Read Lelemi Kɔgya 109 Bible Online

Kɔgya 109 - Lelemi bible

Kɔgya 109

¹Katɔti, mɔɔkɔliku-ɔ lɛnyi katɔ, anwuɔsu tetile atu na alakpete-mi.

²Ɔsika balalane ku ɔkɔ banyine báta bénye-mi lɛlɔ. Na baasu ɔkɔ ala na mina lɛlɔ.

³Báda-mi ulu ku bana enyekpi na beekpóku-mi ɔni na ńtabla-ma lɛla lɛdi.

⁴Mɔɔyɔ́-ma ku kaƒɔ nwaa na mɔɔkpali katɔ na bana lili ina ka baláwia-mi kadia.

⁵Na ɔmɛni ƒui kama ni, likpidi na béti bágya-mi enu na lɛbuni lɛni lɛ́bla-ma kenye. Na bukisi lɛnɔ béti básiaku-mi na mina bɔyɔ kenye.

⁶Na baasu muedi banini, “Ya na bekyuli bekpidi badi bada-nwu kenye ka ɔɔbla likpidi. Na bana ɔdi ɔni-nwu uboku litemi katɛkɔ.

⁷Na si bátɛku-nwu litemi ni, na badu-nwu kɔtɔ. Na bedie batina-nwu ka nwuna katɔ bɔkpali bɔdi likpidi.

⁸Bɛya na ukyuli bamba unye nwuna kalabla kenye na nwuna ngba bɔda liku.

⁹Na nwuna bebi benwini bekpinebi na ulekudi lɛnɔ unwini ukpinele.

¹⁰Na nwuna bebi benwini ala bevelene bani mɔɔví teevele ala. Na bagya-ma balɛku atɔnku ani kemmo na béte-ma na bakya kemmo.

¹¹Na bekyuli bani na ɔda kayu ƒui beƒie lɛla biala na ubo baƒɔ. Na baƒɔ bekpeli kabla biala na ɔ́bla úse baƒɔ.

¹²Na ukyuli biala utabla-nwu lɛƒɔndia lɛdi iye ɔdi ɔnu nwuna bebi bani nénwini bekpinebi mmɔ kɔnyana.

¹³Na nwuna kaba kani na údie ƒui bekpi basa. Na ɔdi ɔsɔ utenyimo nwuna lɛnyi na kaba bekyuli bani ndubɔsia kama kemmo.

¹⁴Unwoti unyimo nwuna bati kuuku ekpidi na uteti uni ekpidi utakyiɛ-nwu.

¹⁵Ɔya na beteebo abi uwi ƒui na bana udu ɔyii ƒui na kalɔ kamɛni lɛlɔ. Na ɔdi ɔsɔ uleti-ma lɛlɔ kasusu.

¹⁶“Ɔsika ukyuli ɔmɛni útabla ukyuli ɔdi lɛƒɔndia lɛdi kudii. Mmomu ɔ́bla bawabane ku bani na ala eekpóku kalala úti útédu ka békpi muedi.

¹⁷Ewida etemila sɔɔn nátaalɛ-nwu kenye. Anwuɔsu ewida ammɔ ebo anwu lɛnɔ lɛlɔ. Na ɔɔɔgyi kalɛ na beete ukyuli kusɛ kusɛ. Anwuɔsu kusɛ kusɛ utasiaku anwu lɛnɔ.

¹⁸Bekyuli buwida bɔdi-nwu udu na ɔkya aani awu. Ɔmmɔ ɔsu anwu ɔlati ewida eteekpoku-nwu aani kalɛ na ntu bɔɔƒɔ́ ukyuli adala ƒui. Na uduo-nwu ekubi kemmo aani kalɛ na nnɔmii buuduo ukyuli ɔlɔna kemmo.

¹⁹Na ewida ammɔ enwini enyimi-nwu aani kɔdi kalɛ na ada-nwu aani kabuli kani ndubɔda-nwu kavobi úselaku ƒui.”

²⁰O Unwoti, ya na ala ani ƒui na mina bekisine baawia mɛni ebo-ma lɛlɔ lɛni kani ku bani ƒui mɔɔsu ala ammɔ bene udu na mina lɛlɔ.

²¹Nsu ni, Unwoti Katɔti, ɔkɛnku ƒula lɛnyi kedee ɔsu ni, kpo te-mi, ɔsika aayɔ́ bekyuli uwi biala.

²²Ɔwabane ɔni mɔɔyaki ala uwi biala kemmo na ndi. Na nsɔ liiibo lɛnunsia lɛdi na mina kayi kemmo.

²³Na kalɛ na kɔyu kɔɔyii taakya si kadi kaayu ni, lɛni na ami ukyuli umodi ɔmmɔ mɔɔyii taakya. Na nse aani kebweyi blii kani na ɔƒɛƒɛɛ úbo útáva kɔmadɔ.

²⁴Lílie kɔka laa na mina akɔnkɔ aatɔ́-mi, na mina ɔlɔna ɔ́kwii útálɛ ku ekubi.

²⁵Na si bekyuli bánu-mi na baamá-mi. Na uwi biala na bánu-mi ni, lili kani na baakunku taama.

²⁶O Unwoti, mina Katɔti, bunku-mi na edie-mi ɔkɛnku ƒula bɔyɔ ɔsu.

²⁷Ya na mina bekisine banu bati geen ka awɔ ɔlati néti ƒula enu edie-mi.

²⁸Si ina beewida-mi ni, lɛɛɛdubo bɔkpete. Na si báta bénye-mi lɛlɔ ni, na aya na kɔƒa kukpo-ma. Nsu ya na lɛlɔ lɛyɔ ƒula kabla ɔblane.

²⁹Ya na kɔƒa kukpo mina bekisine, na kɔƒa kɔmmɔ kɔbla aani kɔdi kɔni na benyimi.

³⁰Ndubɔgya Unwoti enu ku kudu. Na ndubo-nwu bumwi na nwuna kadi bekyuli akɔ.

³¹Ɔsika úkpo úte ɔwabane na údie-nwu ɔ́lɛku bekyuli bani nádu-nwu kukpi kɔtɔ enu kemmo.