Read Lelemi Kɔgya 102 Bible Online

Kɔgya 102 - Lelemi bible

Kɔgya 102

¹Nu-mi bɔkpali, O Unwoti, na aya na mina kɔvanu kudu-ɔ kudɔ na ebebunku-mi.

²Tabɛla-mi ƒula anumi si líduo ɔgbankpi kemmo. Mmomu se atu na enu-mi bɔkpali. Na ababla na ebo ebebunku-mi.

³Ɔsika mina emeyi áasa áwɔlɔ aani kalɛ na uyɔ ɔɔyii taakya. Na mina ɔlɔna lɛnɔ ɔɔkywí aani lɛgyavonku.

⁴Utu ɔɔyɔ́ lɛlɔ na mina kayi kemmo aani kalɛ livo lɛɛyɛyɛ. Na adila bɔdi muedi búkpi-mi ɔkwɛ.

⁵Ɔ́si kalɛ na muudumo ɔsu ni, mina ɔlɔna ɔ́kwii na ekubi ekubi na aanu.

⁶Lɛ́ta lɛ́bla aani aasɛ ɔni nkɛ anwu lɛti na lɛku kemmo. Na bédie-mi atu aani likuku nkya kalɔ kakwiidi kemmo.

⁷Naaatɛ taalɛɛ uwi ɔdi, na lɛ́ta lɛ́bla aani aasɛ ɔni nlie lɛsa lili anwu lɛti.

⁸Lɛnyinkpi kani na mina bekisine baalɔ-mi usien ku ɔƒɛ teewida bekyuli ka ɔdubɔlɛku-ma aani ami.

⁹Ntɔ bɔni kemmo muulie búnwini mina adila ani mɔɔdi. Na mina mmii lɛnɔ búnwini ntu bɔni mɔɔní.

¹⁰Ɔkɛnku ƒula livoƒi ku kɔnyi kɔni na éti akya-mi ɔsu ni, ágyu-mi ébo évaakun.

¹¹Mina ngba emeyi aasá aani kalɛ lɛdisa lɛɛƒɔ́ limeyi bukeye. Na buse aani livo lɛni mɔɔyɛyɛ.

¹²Nsu ni, O Unwoti, awɔ adi ɔga úsela uwi ƒui. Na adubɔƒɔ lɛnyi na bekyuli ƒui akɔ ɔ́si kaba útédu kaba.

¹³Adubɔnu Sion kɔnyana ɔƒɛni amu. Ɔsika uwi ɔmmɔ údu na anwu na ɔdi mɛni.

¹⁴Atabi ammɔ muedi áƒɔ abu ƒula kabla bablane kuye nsu kalɛ na bébo-nya bábwɛ bébile na ɔtumu ɔ́ƒɔ-nya lɛlɔ ɔɔdu-bu kaƒɔ.

¹⁵Na ɔmmɔ ɔsu ni, kadi bekyuli badubo Unwoti lɛnyi butaayia. Na kalɔ lɛlɔ baga ƒui badubo-nwu butaabu na banu kalɛ na uukeye.

¹⁶Ɔsika Unwoti ɔdubɔsɔku Sion ɔma ɔtu na bekyuli banu kalɛ na uukeye.

¹⁷Na ɔdubunu bawabane ƒui bɔkpali na ɔbla ala ani beevele-nwu ute-ma.

¹⁸Binweni ɔmɛni bise kaba bekyuli bani na bátawɔ-ma tɔ, ɔsika ɔlɛka ama lɛnɔ bebemwi Unwoti.

¹⁹Unwoti ɔ́nu ɔ́siku nwuna keliekɔ kedee kani na ulie mmɔ. Na ɔ́nu kalɔ kammɔ ƒui.

²⁰Na únu bekyuli bani na bákya ɔtɔ budumo ku bani na bádu-ma kukpi kɔtɔ ƒui kalɛ na udie-ma.

²¹Mmɔ na bekyuli badubo Unwoti lɛnyi kudu bubo na Sion, na bemwi-nwu lɛnyi na Yerusalem.

²²Na uwi ɔmmɔ ni, baga ku lɛga kɔdikɔ ƒui badubɔsa lisu na bakya Unwoti lili kalɔ.

²³Unwoti ɔ́ya na mina ɔyikun ɔ́yuɛ uwi ɔni na lɛ́si mɔɔkɔ́ na ɔ́ya mina ngba emeyi lɛnɔ áƒana.

²⁴Mmɔ na lɛ́su Unwoti nnini, “Awɔ eli ngba úsela uwi ƒui, tada-mi ngba likuku na uwi ɔni na mina emeyi étedu tɔ.

²⁵Na kalɔ kesekɔ ni, awɔ nédie kayawi kamɛni ƒui, na éti ƒula enu ábla kayaa.

²⁶Ala amɛni ƒui adubɔyii udu. Nsu awɔ ni, adubulie uwi ƒui. Ala ammɔ ƒui adubɔtɔ aani adala kuuku kalɛ. Na adubo-nya budie buwi aani kalɛ na baavumana ala kuuku teedie-nya atu.

²⁷Nsu kalɛ kani na awɔ ese ni, lɛni na adubo buse. Na ƒula akwa alása kudii.

²⁸Ƒula bekyuli bani mɔɔbla ƒula kabla ulu lɛlɔ ni, bana bebi badubulie-ɔ anumi. Na agyumana bana kaba bebi lɛnɔ.”