Read Lelemi Kɔgya 119 Bible Online

Kɔgya 119 - Lelemi bible

Kɔgya 119

¹Lɛlɔ lɛdubɔyɔ bekyuli bani na likpidi bɔbla buuubo-ma keliela kemmo. Mmomu beelie ngba na Unwoti ɔda bubo kenye.

²Na lɛlɔ lɛdubɔyɔ bani ƒui mɔɔsia nwuna ɔda bubo anu na baadi-mu lɛlɔ ku bana kayi ƒui.

³Na balábla likpidi lɛdi, mmomu baasia Unwoti kama uwi biala.

⁴Unwoti, awɔ néti ƒula ɔda bubo éte-bu na ásu-bu ka bɔdi-mu lɛlɔ kaduɛ.

⁵Mɔɔwia kpakplaa geen ka lɛdi ƒula ɔda bubo lɛlɔ kaduɛ.

⁶Na si lɛ́kana na lɛ́di ƒula ɔda bubo lɛlɔ ƒui kaduɛ ni, kɔƒa kulékpo-mi.

⁷Ndubɔtɛya kalɛ na ƒula litemi lɛɛnu ala kemmo siin. Na limwi-ɔ ku kayi kani nse sɛɛn.

⁸Ndubɔdi ƒula ɔda bubo lɛlɔ geen na lɛɛɛdubo-mu kama bɔlɛ kudii.

⁹Na ulu ɔmani lɛlɔ na okloƒu ɔdi ɔdubɔkana na ɔsia na ɔda nwuna ngba sɛɛn? Amu ntu ƒula ɔda bubo lɛlɔ bɔdi kani.

¹⁰Mɔɔkya ɔkplu ka liti mina ɔyikun ƒui lɛbla ƒula kabla. Anwuɔsu gyumana-mi kalɛ na neeenwini kama naaakya ƒula ɔda bubo kudii.

¹¹Lɛ́klibi ƒula litemi lɛ́kya mina kayi kemmo kalɛ na naaabla likpidi lɛdi naaaƒiɔ-ɔ.

¹²Unwoti, muumwi ƒula lɛnyi. Tina-mi ƒula ɔda bubo.

¹³Na ɔda bubo bɔni na éte-bu ni, ndubɔkɔ-mu lɛsa lite bekyuli ƒui.

¹⁴Na ndubɔsia ƒula ɔda bubo kama ku ebiti litulo kalɛ na ukyuli ɔɔsiaku lɛkɛ bonwu kama ku ebiti.

¹⁵Ndubo-mu kemmo buteeduo, na mina anumi adubɔsia-mu lɛlɔ uwi biala.

¹⁶Lɛlɔ lɛdubo-mi butaayɔ na ɔda bubo bɔmɛni lɛlɔ. Na lɛɛɛdubo ƒula etemila amɛni bɔyiƒala kudii.

¹⁷Da-mi kɔkɔɔkɔ ƒula kabla ɔblane kalɛ na lɛdi ƒula ɔda bubo lɛlɔ kaduɛ.

¹⁸Ya na mina anumi ebimi na lɛnu etemila geen ani nkya ƒula ɔda bubo bɔmmɔ kemmo lɛti.

¹⁹Ɔƒɔ na ndi na ntebo kayawi bulie gyɔlɔɔ. Ɔmɛni ɔsu tabɛla-mi ƒula ɔda bubo.

²⁰Mina kayi kaada ogya uwi biala ka mɔɔwia lɛti ƒula ɔda bubo ɔsu.

²¹Aadɔnku bekyuli bekpidi bani naaadaku ƒula ɔda bubo lɛda. Na ewida aasiaku bekyuli bani naaadi ƒula ɔda bubo lɛlɔ.

²²Da-mi die bana kavinkɔ kalɛ na beléteedumi-mi na bataakya-mi lɛlɔ lɛma. Ɔsika nsia ƒula ɔda bubo anu uwi biala.

²³Ina ka bagadine baasa lili na mina lɛlɔ ni, lɛɛɛdubo ƒula etemila kemmo buduo bɔda bɔya.

²⁴Ƒula ala ani na aatina-mi mɔɔyɔ́-mi kaƒɔ. Na anya mɔɔlɛ-mi lɛnɔ.

²⁵Aanu kalɛ na líbuli ntɛ kalɔ ɔtumu akɔ na nsɔ liiibo ngba geen bɔdi. Ya na ƒula litemi lɛsɔku-mi liboku ngba.

²⁶Ka lídie mina alaekpidi kalɔ ni, ánu-mi kɔnyana. Anwuɔsu tina-mi ƒula ulu.

²⁷Na aya na linu ƒula ɔda bubo bɔmmɔ kalɔ. Na ndubuduo kasusu kemmo ɔ́si ala ani na átina-mi lɛlɔ.

²⁸Líduo kɔnyana geen. Kya-mi ɔkplu aani kalɛ na ásu-mi ése kpakplaa ka adubɔbla.

²⁹Na ada-mi kɔkɔɔkɔ kalɛ na naaasia ulu ukpidi ɔdi lɛlɔ. Bla-mi lɛƒɔndia na atina-mi ƒula ɔda bubo bɔmmɔ.

³⁰Lɛ́ƒuna ka lɛdi ƒula ɔda bubo lɛlɔ. Na ɔmmɔ ntɔ-mi anumi na mɔɔnu.

³¹Mina Unwoti, ƒula ala ani na átina-mi kama na nsia kpakplaa. Ɔmmɔ ɔsu taya na kɔƒa kukpo-mi.

³²Ndubugyele anumi lɛsia ƒula ɔda bubo kama, ɔsika adubɔya na linu ala kalɔ libu.

³³Anwuɔsu ni, Unwoti, tina-mi ƒula ɔda bubo bɔmmɔ. Na ndubɔdi-mu lɛlɔ uwi biala.

³⁴Die-mu kalɔ te-mi na lɛsiaku-mu kama. Na madi-mu lɛlɔ lɛnɔ ku mina kayi ƒui.

³⁵Tɔnku-mi siaku ɔda bubo bɔmmɔ lɛlɔ. Ɔsika amu ndubɔya na lɛkɛ ebiti.

³⁶Ya na ƒula ɔda bubo lɛlɔ bɔdi butaada-mi ɔkwɛ teetulo kalɛ na lɛkɛ lɛkɛ.

³⁷Da-mi na lɛda atu lidie ala keeke ani neeebo kɔsia kɔdi lɛlɔ. Na aya na lilie ngba lɛsiaku ƒula ulu lɛlɔ.

³⁸Muuvele nnii di ƒula linyese lɛlɔ te-mi aani kalɛ na aabla teete ƒula kabla ɔblane biala ɔni mɔɔbu-ɔ ku bɔyia.

³⁹Taya na mina bekisine bakɛ-mi bedumi ku bana enyekpi. Ɔsika adubɔtɛ ami ku-ma litemi na ulu lɛlɔ.

⁴⁰Mɔɔwia kpakplaa ka lɛdi ƒula ɔda bubo lɛlɔ. Anwuɔsu ya-mi na lilie ngba bɔwɔdi ɔkɛnku kalɛ na ese siin lɛlɔ.

⁴¹O Unwoti, tina-mi ka aayɔ́-mi geen uwi biala. Na aƒɔ-mi aani kalɛ na ése-mi kenye.

⁴²Na lɛkɛ lɛla lɛdi lɛsu bekyuli bani mɔɔtu-mi akpɛlɛ. Ɔsika ƒula litemi lɛlɔ kani na mina anu asia.

⁴³Ya na ntaatɛmi ƒula etemila geen uwi biala. Ɔsika ƒula litemi bɔtɛ kani na nnye mɔɔnu ulu teete.

⁴⁴Na ndubɔdi ƒula ɔda bubo lɛlɔ úsela uwi ƒui.

⁴⁵Na ndubulie ku kayi ƒaa, ɔsika mɔɔkya ɔkplu ka lɛdi ƒula ɔda bubo lɛlɔ kaduɛ.

⁴⁶Ndubunye baga anumi na lidie ƒula ɔda bubo keyi lɛtina-ma na kɔƒa kulékpo-mi.

⁴⁷Ɔsika mɔɔyɔ́ ƒula litemi na si mɔɔdi-ni lɛlɔ ni, lɛlɔ lɛɛyɔ́-mi.

⁴⁸Mɔɔyɔ́ ƒula ɔda bubo na mɔɔbu-mu lɛnɔ. Na ndubuduo ƒula ala ani na ɔda bubo bɔmmɔ bɔɔtina-mi kemmo uwi biala.

⁴⁹Tayiƒala ƒula kenye kani na ásu ami ƒula kabla ɔblane ése, ɔsika kana lɛlɔ na mbo lɛnunsia.

⁵⁰Na ɔmmɔ ɔɔsia-mi kɔnu si ina lɛla lɛdi liikpóku-mi. Ɔsika ƒula linyese lɛmmɔ lɛɛsɔku-mi ngba taabla ɔwɔdi.

⁵¹Bekyuli bani na baláyia-a beenye teedumi-mi. Nsu ɔmmɔ útaya-mi na linwini na ƒula ulu lɛlɔ.

⁵²Unwoti, si línyimo kalɛ na aatɛ etemila ɔ́si kukuuku ƒui ni, na mina kayi keelie kalɔ.

⁵³Livo geen liiƒí-mi si mɔɔnu kalɛ na belikplune baládi ƒula ɔda bubo lɛlɔ.

⁵⁴Na uwi klukui ɔni na líbo ngba bulie mɛni kemmo ni, lɛ́nwi lɛnu lɛ́siku ƒula ɔda bubo etemila lɛlɔ.

⁵⁵Unwoti, muunyimo-ɔ usien. Na muuduo mina kasusu kemmo taanu ɔ́siku ƒula etemila lɛlɔ.

⁵⁶Na ebiti aada-mi si mɔɔdi ƒula ɔda bubo lɛlɔ.

⁵⁷Unwoti, awɔ ndi mina kese. Na mɔɔsu kpakplaa ka ndubɔdi ƒula litemi lɛlɔ.

⁵⁸Na muuvele-ɔ ku mina kayi ƒui ka abla ƒula linyese lɛlɔ ete-mi na abla-mi lɛƒɔndia.

⁵⁹Líduo mina ngba kemmo lɛ́nu laa na lɛ́lɛ ugyii ka ndubɔsiaku ƒula ala ani na aatina-mi kama.

⁶⁰Nsɔ naaakpɛ kama, mmomu ndubɔbabla na lɛdi ƒula etemila lɛlɔ.

⁶¹Bekisine baakywɛ-mi kɔkpagyuɛ nsu lɛɛɛdubo ƒula ɔda bubo bɔyiƒala kudii.

⁶²Usientɛ muedi mɔɔta teemwi-ɔ, ɔsika aatɛ litemi ulu siin lɛlɔ.

⁶³Na bekyuli bani na baabu-ɔ na baadi ƒula ɔda bubo lɛlɔ ni, ama na mɔɔdiku kɔkpana.

⁶⁴Unwoti, aayɔ́ kayawi bekyuli ƒui ku kaƒɔ nwaa uwi biala kemmo. Tina-mi ƒula ɔda bubo.

⁶⁵O Unwoti, ádi ƒula litemi lɛlɔ na ábla ami ƒula kabla ɔblane lɛƒɔndia.

⁶⁶Ya-mi na lɛda anu na lɛti lɛla, ɔsika ƒula ɔda bubo lɛlɔ kani na líkpo kama.

⁶⁷Lídeyi ƒula ɔda bubo ulu lɛlɔ, anwuɔsu na áni-mi kɔtu. Na ɔƒaani ni, nda ƒula ɔda bubo bɔmmɔ kpakplaa.

⁶⁸Awɔ ndi Unwoti buni na aabla lɛƒɔndia uwi biala. Tina-mi ƒula ɔda bubo.

⁶⁹Bekyuli bani mɔɔtina lɛlɔ bakɛ baasu ɔkɔ etemila na mina lɛlɔ taavi. Nsu ami líti mina kayi ƒui mɔɔdi ƒula etemila lɛlɔ.

⁷⁰Bana kasusu kaalɛɛ aani ebuo lɛmwi na belenu lɛla lɛdi kalɔ. Nsu ami ni, lɛlɔ lɛɛyɔ́-mi geen na ƒula ɔda bubo lɛlɔ.

⁷¹Na kɔtu kɔni na áni-mi ɔ́ya na lili lɛ́dia-mi geen, ɔsika ɔ́ya na muuduo ƒula etemila kemmo kaduɛ.

⁷²Na ƒula ɔda bubo bubo-mi kɔsia utulo lɛla biala ku sika ugyiedi ku ɔƒualadi ƒui.

⁷³Awɔ néti ƒula enu ávɔ-mi na ada-mi lɛnɔ. Ya na nteenu ala kalɔ na lɛtɛya ƒula ɔda bubo bɔmmɔ kaduɛ.

⁷⁴Na bekyuli bani ƒui mɔɔbu-ɔ ni, lɛlɔ lɛdubɔyɔ-ma si bánu-mi. Ɔsika ƒula ɔda bubo lɛlɔ kani na mina ánu asia.

⁷⁵Ngyi ka ƒula litemi bɔtɛ buse siin. Na ɔkɛnku kalɛ na asia ƒula litemi kama ɔsu na áni-mi kɔtu.

⁷⁶Ya na mina kayi kabla buɛɛ na kalɛ na aayɔ́-mi ɔsu, aani kalɛ na ásu ami ƒula kabla ɔblane ése.

⁷⁷Nu-mi kɔnyana na aya na lilie ngba. Ɔsika ƒula ɔda bubo bɔ́ya na mɔɔkɛ lɛlɔyɔ geen.

⁷⁸Na bekyuli bani ƒui na balábu-ɔ ni, ya na kɔƒa kukpo-ma. Ama mɔɔtina lɛlɔ na baadá-mi kenye keeke. Na ami amu ni, mina kasusu kadubo butaasia ƒula ɔda bubo lɛlɔ.

⁷⁹Na bekyuli bani mɔɔyia-a na baabu-ɔ ni, bana anu enwini asia-mi lɛlɔ ku ama bani mɔɔdi ƒula etemila lɛlɔ.

⁸⁰Ya na mina kayi kasia ulu siin lɛlɔ na ntasia ƒula litemi kama kalɛ na kɔƒa kulékpo-mi.

⁸¹Nnye mɔɔnu ulu taanɔ kpakplaa ka ebo abaƒɔ-mi, nsu mina anu asia ƒula litemi lɛlɔ.

⁸²Mina anumi ákpa atu na nnye mɔɔnu ulu lite ƒula linyese. Na ɔmmɔ ɔsu na líye muedi nnini, “Uwi ɔmani na adubo-mi kɔnu bɔsia?”

⁸³Mina ngba bɔɔyii udu aani ntɛ lɛbo lɛni na liyɔda líƒie. Ina amu ni, nnye mɔɔnu ulu na ńtayiƒala ƒula ɔda bubo.

⁸⁴Uwi ɛlɛ na ndubunye ntaanu ulu ntédu. Na lɛmameyi na adubɔtɛku bekyuli bani muukpóku-mi litemi na ani-ma kɔtu?

⁸⁵Bekyuli bani mɔɔtina lɛlɔ na baládi ƒula etemila lɛlɔ benye beekú-mi kalɔ uwi biala taakywɛ-mi kɔkpagyuɛ.

⁸⁶Ƒula ɔda bubo etemila ƒui adi ani lɛlɔ na ukyuli ukpo kama. Anwuɔsu bunku-mi na ɔkɔ banyine bani muukpóku-mi keeke ɔsu.

⁸⁷Benye-mi lɛlɔ kpakplaa na kébu blii kani na badu-mi. Nsu ɔmɛni ƒui kama ńtenwini kama ńtakya ƒula ɔda bubo.

⁸⁸Ɔkɛnku ƒula bɔyɔ bɔni naaayii udu ɔsu ni, ƒɔ-mi ngba na lilie ntaadi ƒula ɔda bubo lɛlɔ.

⁸⁹Unwoti, ƒula litemi lɛdi litemi geen lɛni nnye kpakplaa na Katɔ Ɔga Ɔma uwi ƒui.

⁹⁰Na aadi ƒula litemi lɛlɔ siin teete kaba bekyuli ƒui. Édie kayawi na kenye kana kenyekɔ kpakplaa.

⁹¹Ƒula ala ediedi ƒui akya ábalɛ ku ɔmwi limeyi, ɔsika ana ƒui aabla ƒula kabla.

⁹²Na si ɔɔɔdi ɔni na ƒula ɔda bubo bɔdi mina lɛlɔyɔ ɔsu ni, nka lɛ́ɛyii udu na kalɛ na mina ala eekpóku-mi ɔsu.

⁹³Lɛɛɛdubo ƒula ɔda bubo bɔda bɔnyonu kudii, ɔsika ɔkɛnku-mu lɛlɔ na éti ada-mi na mmu nli ngba.

⁹⁴Ƒɔ-mi ngba, ɔsika awɔdi na ndi na mɔɔsia ƒula ɔda bubo kama uwi biala.

⁹⁵Belikplune benye baatú-mi uwi biala ka bebile-mi ngba. Nsu ƒula etemila lɛlɔ kani na mɔɔbla mina kasusu uwi biala.

⁹⁶Na lɛ́nu ka lɛla biala ina dɛ na lɛɛdia bɔnu ni, libo kawɔlɔkɔ. Nsu ƒula litemi ani lise lísela ƒui na liiibo kawɔlɔkɔ.

⁹⁷Nu kalɛ sɔɔn na mɔɔyɔ́ ƒula litemi. Na mɔɔbla kasusu taasiku-ni lɛlɔ uwi biala.

⁹⁸Ƒula ɔda bubo nkɛnku-mi uwi biala na bɔɔyá na mɔɔdá anu teetulo mina bekisine.

⁹⁹Na muunú-mu kalɔ teetulo bani mɔɔtina-mi ala ammɔ muedi. Ɔsika muuduo-mu kemmo uwi biala.

¹⁰⁰Na ngyi enengula ntulo benengu geen bammɔ alati, ɔsika nda ƒula ɔda bubo bɔmmɔ geen.

¹⁰¹Na muunwíni na ekpidi lilu biala kama kalɛ na liti ƒula etemila lɛda.

¹⁰²Na ala ani na ényimi ni, naaada-nya taava ɔƒɛnyi, ɔsika lɛni na átina-mi na ɔda bubo bɔmmɔ kemmo.

¹⁰³Ƒula etemila aayu-mi geen teetulo kalɛ na uwɔ ɔɔyu kenye emini.

¹⁰⁴Ɔkɛnku ƒula ɔda bubo lɛlɔ ɔsu na mina kasusu kese nwaa. Na ɔmmɔ ɔsu na nkisi likpidi ulu biala.

¹⁰⁵Ƒula litemi lɛdi asogya ute mina lɛgba. Na uukeye teewi mina kasiakɔ.

¹⁰⁶Líse kenye na lɛ́su ka ndubɔdi ƒula ɔda bubo bɔni nse siin lɛlɔ ƒui.

¹⁰⁷Ala benye eekpóku-mi kpakplaa, anwuɔsu die-mi O Unwoti, ɔkɛnku ƒula linyese lɛlɔ.

¹⁰⁸Unwoti, ƒɔ mina enu ani na mɔɔgyá-a ku mina kayi ƒui na atina-mi ƒula ɔda bubo.

¹⁰⁹Mina ngba bɔtu ugyii kenye uwi biala na bekisine bammɔ ɔsu. Nsu naaayiƒala ƒula ɔda bubo bɔmmɔ.

¹¹⁰Belikplune bákywɛ-mi kakpagyuɛ. Nsu ńtedeyi ƒula ɔda bubo lɛlɔ.

¹¹¹Ƒula ɔda bubo bɔɔyɔ́-mi kaƒɔ na bɔdi mina kese uwi ƒui.

¹¹²Lɛ́lɛ ugyii ku mina kaƒɔ nwaa ka ndubɔbla lɛsiaku ƒula ɔda bubo lɛlɔ uwi ƒui utédu kawɔlɔkɔ.

¹¹³Na bekyuli bani na bana kasusu kese inyɔ inyɔ na ƒula lɛlɔ ni, nkisi-ma. Na ami ni, mɔɔyɔ́ ƒula ɔda bubo.

¹¹⁴Awɔ ndi mina katamikukɔ ku ukyuli ɔni na ɔɔgyumana-mi. Na ƒula linyese lɛlɔ kani na mbo lɛnunsia.

¹¹⁵Bɛgyu lɛgba bɛtɔlɔ-mi kudɔ amii alaekpidi bablane. Mina Katɔti ɔda bubo lɛlɔ kani na ndubɔdi.

¹¹⁶Da-mi kɔkɔɔkɔ ɔkɛnku ƒula linyese lɛlɔ na lilie ngba. Na taya na kɔƒa kukpo-mi na mina lɛnunsia ƒui kama!

¹¹⁷Da-mi, na makɛ bɔƒɔ! Na ntaadi ƒula ɔda bubo lɛlɔ uwi biala kemmo.

¹¹⁸Awɔ muuní bekyuli bani ƒui na baládi ƒula ɔda bubo lɛlɔ. Na bana ɔkɔ ala bɔbla ƒui bɔdi kɔkwɛ kukpludi kɔni neeebo kɔsia.

¹¹⁹Na belikplune bammɔ ni, aanu-ma aani kebu alakpi. Na ɔmmɔ ɔsu na ami mɔɔyɔ́ ƒula ɔda bubo.

¹²⁰Ɔsika mɔɔyia-a. Na mɔɔyia kalɛ na aatɛ litemi taasiaku.

¹²¹Lɛ́bla lɛla lɛni ndia na lɛdi ulu lɛlɔ lɛnɔ. Anwuɔsu tanyonu-mi ete mina bekisine.

¹²²Su-mi se kpakplaa ka adubo-mi bubunku aani ƒula kabla ɔblane kalɛ. Na taya na bekyuli bani mɔɔtina lɛlɔ banya-mi bakya.

¹²³Bɔkpa na mina anumi ada ɔni na nnye mɔɔnu ulu ka abaƒɔ-mi ngba, na ƒula linyese lɛnɔ libo-nwu kemmo.

¹²⁴Da-mi kɔkɔɔkɔ aani ƒula kabla ɔblane ɔkɛnku kalɛ na aayɔ́-mi uwi ƒui ɔsu, na atina-mi ƒula ɔda bubo.

¹²⁵Ƒula kabla ɔblane na ndi, ya na nteenu ala kalɔ na lɛti ƒula ɔda bubo.

¹²⁶Unwoti, uwi údu ka abla lɛla lɛdi ɔsi kalɛ na bekyuli baládi ƒula ɔda bubo lɛlɔ ɔsu.

¹²⁷Ami mɔɔyɔ́ ƒula ɔda bubo teetulo sika ugyiedi.

¹²⁸Ɔmmɔ ɔsu nkɛnku ƒula litemi lɛlɔ na mɔɔnu mina kanyakɔ, na naaayɔ ka lɛsia ulu ukpidi ɔdi lɛlɔ.

¹²⁹Ƒula ɔda bubo ƒui bɔdia kaduɛ ɔmɔ ɔsu na mina kɔyu lɛnɔ kunye-mu lɛlɔ geen.

¹³⁰Ala ani kalɔ na ƒula etemila eedie adi bukeye, na ɔɔyá na bekyuli bani naaagyi lɛla lɛdi baadá anu.

¹³¹Líbimi kenye líwi aani ukyuli ɔni na ɔƒɛ ɔɔdá-nwu na kalɛ mɔɔwia ƒula litemi ɔsu.

¹³²Nwini nu-mi na abla-mi lɛƒɔndia aani kalɛ na aabla teete bekyuli bani mɔɔyɔ́-ɔ.

¹³³Da-mi kalɛ na neeebuli aani kalɛ na ásu ése. Na taya na likpidi lɛdi-mi lɛlɔ.

¹³⁴Die-mi na bekyuli bani mɔɔnyá-mi taakya enu kemmo, na lɛkana ƒula ɔda bubo lɛlɔ bɔdi.

¹³⁵Die ƒula bɔyɔ tina ami ƒula kabla ɔblane. Na atina-mi ƒula ɔda bubo.

¹³⁶Naaada buwulo taaya uwi ɔdi na ɔni na bekyuli baládi ƒula ɔda bubo lɛlɔ ɔsu.

¹³⁷Unwoti, awɔ nse siin na aatɛ litemi ulu lɛlɔ.

¹³⁸Na ƒula ɔda bubo bɔni na éte lɛnɔ bɔdi ulu na buse siin.

¹³⁹Anumi eegyie-mi, ɔsika mina bekisine baládi ƒula ɔda bubo lɛlɔ.

¹⁴⁰Ami ƒula kabla ɔblane líduo ƒula linyese kemmo na lɛ́kɔku-mu lɛ́nu na mɔɔyɔ́-mu geen.

¹⁴¹Ndi ukyuli ɔni neeebo kenyekɔ kadi. Béni-mi bése, nsu ƒula ɔda bubo amu naaada-mu teese.

¹⁴²Kalɛ na aabla ala ulu lɛlɔ use siin úsela ƒui. Na ƒula ɔda bubo bɔdi litemi geen lɛmmɔ uwi ƒui.

¹⁴³Bukpoku ku bɔnɔ bɔ́ƒɔ-mi lɛlɔ ƒui. Nsu ƒula ɔda bubo bɔɔyá na mɔɔkɛ́ lɛlɔyɔ.

¹⁴⁴Ƒula etemila ese siin uwi biala. Ya-mi na nteenu ala kalɔ na melie ngba.

¹⁴⁵Unwoti, nu-mi bɔkpali, ɔsika mina kayi kemmo ɔkwalɛ ƒui na muuwulo taasiku. Ndubɔdi ƒula ɔda bubo lɛlɔ.

¹⁴⁶Awɔ na muuwulo taakpali! Ƒɔ-mi kalɛ na makana ƒula ɔda bubo lɛlɔ bɔdi.

¹⁴⁷Mɔɔta ɔtanta tutuutu asa na ɔƒɛ ɔɔtu. Na muuwulo teevele-ɔ nnii bunku-mi, ɔsika ƒula litemi lɛlɔ na mina anu asia.

¹⁴⁸Mina anumi ewi aanu nwaa usien umodi na muuti kasusu na ƒula etemila lɛlɔ.

¹⁴⁹Nu-mi bɔkpali, ɔsika aayɔ́-mi uwi biala. O Unwoti, da-mi ngba kɔkɔɔkɔ, ɔsika asia ƒula litemi kama

¹⁵⁰Bekyuli bani muukpóku-mi baaní teede-mi ku bana kasusu kekpidi. Na bágyunku ƒula ɔda bubo bɔmmɔ.

¹⁵¹Nsu ni, Unwoti, awɔ ede-mi. Na ƒula ɔda bubo ƒui bɔdi etemila geen.

¹⁵²Ɔ́si kukuuku ni, ngyi ƒula etemila ka awɔ nése-nya ése éte uwi ƒui.

¹⁵³Nu kalɛ na muubó abi na edie-mi. Ɔsika naaayiƒala ƒula ɔda bubo.

¹⁵⁴Kpo na edie-mi kenye, na aƒɔ ete-mi aani kalɛ na ásu ése.

¹⁵⁵Belikplune beeebo bɔƒɔ bɔdi. Bɔ́gyunku-ma geen. Ɔsika baláwia ka badi ƒula ɔda bubo lɛlɔ uwi ɔdi.

¹⁵⁶Kɔnyana kɔni na aanu-bu kúbomo O Unwoti. Na ka asia ƒula litemi kama ɔsu ni, te-mi ngba.

¹⁵⁷Mina bekisine ku bekyuli bani muukpóku-mi bemomo. Nsu neeedeyi ƒula ɔda bubo bɔmmɔ lɛlɔ.

¹⁵⁸Na bekyuli bani naaadi ƒula ɔda bubo lɛlɔ ni, bana lɛlɔ liiƒí-mi livo.

¹⁵⁹Kali nu kalɛ na mɔɔyɔ́ ƒula ɔda bubo. Na ada-mi ngba kɔkɔɔkɔ, ɔsika aayɔ́-mi uwi biala.

¹⁶⁰Ƒula ɔda bubo bɔdi litemi geen lɛni nse siin na bunye bute uwi ƒui.

¹⁶¹Bagadine benye beekpóku-mi uwi biala keeke. Nsu ami ni, ƒula litemi bɔtɛ kani na mɔɔbu taanu mina kayi kemmo.

¹⁶²Lɛlɔ lɛɛyɔ́-mi na ƒula etemila lɛlɔ aani ukyuli ɔni na ɔ́kɛ lɛkɛ libendi lɛdi.

¹⁶³Nkisi na líni ɔkɔ ala bɔbla. Nsu mɔɔyɔ́ ƒula ɔda bubo.

¹⁶⁴Maatɛ sɔɔn na mɔɔkpali-ɔ teemwi na limeyi linwi kemmo na ƒula ɔda bubo bɔni nse siin ɔsu.

¹⁶⁵Na bekyuli bani ƒui mɔɔyɔ́ ƒula ɔda bubo ni, baakɛ́ keyi buɛɛ. Na lɛla lɛdi lɛɛɛdubo bɔya na bagbanta.

¹⁶⁶Unwoti, mina anu asia ka aƒɔ-mi, na mɔɔdi ƒula etemila lɛlɔ.

¹⁶⁷Mina kɔyu kɔda ƒula ɔda bubo bɔni na éte-mi, ɔsika mɔɔyɔ́-mu teetulo lɛla biala.

¹⁶⁸Mɔɔdi ƒula ɔda bubo ku etemila ƒui lɛlɔ, ɔsika mina kasiakɔ ƒui ni, awɔ Unwoti agyi-mu.

¹⁶⁹Unwoti, ya na mina keku kedu-ɔ kudɔ. Na aya na nteenu ala kalɔ ɔkɛnku ƒula litemi lɛlɔ!

¹⁷⁰Na aya na mina kɔtɔ bukpi budu-ɔ kudɔ. Na edie-mi ɔkɛnku ƒula litemi lɛlɔ.

¹⁷¹Ndubo mina kenye bubimi na limwi-ɔ, ka awɔ nátina-mi ƒula ɔda bubo ɔsu.

¹⁷²Na ndububimi kenye na lidie ɔnu na lɛka ƒula litemi ku ɔda bubo ƒui lɛtina ka bɔdia.

¹⁷³Tani tesie kama, mmomu die ƒula kɔnu na ebunku-mi, ɔsika ƒula ɔda bubo na lɛ́ƒuna.

¹⁷⁴Unwoti, nnye ngya-a ka abáƒɔ-mi. Ɔsika ƒula ɔda bubo mɔɔyɔ́-mi kaƒɔ.

¹⁷⁵Ya na lilie ngba na memwi-ɔ. Na aya na ƒula ɔda bubo bubunku-mi.

¹⁷⁶Lɛ́yii ulu aani koƒonu kɔni náyii. Wia-mi ƒula kabla ɔblane kama ulu, ɔsika ntayiƒala ƒula ɔda bubo.