Read Lelemi Kɔgya 135 Bible Online

Kɔgya 135 - Lelemi bible

Kɔgya 135

¹Bɛya na bumwi Unwoti. Amii Unwoti kabla bablane ƒui, bimwi Blɔti! Bɛkɔliku-nwu lɛnyi katɔ na bimwi-nwu lɛnyi kedee.

²Amii bani muuduo nwuna ɔtɔ kemmo ku bani muunye nwuna kaduli ƒui.

³Bimwi Unwoti, ɔsika ɔdia. Bidie lɛnu bimwi-nwu lɛnyi, ɔsika ubo lɛƒɔndia.

⁴Unwoti Katɔti ɔlati náƒuna Yakob úte lɛlɔ. Na ɔ́ƒuna Israel kadi ka babla nwuna bekyuli.

⁵Na ngyi ka bula Unwoti úbomo na ɔ́ƒɔ lɛnyi útulo kalɔ benwoti bamba ƒui.

⁶Lɛla lɛni mɔɔyɔ́-nwu kaƒɔ ni, ani na Unwoti Katɔti ɔɔbla na katɔ mmɔ ku kalɔ lɛlɔ ku ɛpu kemmo ku kalɔ kemmo ƒui.

⁷Ɔɔyá na liƒlukutu lɛɛsí kalɔ ekpo ƒui taakɔ katɔ. Na ɔɔyá na katɔ kaabwɛ ogya na ɔnantu ɔɔna. Na ɔƒɛƒɛɛ ɔɔsí kesii kani na ɔ́bala-nwu ɔ́kya na uubo teebekpo.

⁸Anwu naya na Egyipte bebi bedeedi bani na bekyuli ku bebuo ƒui báwɔ ƒui békpi.

⁹Anwu nábla akɔla ala budie taatina lidu lidu ku ala bamba na bɛ́nu na Egyipte na Ɔga Ƒarao ku nwuna kabla bablane ƒui anumi.

¹⁰Na ɔ́yila kadi bamba bekyuli pii bani náƒɔ kuye ku baga benengudi udu.

¹¹Ama badi ndi Amoriƒuɔ ɔga ɔni baalɔ Sihon ku Basan ɔga ɔni baalɔ Og ku Kanaanƒuɔ baga ƒui. Ɔ́yila-ma udu.

¹²Na bana kalɔ kénwini Israelƒuɔ bani na ɔ́ƒuna úte lɛlɔ kadi.

¹³O Unwoti, ƒula lɛnyi liláyi kudii. Na kadi ƒui bekyuli badubo butaakali ƒula ala ani na ábla uwi biala.

¹⁴Ɔsika Unwoti ɔdubɔtɛku nwuna bekyuli litemi. Na ka bekyuli baakywí-nwu kaƒɔ ɔsu ni, ɔdubɔƒɔ-ma ngba.

¹⁵Ala ani na kadi bamba bekyuli baakpá ni, adi ala ani béti sika ugyiedi ku ɔƒualadi bávɔ na ammɔ ƒui adi bekyuli enu kabla.

¹⁶Bávɔ-nya na ebo kenye, nsu belétemi. Na bebo anumi, nsu balánu.

¹⁷Bebo atu, nsu belenu, na balánwuna lɛnɔ.

¹⁸Na bekyuli bani návɔ ala ammɔ udu bélieku ala ani na bávɔ mmɔ pɛpɛɛpɛ. Na lɛni kani na bani néti bana anu basia-nya na báƒɔ-nya bádi mmɔ lɛnɔ bese.

¹⁹O Israel kɔduli bekyuli ƒui, bimwi Unwoti! Na amii Aaron kaduli bekyuli ƒui lɛnɔ, bimwi Unwoti!

²⁰Lewi kaduli bekyuli ƒui, bimwi Unwoti. Na amii bani ƒui mɔɔyia Unwoti, bimwi-nwu!

²¹Bimwi Unwoti ɔ́siku Sion. Na bimwi-nwu amii bani nkya Yerusalem kesii kani ndi Unwoti keliekɔ. Bɛya na bumwi Unwoti.