Read Lelemi Kɔgya 148 Bible Online

Kɔgya 148 - Lelemi bible

Kɔgya 148

¹Bɛya na bumwi Unwoti. Bimwi Unwoti Katɔti na bibo-nwu kudu bɛsiku katɔ ku kayaa kakaaka ƒui!

²Amii Katɔti batu ku amii nwuna kabla bablane lisu ƒui, bimwi-nwu!

³Ɔƒɛ ku kɔbuli ku ayabi ku ala ani ƒui muukeye na kayaa ƒui, bimwi-nwu.

⁴Amii kayaa ala ku ntu bɔni nƒa katɔ kakaaka ƒui, bimwi Unwoti Katɔti.

⁵Bimwi-nwu, ɔsika Unwoti Katɔti údie lɛdi na údie lɛla biala ku nwuna kenye litemi.

⁶Ɔ́ya na ala ammɔ enye ana kunyekɔ úti úsela uwi ƒui. Na lɛla lɛdi lilakana ala ani na ɔ́bla úse mɛni bɔvumana uwi ɔdi kudii.

⁷Amii ala ani ƒui na údie ɔ́kya kalɔ lɛlɔ ƒui, bimwi-nwu lɛnyi! Na amii bani ƒui nkya ɛpu kemmo lɛnɔ bimwi-nwu lɛnyi!

⁸Ogya ku etubankɛ ku ulɔyɔ ku ɔƒɛƒɛɛ kpakplaa ɔni muukpó na biinú-nwu lɛdi ƒui bimwi-nwu.

⁹Abi ku abinkpo ku adingyii ku egyii enengudi ƒui

¹⁰ku beƒiebuo ku bebuo bamba ƒui na aku kemmo bani mɔɔkpɛ́ kaƒɔ lɛlɔ ku kayaa baasɛ bani muunú-nwu litemi ƒui, bimwi-nwu.

¹¹Kalɔ lɛlɔ baga ku bekyuli ƒui ku lɛlɔ badine ku kalɔ lɛlɔ litemi batɛne

¹²ku bakloƒu ku begblebi, banana ku beleku ku banamu ƒui, bimwi Unwoti Katɔti lɛnyi.

¹³Bina ƒui bɛya na bemwi Blɔti, ɔsika anwu lɛti kani nse kede kede ƒui. Na nwuna bukeye bɔ́ƒɔ kayawi ƒui, na bɔ́kɔ búbo bɔ́vi kalɔ ƒui.

¹⁴Ɔ́ya na nwuna kadi bekyuli Israelƒuɔ bani mma-nwu lɛlɔ bálɛ lili, ɔsika ɔɔgyumana-ma kpakplaa aani akɔ ɔni mbo ɔyikun ku ese kangyaa. Bɛya na bumwi Unwoti.