Read Lelemi Kɔgya 18 Bible Online

Kɔgya 18 - Lelemi bible

Kɔgya 18

¹O Unwoti Katɔti, mɔɔyɔ́-ɔ, ɔsika awɔ muute-mi ɔyikun.

²Unwoti unye ute-mi aani lɛtakpɛ ku katamikukɔ kani lɛlɔ na líkpo kama. Ɔɔgyumana-mi aani ukyuli ɔni muunye teetile-mi na ɔɔƒɔ́-mi na ɔɔyá na mɔɔkɛ́ ɔyikun.

³Unwoti Katɔti, awɔ námanku bumwi. Lɛ́kpali-ɔ na édie-mi álɛku mina bekisine enu kemmo.

⁴Kukpi kabuli kényimi-mi. Na útiku-mi úselaku aani kalɛ ketu kani néyi keeminime.

⁵Kukpi abuli ényimi-mi. Na kunye-mi anumi kɔɔkya-mi liƒu uwi ndi uwi.

⁶Na mina lɛbibo lɛmɛni kemmo ni, lɛ́kpali mina Unwoti Katɔti na líwulo lɛ́kya-nwu nnii ubunku-mi. Na únu-mi lɛdi ɔ́siku nwuna kakpakɔ na úbunku-mi.

⁷Kalɔ kemodi kaagyú taawɔ na kaatɔ́ kpakpaakpa. Na abi ƒui ákunku, ɔsika Unwoti úti kɔnyi.

⁸Uyɔ ɔ́lɛ-nwu enwu kemmo, na ogya lɛnɔ ɔ́lɛ-nwu kenye kemmo ɔ́kyula ala. Na ogya agyabi ani náƒɔ ogya geen sɔsɔ aasí taabayu.

⁹Na ɔ́lɛmi katɔ na ɔ́yu úbo kalɔ na liƒlukutu lɛ́ƒɔ-nwu lɛgba kalɔ ƒui na ɔ́bla suu.

¹⁰Na ulie ɔtu udu ɔdi mbo avwi na baalɔ-nwu Kerub lɛlɔ na úveyi ɔ́yu úbo.

¹¹Na lɛdisa libi-nwu lɛlɔ aani awu. Na liƒlukutu lɛni némini na lise suu lɛ́ka lɛ́mana-nwu na lɛ́bɛla-nwu.

¹²Nwuna bɔda bɔlɛ ku bukeye bɔni nédie lɛlɔ na liƒlukutu lɛni ntɔ-nwu anumi mmɔ kemmo ɔ́ya na etubankɛ aana teebewi kalɔ na kayaa kaabwɛ ogya.

¹³Na Unwoti uudie lɛdi ku kudu bonwu na kayaa aani kalɛ na katɔ keedu. Na anwu ɔni ntulo ƒui mmɔ lɛdi lɛɛku taasi katɔ katɔ ƒui teebewi kalɔ.

¹⁴Unwoti úbo atula ɔ́kya nwuna bekisine bammɔ akɔ na úgyingya-ma. Na ɔ́ya na ogya ɔni mɔɔbwɛ taalɛ ɔ́bɔku-ma na békeli bátɔlɔ.

¹⁵Ɔ́bɔku ɛpu na ɔƒɛƒɛɛ ɔni mɔɔlɛ́-nwu enwu ɔ́ya na ɛpu ɔmmɔ kalɔ kátina nwaa na kalɔ kemmo atabi ɔka údie lɛlɔ.

¹⁶Ɔkɛnku nwuna ɔyikun lɛlɔ na úbedie-mi ɔ́lɛku ligyu ntu bɔmmɔ kemmo.

¹⁷Údie-mi ɔ́lɛku mina bekisine kpakplaa bani muukisi-mi enu kemmo na ɔ́ƒɔ-mi na bani nábi básiaku-mi na bebo ɔkplu betulo-mi kudɔ.

¹⁸Mina bekisine bénye báda-mi ka nkya ɔgbankpi kemmo ɔsu. Nsu Unwoti údie-mi, ɔsika nwuna lɛlɔ na líkpo kama.

¹⁹Údie-mi bana akɔ únyene kanwaadikɔ na lɛ́kɛ bɔnwuna, ɔsika mina lɛlɔ lɛɛda-nwu ebiti.

²⁰Unwoti ɔ́bla-mi lɛƒɔndia, ɔsika nsiaku-nwu kama siin na úse-mi kɔdɛ, ɔsika likpidi lɛdi lɛɛɛda-mi.

²¹Mɔɔdi Unwoti ɔda bubo lɛlɔ. Na ńtedeyi ńtalɛ nwuna ulu lɛlɔ na lɛ́ƒiɔ-nwu.

²²Ngyi nwuna ɔda bubo ƒui na ńtedie ɔdi atu.

²³Ɔgyi kalɛ na nda lɛlɔ siin na ńtabla likpidi lɛdi.

²⁴Unwoti úse-mi kɔdɛ, ɔsika mɔɔbla ala siin na ɔgyi ka likpidi liiibo-mi kayi.

²⁵Bekyuli bani mɔɔbla ala ulu lɛlɔ ni, awɔ lɛnɔ aabla-nya ulu lɛlɔ teete-ma. Na bani mɔɔdi ƒula litemi lɛlɔ ni, aabla-ma lɛƒɔndia uwi ndi uwi.

²⁶Na bani mɔɔsia bana ablala anu ni, awɔ lɛnɔ aasia ala anu teete-ma. Na bani na balásia bana ablala anu ni, aaní-ma kɔtu na bana ablala kenye.

²⁷Aaƒɔ́ bekyuli bani muuboku lɛlɔ kalɔ. Na eeboku bekyuli bani mɔɔtalaku lɛlɔ katɔ kalɔ.

²⁸O Blɔti, awɔ nda-mi ukpo na uléni. Na kesii kani nse-mi suu ƒui kékeye.

²⁹Awɔ muute-mi ɔlɔkplu na muunye taasiaku bekpone kasala lidu lidu. Na aayá na mɔɔdi lɛma pii lɛlɔ teeƒie-ni taaƒɔ.

³⁰Katɔti lilu ƒui lise kede kede. Na ɔkɔ biala uuubo-nwu kemmo. Ɔdi lɛgyumanala ute bekyuli bani nátamiku-nwu.

³¹Na ɔma lɛnɔ ndi Katɔti ɔmmɔ si ɔɔɔdi Blɔti? Ɔsika anwu kani ndi lɛtakpɛ lɛni lɛlɔ na bula kama kekpo.

³²Unwoti Katɔti mɔɔtu-mi akpagya ɔkɛnku nwuna ɔyikun lɛlɔ. Na ɔɔmɛnɛ kuƒi siin teete-bu.

³³Ɔ́ya na mina lɛgba lɛ́yu ɔkplu aani akwa. Na ɔɔtɔnku-mi taavinku ulu siin lɛlɔ.

³⁴Na anwu mɔɔtina-mi kekpo kɔkwɛ ƒui kalɛ lɛkana lɛda kataminta kani mbo ɔkplu geen.

³⁵O Unwoti, awɔ mɔɔgyumana-mi na aaƒɔ́-mi ngba. Na kalɛ na eebo teebebunku-mi ɔsu ni, áya na lɛ́ƒɔ lɛnyi ɔkɛnku ƒula ɔyikun bonwu lɛlɔ.

³⁶Ábwɛ mina kasiakɔ éte-mi na kábɛbɛ na ńtagbanta ńteduo mina bekisine enu.

³⁷Lɛ́bi lɛ́siaku-ma kama úti útédu ka lɛ́siaku-ma. Na ńtenwini kama útédu uwi ɔni na lɛ́yila-ma udu.

³⁸Líbo-ma líwi kalɔ ɔni na basɔ balákana bɔta na kesii kani na batɛ na mina lɛgba akɔ mmɔ.

³⁹Átu-mi akpagya ku ƒula ɔyikun na lísie kekpokɔ. Na áya na lɛ́di mina bekisine ƒui lɛlɔ.

⁴⁰Na áya na lɛ́bɔku mina bekisine na békeli bátɔlɔ. Na bekyuli bani muukisi-mi ƒui áya na lɛ́yila-ma udu.

⁴¹Báva bákpali ka ukyuli ɔdi ubaƒɔ-ma, nsu ɔdi uuubo na ɔƒɔ-ma. Na bákpali Unwoti muedi, nsu útakpete-ma.

⁴²Mmɔ na lɛ́kɔ-ma lɛ́bla kpɛtɛ kpɛtɛ aani ɔtumu ɔni na ɔƒɛƒɛɛ uuti taatɔlɔku. Na lɛ́tu-ma lídie aani aba ntéwi ulu lɛlɔ.

⁴³Áƒɔ-mi álɛku batuɔkplune enu kemmo. Na áya na línwini kadi bekyuli ƒui ɔtɔnkune. Na kadi bekyuli bani na lɛɛɛgyi kudii mɛni muedi ni, awɔ Unwoti áya na bakya-mi kalɔ.

⁴⁴Si lídie lɛdi ni, baabla taasiaku mina etemila lɛlɔ. Na baƒɔ bammɔ ƒui beebo na baakya lili kalɔ teete-mi.

⁴⁵Na bálɛ bási bana kɔbɛkɔ bébo ku liƒu, ɔsika básɔ beeebo lɛnunsia lɛdi.

⁴⁶Bɛya bumwi Unwoti ɔni nli uwi ndi uwi. Anwu ndi mina lɛtakpɛ lɛni lɛlɔ na nkpo. Ndubo-nwu lɛnyi katɔ bɔkɔliku, ɔsika anwu mɔɔƒɔ́-mi.

⁴⁷Anwu muudie mina bekisine kasi teete-mi. Na anwu mɔɔyá na kadi bamba bekyuli baakya eli kalɔ teete-mi.

⁴⁸Unwoti udie-mi ɔ́lɛku mina bekisine enu kemmo. Na úti-ma ɔ́kya-mi lɛgba kalɔ. Na ɔ́gyumana-mi ɔ́siku bakantankpine kudɔ.

⁴⁹Ɔmɛni ɔsu ni, O mina Unwoti, ndubumwi-ɔ lɛnyi na kadi bekyuli ƒui akɔ. Na ndubudie agya lɛkɔliku-ɔ lɛnyi katɔ.

⁵⁰Awɔ náya na Dawid ƒula ɔga ɔƒunadi ɔɔdi nwuna bekisine lɛlɔ geen. Na éti ƒula bɔyɔ bɔni naaavumana kudii éte anwu ɔni na ése likpo mmɔ ku nwuna bawɔ úsela uwi ƒui.