Read Lelemi Kɔgya 30 Bible Online

Kɔgya 30 - Lelemi bible

Kɔgya 30

¹O mina Unwoti, muubó-ɔ kudu na mɔɔkɔliku-ɔ lɛnyi katɔ, ɔsika awɔ nédie-mi na átaya na mina bekisine badi-mi lɛlɔ na bakɛ ebiti.

²Ka líwulo lɛ́kpali-ɔ ni, énu-mi bɔkpali na ébebunku-mi na ábwi-mi.

³O mina Unwoti, édie-mi na kaƒiɔtɔ kemmo na línwini líbo nli ngba.

⁴Amii bani nsiaku Unwoti kama siin ni, bidie lɛnu bimwi-nwu na bitaakali kalɛ na use kedee.

⁵Uléti kɔnyi taakya ukyuli uwi gyɔlɔɔ. Mmomu nwuna lɛƒɔndia lise lísela uwi ƒui. Si ina keku sɔɔn na buuwulo usien umodi ni, lɛlɔ lɛdubɔyɔ-bu ɔtanta.

⁶Uwi ɔni na ala átɛnku-mi ni, lɛ́kali na lɛ́su nnii, “Lɛla biala lɛsɔ lilékpoku-mi ɔƒɛni amu.”

⁷O Unwoti, uwi ɔni na ábla-mi lɛƒɔndia ni, mina kenyekɔ káda kalɔ kpakplaa aani kɔbi. Nsu uwi ɔni na édie ƒula anumi na mina lɛlɔ blii ni, lɛ́yia geen.

⁸O Unwoti, líwulo lɛ́kpali-ɔ nnii bunku-mi.

⁹Lɛ́nu lɛ́ti ka aaadubo kɔsia kɔdi bɔkɛ si líkpi. Ɔsika si línwini lɛti ni, dɛ na ndubɔkana na limwi-ɔ iye libo-ɔ kudu na ƒula lɛƒɔndia lɛni naaavumana kudii lɛlɔ?

¹⁰Unwoti, nu-mi bɔkpali na anu-mi kɔnyana na ebunku-mi.

¹¹Áya na mina kɔnyana kúnwini ebiti katɔ. Na use aani kalɛ na baalɛ́ adi atonwudi kemmo na beenyimi aƒualadi.

¹²Uwi ɔni na nkya kɔnyana kemmo ni, ntakana na limwi-ɔ. Nsu ɔƒɛni ni, lɛɛɛdubo mina kenye bubile mmomu ndubo-ɔ enu butaagya uwi ndi uwi.