Read Lelemi Kɔgya 147 Bible Online

Kɔgya 147 - Lelemi bible

Kɔgya 147

¹Bɛya na bumwi Unwoti! Ɔsika ɔdia ka bumwi bula Katɔti. Ɔdi lɛla lɛbuni, na ɔ́manku lɛnɔ.

²Unwoti Katɔti ɔ́sɔku Yerusalem ɔ́tu, na ɔ́sala bani na béƒie bátɔlɔku ƒui ɔ́sɔku-ma úboku ɔma.

³Bani na bana enu áƒɛ ni, ɔ́ya na bákɛ lɛnunsia lɛwɔdi. Na ɔ́mana-ma alɛbi ƒui na ása.

⁴Ɔgyi ayabi ani ƒui na udie kalɛ na emomo. Na ubo ɔ́di biala ku nwuna lɛnyi.

⁵Bula Unwoti Katɔti úbomo na ubo ɔyikun geen. Nwuna lɛnunda lɛni na ɔda ɔɔnu ala kemmo kágyu geen, na uuubo kawɔlɔkɔ.

⁶Unwoti Katɔti ɔɔkɔliku bekyuli bani muubo-ku lɛlɔ kalɔ katɔ. Na bekyuli bani mɔɔkɔliku lɛlɔ katɔ ni, uuboku-ma kalɔ.

⁷Bidie enugya lɛnu bimwi Unwoti. Na bɛgya lɛbentaa bidie bumwi lɛnu bite bula Katɔti.

⁸Anwu náya na ulɔyɔ ɔ́ƒɔ kayaa ƒui. Na ɔɔyá na ɔnantu ɔɔna teewi kalɔ, na livo lɛɛkwɛ́ abi lɛlɔ.

⁹Uute beƒiebuo adila na baadi, na ɔɔnyuɛ baasɛ bebi bani muuwulo kɔka lɛnɔ.

¹⁰Bekyuli bani néti bana anu básia bapɔnkɔ ɔyikun iye bekpone bani nkɛ lɛgba lɛlɔ ka wedie-ma, balayɔ Unwoti Katɔti kaƒɔ.

¹¹Na bani mɔɔyia Katɔti na benye baanu ulu teete nwuna bɔyɔ bɔni naaasa kudii ni, bana lɛlɔ mɔɔda Katɔti kubiti.

¹²Amii Yerusalem kadi bekyuli ƒui, bimwi Unwoti Katɔti na bɛkɔliku-nwu lɛnyi katɔ,

¹³ɔsika abuala na úti ɔ́kalɛ bina ɔba kenye kpakplaa. Na úte ƒula ɔma kemmo bebi kusɛ kusɛ.

¹⁴Ɔ́ya bɛ́kɛ atu bɔyɔ ɔ́ka ɔ́mana ƒula ntɛ mmɔ. Na anta ku kamu káƒɔ ɔma ɔmmɔ kemmo.

¹⁵Na lɛla biala na Unwoti ɔ́su ni, liigyingya teesie kesi kesii kɔnakunwi.

¹⁶Ɔɔyá na etubankɛ aayu taaƒɔ kalɔ ƒui na eekeye ƒututuu aani bebuo linwini. Na nwuna kɔkɛ wɛlɛ wɛlɛ kɔɔƒɔ́ kalɔ ƒui aani ntɔ kalɛ.

¹⁷Na ɔdi ɔɔyu aani abanta bonwu bonwu. Na ɔdi biala ulakana kɔyɔ kɔmmɔ kenye bunye.

¹⁸Ɔɔyɛɛlɛ abanta amɛni ƒui si údie lɛdi, na eenwíni ketu taagba si ɔƒɛƒɛɛ úkpo ɔ́vi-nya lɛlɔ.

¹⁹Unwoti úti nwuna ɔda bubo ku ala bɔtina ƒui úte Yakob kaba kemmo bebi bani ndi Israelƒuɔ.

²⁰Útabla ɔmɛni útete kadi bamba bekyuli badi kudii. Na baaagyi kalɛ na ɔɔtɛ litemi lɛnɔ. Bɛya na bumwi Unwoti.