Read Lelemi Kɔgya 107 Bible Online

Kɔgya 107 - Lelemi bible

Kɔgya 107

¹Bɛgya Unwoti enu, ɔsika ɔdia na ɔɔyɔ́-bu uwi ndi uwi.

²Na amii bani ƒui na ɔ́ƒɔ-mii ngba na údie-mii ɔ́lɛku bina bekisine enu kemmo ni, biti bumwi bite-nwu.

³Ɔsika anwu násɔku-mii úbasala na bina kalɔ lɛlɔ ɔ́siku kaƒɔ na ɔƒɛ katukɔ ku kanukɔ. Na ɔ́si katɔ kakɛ úsie kada kakɛ lɛnɔ ƒui.

⁴Badi bábwɛ béduo kalɔ kakwiidi kemmo bakɛ baaví na baaagyi kesii kani na basia beduo ɔma unengudi ɔdi kemmo na belie mmɔ.

⁵Kɔka ku utukwɛ kani mɔɔda-ma ɔni na basɔ beeebo lɛnunsia lɛdi ka badubo ngba bulie.

⁶Mmɔ na báva bákpali Unwoti na bana lɛbibo kemmo. Na údie-ma sɔsɔ.

⁷Unwoti ɔ́tɔnku-ma ɔ́siaku ulu ligeen lɛlɔ útéduoku ɔma ɔni kemmo na bákɛ keliekɔ.

⁸Ɔdi ka bekyuli bamɛni ƒui bágya Unwoti enu, ɔsika ɔ́yɔ-ma na ɔ́bla ala ebendi úte-ma.

⁹Bani na utukwɛ ɔɔda ni, uute-ma ntu na baaní. Na bani na kɔka mɔɔda-ma ni, uute ama lɛnɔ adila abuni na baadi teemo.

¹⁰Kasuudikɔ na badi beli na lɛla biala lise-ma suu. Na badi lɛnɔ ni, béƒie-ma bákya ɔtɔ na beebó abi na batɛ kɔgba kemmo.

¹¹Ɔsika báta bénye Katɔti Ɔyikune Ƒui lɛlɔ na béni nwuna bɔlɛ.

¹²Lɛlɔ lítu-ma na kabla kpakplaa kani na baabla ɔsu. Na badubo bubuli ɔni na ɔdi uuubo na webunku-ma muedi.

¹³Mmɔ na báva bákpali Unwoti na bana lɛbibo kemmo. Na údie-ma sɔsɔ.

¹⁴Ɔ́ya na bálɛ kasuudikɔ bonwu kani kemmo na bakya mmɔ. Na bana kɔgba kɔ́ƒɛ kpɛtɛ kpɛtɛ.

¹⁵Ɔdi ka bekyuli bamɛni ƒui bágya Unwoti enu, ɔsika ɔ́yɔ-ma na ɔ́bla ala ebendi úte-ma.

¹⁶Kɔyakun kɔni bákalɛ ku abuala lidu ku kɔbuɛlɛ ni, ɔ́ƒɛ-ku ƒui kede kede.

¹⁷Badi badi badɔlɔdi ɔ́si bana likyulikpi ala bɔbla ɔsu. Na badi lɛnɔ bana ekpidi ani baabla ɔsu beebó abi pii.

¹⁸Adila adi asɔ aláda-ma ɔkwɛ na básɔ bátagyunku kaƒiɔtɔ.

¹⁹Mmɔ na báva bákpali Unwoti na lɛbibo kemmo na údie-ma.

²⁰Ɔ́bɔku ɔlɛ ɔmmɔ na ɔ́ba-ma na básɔ bétekpi.

²¹Ɔdi ka bekyuli bamɛni ƒui bágya Unwoti enu, ɔsika ɔ́yɔ-ma na ɔ́bla ala ebendi úte-ma.

²²Ɔlɛka babla enugya akpala bete-nwu. Na bedie lɛlɔyɔ lɛnu bebo ala ebendi ani na ɔ́bla kudu batina kadi ƒui.

²³Badi bábla kabla na lɛkɔlɔ libendi kemmo na ɛpu anumi. Na ɔmmɔ kemmo na bákɛ bana limeyi lɛdila.

²⁴Bánu Unwoti ablala ebendi lidu lidu lɛni na ɔ́bla na ntu bɔmmɔ anumi.

²⁵Ɔsika uudie lɛdi na ntu bɔmmɔ bɔɔnwanɛ lɛlɔ na bɔɔta ku avlɔvɔ bonwu taakɔ katɔ.

²⁶Lɛkɔlɔ lɛmɛni lɛɛkɔ́ avlɔvɔ bonwu amɛni lɛlɔ aani abi bonwu teesie katɔ katɔ. Na lɛɛsɔ taabayu teeduo kalɔ kalɔ aani kɔwɛ kemmo. Na liƒu bonwu lɛni mɔɔda-ma ɔ́ya na báyila bana lɛnunsia biala na ɔgbankpi ɔni kemmo béduo ɔsu.

²⁷Na ɔƒɛƒɛɛ uubó-ma taavinku na baagbánta aani ntɛ bekpine ɔni na bana kɔkwɛ ƒui kɔ́sa.

²⁸Mmɔ na báva bákpali Unwoti na bana lɛbibo kemmo na údie-ma sɔsɔ.

²⁹Na ɔ́ya na ɔƒɛƒɛɛ kpakplaa ɔmmɔ ɔ́da búkpo ɔ́ya na avlɔvɔ ku lɛla biala lɛ́bla buɛɛ.

³⁰Mmɔ ni, lɛlɔ lɛ́yɔ-ma ka lɛla biala lɛ́bla buɛɛ ɔsu. Na ɔ́kpanku-ma úbeduo kalɛlɛkɔ buɛɛ na kesii kani baayɔ́.

³¹Ɔdi ka bekyuli bamɛni ƒui bágya Unwoti enu, ɔsika ɔ́yɔ-ma na ɔ́bla ala ebendi úte-ma.

³²Bɛya na bemwi-nwu na bakɔliku-nwu lɛnyi bonwu lɛmmɔ katɔ na batɔnkune ƒui ku bekyuli ƒui akɔ.

³³Unwoti ɔɔbla na ntukpa bɔɔkwii teenwini kalɔ kakwiidi. Na ɔɔbla na abiɔ aakwii na kalɔ kammɔ kaayaki ntu.

³⁴Na ɔɔbla kalɔ kani mɔɔdia adila lɛnɔ na keenwíni kalɔ kagyani kani mbo mma na kaládia edula. Ɔsika kalɔ kammɔ bekyuli badi bekyuli bekpidi.

³⁵Lɛni kani na Unwoti ɔɔkana na kalɔ kakwiidi keenwíni ntu kalɔ. Na kalɔ kani mɔɔyaki ntu lɛnɔ ɔɔbla na abiɔ aalɛ́ mmɔ.

³⁶Na ɔɔyá na bekyuli bani na kɔka kɔɔda baadá bana kuliekɔ na mmɔ na beelie taakɛ lɛlɔyɔ.

³⁷Na baatuma mmo na baalɛ adingyii na baakɛ́ edula pii na mmɔ.

³⁸Na uute nwuna badi kusɛ kusɛ na baawɔ taasia kama. Na bana bebuo lɛnɔ baláƒana kudii.

³⁹Bekisine baakana na beekpóku Katɔti bekyuli na banya-ma bakya lɛbibo kemmo.

⁴⁰Nsu Unwoti uuti kɔnyi taakya-ma na lɛla lɛni baabla ɔsu. Na ɔɔbɔku-ma taatákya kalɔ kakwiidi kemmo na bakɛ baaví ɔni na baaagyi kesii kani bésela.

⁴¹Nsu bani muubó abi na baayaki ala ni, uudie-ma taalɛku bana lɛbibo kemmo na baasɔ taawɔ teeyile bana kɔduli aani baƒonu kalɛ.

⁴²Na bekyuli babuni ƒui baanu ɔmɛni na ebiti aada-ma. Na balalane ama kɔƒa ndubo-ma bukpo.

⁴³Ukyuli biala na ɔ́da anu ni, use atu na unu etemila amɛni. Na ɔnu ɔti kalɛ na Unwoti ɔɔyɔ́ bekyuli uwi biala.