla.

⁷Bekyuli bani na ɔkɔ ala bɔbla bɔkya-ma ngba kemmo ni, baaadubo-mi kaduli bulie. Na bekyuli bani mɔɔbla ala anumi lɛlɔ lɛnɔ baaadubo-mi anumi bunye.

⁸Limeyi ndi limeyi ndubɔyila balalane udu ƒui na kalɔ kamɛni lɛlɔ. Na ndubɔbɔku-ma lidie Unwoti ɔma unengudi ɔmmɔ kemmo.