Read Lelemi Kɔgya 104 Bible Online

Kɔgya 104 - Lelemi bible

Kɔgya 104

¹O Katɔti, ndubumwi-ɔ ku mina kayi ƒui, ɔsika ébomo geen na eekeye ku ɔbu. Na bukeye bɔmmɔ bɔ́ka bɔ́mana-a aani kɔdi kalɛ.

²Na kalɛ na eekeye use aani awu na akya. Na ébimi katɔ áƒala kayaa aani kevo kɔdi kpakplaa kalɛ.

³Na átu ƒula keliekɔ ásia ntu bɔni nƒa katɔ mmɔ lɛlɔ. Na ábla liƒlukutu na ɔdi kɛɛkɛ ɔni lɛlɔ na eelie. Na ɔƒɛƒɛɛ avwi lɛlɔ na eelie taavi.

⁴Na éti ɔƒɛƒɛɛ ábla ƒula batalane. Na éti ogya linyemi ƒula kabla bablane.

⁵Awɔ nákya kalɔ kamɛni ƒui awodu ɔka kalɔ ɔni na lɛla biala likana-ka bɔkunku.

⁶Áya na ntu buwi-ka anumi aani kɔdi, na abi muedi alátina.

⁷Nsu ka édie lɛdi momoomo ni, ntu bɔmmɔ búse kalɔ bɔɔgbá

⁸taayu abi ammɔ lɛlɔ na bútéduo kɔwɛ kemmo kesii kani na áƒuna éte-mu.

⁹Ásia ubili éte-mu kesii kani na bulakana buyi bɔvia. Na bɔsɔ buláƒɔ kalɔ ƒui lɛlɔ kudii.

¹⁰Aayá na ntukpa wɛlɛ wɛlɛ bɔni mɔɔlɛ́ kalɔ kemmo bɔɔgbá taavi ɔkwalɛ kemmo ku abi ntɛ awɛ kemmo.

¹¹Mmɔ na aayá na bebuo ala betine ku bakumbweyi bamba ƒui baaní ntu na baadú bana utukwɛ.

¹²Na baasɛ ƒui baatú bana ayu taakya egyii ani nlɛ ntukpa bɔmɛni amadɔ kemmo na beelie teedie lɛnu taasiku kɔgba kɔmmɔ akɔ.

¹³Aayá na ɔnantu ɔɔna teewi abi lɛlɔ. Na kalɔ kaaƒɔ́ ntu.

¹⁴Na aayá na livo lɛɛkwɛ́ teete bebuo kalɛ na bakun. Na edula aakwɛ́ teete bekyuli kalɛ bakɛ adila.

¹⁵Ɔɔkɛ́ ntɛ bɔni mɔɔkya-nwu kayi ebiti ku nnɔmii bɔni mɔɔyá nwuna anumi ekeye ku adila ani muute-nwu ɔlɔkplu.

¹⁶Na egyii enengudi kpakplaa ani na Katɔti ɔ́lɛ na Lebanon abi lɛlɔ aakɛ́ ntu uwi ndi uwi.

¹⁷Na egyii amɛni lili na baasɛ baabla bana ayu. Na baasɛ benengudi ama baabla bana ayu na egyii akɔdi bamba ani nde mmɔ lɛlɔ.

¹⁸Abi enengudi ani nákuku adi kabɛkɔ kete alakpi akɔ bese. Na atakpɛ akɔ adi besi ku betukpɛɛ ku atakpɛ akɔ bebweyi bamba keliekɔ.

¹⁹Awɔ nédie kɔbuli ka kutaatina abuli bɔka. Na ɔƒɛ lɛnɔ ɔgyi uwi ɔni na ɔɔnú.

²⁰Awɔ nábla lɛdisa kalɛ na beƒiebuo butaalɛ taatáwia bana lɛdila usien.

²¹Bagyata baakwanyi si baawia bebuo badi beƒie. Na baanu Unwoti anumi ka ute-ma lɛla lɛmi badi.

²²Na si ɔƒɛ ɔ́tu ni, beenwíni teesie teetéduo bana kɔbɛkɔ.

²³Na bekyuli lɛnɔ baayu ulu teesie bana kabla lidu akɔ na beenye bana kabla kammɔ lɛlɔ teetédu useyi uwi.

²⁴O Unwoti ábla ala pii ɔkɛnku ƒula lɛnunda lɛlɔ. Na áya na ƒula ala ediedi áƒɔ kalɔ kammɔ ƒui lɛlɔ.

²⁵Édie ɛpu na ɔ́bɛbɛ uwi bonwu na kubweyi kunengudi ku kubliidi ƒui lidu lidu pii kɔ́ƒɔ-nwu kemmo.

²⁶Mmɔ na lɛkɔlɔ libendi lɛɛsia taavi. Na liƒu bebweyi bebendi lɛnɔ bakya-nwu kemmo beesié taasɔ.

²⁷Ƒula anumi kani na ala amɛni ƒui aanu ka ete-nya bana lɛdila na uwi lɛlɔ.

²⁸Na lɛla lɛni na éte-ma ni, ani kani na baadi teemo.

²⁹Si áda anumi édie-ma lɛlɔ blii ni, liƒu lɛɛda-ma. Na si áda ƒula ɔƒɛƒɛɛ édie-ma lɛlɔ kemmo ni, beekpi na basɔ benwini lɛti.

³⁰Édie ala ƒui ɔkɛnku ƒula Kɔyu lɛlɔ. Na aasɔku kalɔ kemodi taabla ɔwɔdi.

³¹Buuvele bɔnii Unwoti uteekeye uwi ƒui. Na lɛlɔ lɛyɔ-nwu na ala ani ƒui na údie lɛlɔ.

³²Unwoti úti nwuna anumi ɔ́nu kayawi na kaakunku. Na úti kɔnu útuku abi lɛnɔ, na aalɛ́ uyɔ.

³³Uwi ɔni na mmu nli ngba mɛni ni, ndubo lɛnu buteedie teemwi Unwoti.

³⁴Mbo lɛnunsia ka mina kasusu kani muuti kadubɔƒɔ-nwu anu. Ɔsika Unwoti mɔɔyá na mɔɔkɛ́ lɛlɔyɔ.

³⁵Buuvele ka ayila alaekpidi bablane udu na kalɔ ƒui lɛlɔ. Na bana udu ɔsɔ utalɛ kudii. O Katɔti, ndubumwi-ɔ ku mina kayi ƒui. Bɛya na bumwi Unwoti.