Read Lelemi Kɔgya 103 Bible Online

Kɔgya 103 - Lelemi bible

Kɔgya 103

¹O Katɔti, ndubumwi-ɔ lɛnyi kedee ku mina kayi ƒui.

²Ndubumwi Unwoti! Na naaayiƒala ala abuni ani na ɔ́bla úte-mi.

³Anwu muuti mina alaekpidi ƒui taakyiɛ-mi. Na ɔɔbwi-mi lɛlɛ lɛni ƒui na muuƒi.

⁴Anwu muudie-mi ngba na kukpi kemmo, na ɔɔyɔ́-mi, na ɔɔnu-mi kɔnyana uwi ndi uwi.

⁵Uute-mi ala abuni ani mɔɔwia na mina ngba emeyi kemmo na eedú-mi. Na ɔɔyá na mina ɔyikun ɔɔbla ɔwɔdi aani kɔdigbo aasɛ kalɛ.

⁶Unwoti ɔɔtɛ litemi na ulu lɛlɔ siin teete bekyuli bani na balalane baanya taakya.

⁷Údie nwuna kasusu ɔ́tina Mose. Na ɔ́ya Israelƒuɔ bánu nwuna ala ebendi ani na ɔ́bla.

⁸Unwoti ɔɔnu kɔnyana na ɔɔbla lɛƒɔndia. Uléti kɔnyi pla pla na ɔɔyɔ́ bekyuli geen.

⁹Uládɔnku ukyuli uwi ndi uwi na uléti kɔnyi taakya ukyuli uwi ƒui.

¹⁰Ulani-bu kɔtu aani kalɛ bula ekpidi ese iye ɔƒɔ-bu kayu kani námanku bula ɔbladu.

¹¹Na kalɛ na kayaa kágyunku kalɔ ni, lɛni kani na nwuna bɔyɔ bɔni neeebo kawɔkɔ búbomo búte bekyuli buni bani mɔɔyia-nwu ku ɔbu.

¹²Na kalɛ na ɔƒɛ katukɔ kágyunku ɔƒɛ kanukɔ ni, lɛni na ɔɔda-bu ekpidi teedie teevaakun na bula lɛlɔ.

¹³Kalɛ na bebi lɛlɔ lɛɛbla bana bawɔne kɔnyana ni, lɛni na Unwoti lɛnɔ bekyuli bani mɔɔyia-nwu lɛlɔ lɛɛbla-nwu kɔnyana.

¹⁴Ɔsika ɔgyi ka lɛti na úti ɔvɔ-bu na lɛti kani na bɔdubɔsɔ bunwini.

¹⁵Ukyuli ɔyawine anwu ni, nwuna ngba emeyi ese aani livo. Na aalɛ́ lili taabla anwula na alakpi akɔ.

¹⁶Na si ɔƒɛƒɛɛ úkpo ɔ́vi-nya eli kani na anu ewiakun. Na ɔdi ɔsɔ uláti-nya kalɛkɔ muedi.

¹⁷Nsu bekyuli bani mɔɔyia Unwoti ni, ama na ɔɔyɔ́ úsela uwi ƒui. Na nwuna lɛƒɔndia ku ala bɔbla ulu lɛlɔ siin use ute bana bawɔ bawɔ

¹⁸bani ƒui mɔɔbla taasiaku nwuna bunyimi lɛlɔ na baadi nwuna ɔda bubo lɛlɔ.

¹⁹Unwoti ɔlati nése nwuna lɛgaboku úse katɔ. Na nwuna lɛga kadikɔ mɔɔdi kayawi ƒui lɛlɔ.

²⁰Amii Katɔti batu bayikune ƒui bani muunú-nwu litemi bibo na bibemwi Unwoti.

²¹Amii nwuna katɔ kabla bablane lisu bani mɔɔbla-nwu kabla, bimwi-nwu.

²²Amii ala ediedi ƒui ku bani lɛlɔ na ɔɔdi, biti bumwi bite Unwoti. Ami ndubumwi Unwoti ku mina kayi ƒui.