Read Lelemi Kɔgya 108 Bible Online

Kɔgya 108 - Lelemi bible

Kɔgya 108

¹Mina kayi kélie-mi kalɔ na awɔ ɔsu, O Katɔti, na ndubudie kɔgya ku lɛdi mini mini limwi-ɔ.

²Ndubɔta ɔtanta tutuutu ku mina kayi ƒui na liti ɔbentaa ku agyala ntágyila ɔƒɛ.

³Unwoti, ndubɔgya-a enu na bekyuli ƒui benu. Na ndubudie lɛnu limwi-ɔ na kadi biala bekyuli akɔ.

⁴Unwoti, kalɛ na aayɔ́ bekyuli uwi biala ku kalɛ na aadi ƒula litemi lɛlɔ úbomo geen aani kalɛ na bɔɔnu kalɛ na kayaa kébomo.

⁵O Katɔti, ya na bekyuli ƒui bakɔliku ƒula lɛnyi katɔ besienku ɔgyu kakaaka. Na banu kalɛ na eekeye na kesi kesii na kalɔ lɛlɔ.

⁶Unwoti, awɔ ɔlati ti ƒula kɔdianu na ekpo ete-bu ku ƒula ɔyikun kalɛ na ƒula bekyuli bani na aayɔ́ mmɔ bakɛ bɔƒɔ.

⁷Katɔti úse kenye ɔsiku nwuna kakpakɔ Katɔma kede kemmo ɔnini, “Lɛlɔ lɛɛyɔ́-mi ka lile Sekem ɔma ku Sukot Ɔkwalɛ ɔmmɔ lite mina bekyuli.

⁸Ami mbo Gilead ku Manase. Nda Eƒraim aani mina kagabwa. Na nda Yuda aani mina ɔgagyii.

⁹Na Moab use aani lɛkyami lɛni kemmo na mɔɔƒɔ mina enu. Na Edom lɛlɔ na mɔɔnya lɛgba. Na Ƒilistia na muunye teebo kudu ka lɛ́di lɛlɔ.”

¹⁰Na Ukyuli bamba ɔdi uuubo ɔni ndubɔtɔnku-bu na busie butékpo lɛma linengudi lɛni na bátu awodu kpakplaa bámana mmɔ. Na ɔdi lɛnɔ uuubo na ɔtɔnku-bu na butékpo Edom kalɔ lɛlɔ bekyuli.

¹¹O Katɔti, geen geen na anii éni-bu na aaadubo-bu bɔtɔnku na kekpokɔ na ekpo bula bekisine ete-bu?

¹²Buvele kpo-ma te-bu, ɔsika ukyuli ɔyawine kebunku keeebo kɔsia kɔdi.

¹³Na ɔkɛnku Katɔti lɛlɔ ni, bɔdubɔdi lɛlɔ. Ɔsika anwu ndubɔnya bula bekisine ususu kalɔ.