Read Lelemi Kɔgya 118 Bible Online

Kɔgya 118 - Lelemi bible

Kɔgya 118

¹Bɛgya Unwoti enu, ɔsika ɔdia na ɔɔyɔ́-bu uwi ndi uwi.

²Israel kadi bekyuli ƒui bɛsu bɛnii “Unwoti ɔɔyɔ́-bu uwi ndi uwi.”

³Bɛya na Aaron ku nwuna bakpane kasala basu banini “Unwoti ɔɔyɔ́-bu uwi ndi uwi.”

⁴Na bekyuli bani ƒui mɔɔyia Unwoti basu banini, “Unwoti ɔɔyɔ́-bu uwi ndi uwi.”

⁵Uwi ɔni na ala eekpóku-mi geen ni, lɛ́kpali Unwoti na únu úte-mi na údie-mi na mina lɛbibo kemmo.

⁶Unwoti unyeku-mi, anwuɔsu lɛɛɛdubo bɔyia. Bi na ukyuli ɔdubɔkana-mi bɔbla?

⁷Unwoti unye-mi kama ka ubunku-mi anwuɔsu bekyuli bani muukisi-mi ƒui ni, mɔɔnu-ma aani bekyuli bani lɛlɔ na lɛ́ɛdi.

⁸Ɔdia ka ukyuli ukeli utátamiku Unwoti utulo ka asia ukyuli ɔdi lɛnu.

⁹Ɔdia ka ekeli atátamiku Unwoti utulo ka asia ɔyikune ɔdi lɛnu.

¹⁰Kadi ƒui bekyuli bani muukisi-mi báka bámana-mi nsu lɛ́bɔku-ma ƒui na Unwoti lɛnyi kemmo!

¹¹Báka bámana-mi ƒui na benye lɛƒɛnyi ƒui lɛlɔ, nsu lɛ́bɔku-ma ƒui na Unwoti lɛnyi kemmo.

¹²Báka bámana-mi aani banwɛnwɛ na bana anumi égyie na mina lɛlɔ aani kalɛ na lɛnyɛ ogya ɔɔda. Nsu lɛ́bɔku-ma ƒui na Unwoti lɛnyi kemmo.

¹³Bénye-mi lɛlɔ kpakplaa ɔni na kébu blii na badi-mi lɛlɔ. Nsu Unwoti úbunku-mi.

¹⁴Katɔti mɔɔkya-mi ɔyikun, na nwuna lɛnyi kani ndi mina kekpo ɔnu ɔni muudie. Na anwu kani náƒɔ-mi ngba.

¹⁵Binu lɛlɔyɔ lɛnu lɛni nda na Katɔti bekyuli bani nse siin mmɔ nvo kemmo ka Unwoti ɔ́ya na bádi lɛlɔ ɔsu. Baava banini, “Katɔti kɔnu kɔni mbo ɔyikun geen mmɔ nádi lɛnanabi!

¹⁶Unwoti nédie nwuna kɔnu na ɔ́tina nwuna ɔyikun geen mmɔ na ɔ́di lɛlɔ. Unwoti ɔmmɔ ndi ɔyikune!”

¹⁷Lɛɛɛdubo bukpi, mmomu ndubulie ngba na lɛka Unwoti ablala lɛsu bekyuli.

¹⁸Unwoti ɔ́ni-mi kɔtu kpakplaa, nsu útaya na likpi.

¹⁹Lɛmi ƒula kakpakɔ kayakun kani na áklibi ése éte bekyuli bani nse siin, na lɛsia-ka kemmo liduo mbagya-a enu.

²⁰Aanu Unwoti kakpakɔ ɔban kayakun kani kemmo na bekyuli bani nse siin badubɔsia beduo.

²¹Mɔɔgyá-a enu ka énu-mi bɔkpali na áya na lɛ́di mina bekisine lɛlɔ.

²²Lɛtabi lɛni na batune béni báva ni, ani nébenwini lɛtabi lɛni náƒɔ kuye lítulo na atabi ƒui akɔ.

²³Unwoti nábla lɛla bonwu lɛmɛni. Na lɛ́ƒɔ-bu anu geen.

²⁴Limeyi lɛmɛni na Unwoti údie úte-bu ka bɔdi lɛlɔ. Bɛya bɔkɛ lɛlɔyɔ na ebiti ada-bu na limeyi lɛmmɔ ɔsu.

²⁵Ƒɔ-bu ngba, O Unwoti, buvele bɔda-a! Ya na bula kabla ƒui katɛ kete-bu.

²⁶Bimwi anwu ɔni ndubo na Unwoti lɛnyi kemmo. Kusɛ kusɛ ɔsiaku-ɔ ɔsiku Unwoti kakpakɔ mɛni.

²⁷Unwoti ndi Katɔti ɔni náya na bula anumi ékeye ka bɔ́di lɛlɔ. Bɛƒɛ kugyii kɔgba ku evete bɛda na bɛkɛ lisu ku ɔbu na bɛka bɛmana lɛkpabi lɛmmɔ bitédu kesii kani nse kedee mmɔ.

²⁸Awɔ ndi mina Katɔti na ndubɔgya-a enu. Na ndubɔkɔliku-ɔ lɛnyi katɔ, ɔsika awɔ ndi mina Katɔti.

²⁹Bɛgya Unwoti enu, ɔsika ɔdia na ɔɔyɔ́-bu uwi ndi uwi.