Read Lelemi Kɔgya 17 Bible Online

Kɔgya 17 - Lelemi bible

Kɔgya 17

¹Unwoti, nu-mi buvele na atɛ mina litemi siin. Nu-mi keku kani na muuwulo taakpali-ɔ, ɔsika ɔkɔ etemila eeebo-mi kenye kemmo.

²Awɔ ndubɔtɛ-mi litemi na ete-mi ubo. Ɔsika awɔ kani ngyi litemi geen lɛmmɔ.

³Agyi kalɛ mina kayi kemmo kese sɛɛn. Ɔsika ébo-mi kudɔ usien na ákɔku-mi lɛlɔ kemmo ƒui ánu ka ntabla likpidi. Na lɛ́lɛ ugyii ka lɛɛɛdubo mina kenye bubimi bɔsu lɛla likpidi lɛdi.

⁴Liiise aani bekyuli bamba, ami mɔɔdi ƒula litemi lɛlɔ uwi ndi uwi. Na lɛɛɛkɛ bekyuli bani mbo lɛkantakpi kavinkɔ.

⁵Mɔɔsiaku-ɔ kama siin uwi ndi uwi kalɛ neeedeyi kesii bamba.

⁶O mina Unwoti, awɔ na mɔɔkpali! Buvele se atu na enu-mi bɔkpali.

⁷Bla-mi ƒula lɛƒɔndia lɛni neeebo lɛkala. Awɔ muudie bekyuli bani nékeli bábatamiku-ɔ na bana bekisine enu kemmo ɔkɛnku ƒula ɔyikun bonwu lɛlɔ.

⁸Da-mi kɔkɔɔkɔ aani ƒula lɛnumi kalɛ, na abɛla-mi aani kalɛ na akɔkɔ ɔɔbɛla nwuna bebi na avwi akɔ.

⁹Die-mi lɛku mina bekisine bani náka-mi bákya ka bayila-mi ngba enu kemmo.

¹⁰Ɔsika bekyuli bammɔ udu balanu bekyuli kɔnyana, mmomu baatɛmi taakun lɛmɛnɛ.

¹¹Béti anumi bálɛ-mi lɛlɔ na báka-mi bákya kalɛ na bebo-mi bava kalɔ.

¹²Na bese aani gyata ɔni na ɔkwɛ ɔ́du-nwu ƒui na ebuo ɔni na ɔɔwia uƒie na ɔduli-nwu lɛlɔ. Iye gyata ubi ɔni nábɛ ubi ɔɔbwi ebuo ɔni na ɔta utéƒie lɛlɔ. Na ɔɔkɛ taatu-nwu kesi kesii.

¹³O Unwoti, muuvele-ɔ, ta kɔnakunwi na enye asiaku-ma. Na eti ƒula kewii na aƒɔ-mi alɛku balalane bamɛni enu kemmo.

¹⁴O Unwoti, ƒɔ-mi na bekyuli bekpidi bani kasusu ndi ka basala kayawi ala bese bete lɛlɔ mɛni enu kemmo. Awɔ muute bekyuli bani na aayɔ́ adila na baadi. Na bana bebi baakɛ́ taadi teemo. Bana bawɔ baakɛ́ ala teetulo kalɛ na baawia.

¹⁵Nsu ami ndubɔnu-ɔ anumi, ɔsika ntabla lɛla likpidi lɛdi. Na si lɛ́ta mina kalɛɛkɔ ni, ndubɔnu kalɛ na ese na lɛlɔ lɛyɔ-mi.