Read Lelemi Kɔgya 29 Bible Online

Kɔgya 29 - Lelemi bible

Kɔgya 29

¹Amii Katɔti batu ƒui bimwi Unwoti Katɔti, na bɛtina kalɛ na uukeye na ubo ɔyikun.

²Bimwi Unwoti ɔni nse kedee ƒui na biboku eli kalɔ bite-nwu. Ubo ɔyikun na nwuna lɛgadi liikeye.

³Unwoti uukeye na uudie lɛdi momoomo aani kalɛ na katɔ keedu. Na nwuna lɛdi kɔku kɔ́ƒɔ ɛpu ntu bɔmmɔ ƒui lɛlɔ.

⁴Unwoti lɛdi libo ogya geen na lɛɛtina nwuna lɛgadi ɔyikun.

⁵Na egyii enengudi ani mbo ɔkplu na enye Lebanon abi lɛlɔ ni, Unwoti lɛdi lɛɛƒɛ-nya ƒui kpɛtɛ kpɛtɛ.

⁶Ɔɔyá na Lebanon abi aaƒulu aani ɔmantɛ bakɔ bebi. Na ɔɔyá na Hermon Kɔbi kɔɔƒulu aani lɛku kemmo akɔ ubi.

⁷Na Unwoti lɛdi lɛɛyá na kayaa kaabwɛ ogya.

⁸Na Kades kalɔ kakwiidi kemodi ƒui kaakunku na kaakya ɔƒɛɛlɛ.

⁹Unwoti lɛdi lɛɛyá egyii enengudi ammɔ eelii lɛlɔ na evete eewile-nya eli ƒui na lɛku lɛ́bla ƒue. Na bani ƒui nkya nwuna ɔtɔ mmɔ beemwi kalɛ na úbomo na uukeye.

¹⁰Unwoti uli kalɔ kpli ɔɔdi ɛpu ɔmmɔ lɛlɔ. Na ɔɔdi ala ƒui muedi lɛlɔ úsela uwi ƒui.

¹¹Unwoti Katɔti uute nwuna kadi bekyuli ɔyikun. Na uute-ma kusɛ kusɛ na keyi kaayɔ́ku-ma.