Read Lelemi Kɔgya 31 Bible Online

Kɔgya 31 - Lelemi bible

Kɔgya 31

¹Unwoti, awɔ na líkeli ḿbatamiku. Taya na kɔƒa kukpo-mi. Muuvele-ɔ nnii die-mi, ɔsika ese siin.

²Nu-mi bɔkpali na ebo pla ebedie-mi. Na enwini katamikukɔ lɛtakpɛ bonwu ete-mi na lɛgyumana-mi.

³Ka awɔ ndi mina lɛtakpɛ ku katamikukɔ ɔsu ni, tɔnku-mi na bete-ɔ lɛnyi ɔbu.

⁴Die-mi lɛku kakpagyuɛ kani na mina bekisine bákywɛ-mi kemmo. Ɔsika awɔ ndi mina kama kekpokɔ.

⁵Unwoti Katɔti, líti mina kɔyu lɛ́kya-a enu kemmo. Anwuɔsu die-mi, ɔsika aadi ƒula litemi lɛlɔ uwi ndi uwi.

⁶Bekyuli bani mɔɔkpá baƒiɔ ku ala keeke ni, nkisi-ma. Na ami ni, awɔ Unwoti lɛlɔ na líti mina anu ƒui lɛ́sia.

⁷Ebiti adubɔda-mi na lɛlɔ lɛyɔ-mi na ƒula lɛƒɔndia ɔsu. Ɔsika ánu ala ani muukpóku-mi áti ku abi ani muubó.

⁸Átanyonu-mi átakya mina bekisine enu kemmo, mmomu édie-mi bana ntɛ étényene kalɔ ƒiaa lɛlɔ na lɛ́kɛ bɔnwuna.

⁹Nu-mi kɔnyana, O Unwoti, ɔsika ala eekpóku-mi geen. Líwulo kɔnyana laa, na mina anumi muedi asɔ alánu kaduɛ. Na ami ukyuli umodi ɔmmɔ ƒui muunú lɛlɔ ɔlɛ.

¹⁰Mina ngba ƒui bɔdi ɔlɛ bunu sɔɔn ku kɔnyana uwi ɔni ƒui. Na mina ɔlɔna lɛnɔ ɔ́bla kpɛtɛ kpɛtɛ na mina ekpidi ɔsu. Na mina ekubi áyɔ lɛlɔ na asɔ alákana-mi bɔda.

¹¹Mina bekisine báya na mina badukɛne muedi baanu-mi anumi taalɔ-mi anyikpi. Na línwini liƒu lɛla líte bekyuli na beekeli-mi si bánu-mi na ulu lɛlɔ.

¹²Báyiƒala-mi aani kalɛ na baayiƒala ukpine. Na lɛ́ta línwini aani kubuikɛ kɔni na bébo béwiakun.

¹³Baalɔ-mi anyikpi na anumi ani na baakywɛ-mi lɛƒɛnyi ƒui aakya-mi liƒu. Na baasa lili kalɛ na babla na badu-mi.

¹⁴Nsu awɔ Unwoti lɛlɔ kani na mina anu asia, ɔsika lɛ́lɛ ugyii ka awɔ ndi mina Katɔti.

¹⁵Mina ngba ƒui bɔkya-a enu kemmo. Anwuɔsu die-mi na mina bekisine enu kemmo ku bekyuli bani nábi basiaku-mi beekpóku-mi kudɔ.

¹⁶Ƒɛnimi anumi kya ami ƒula kabla ɔblane na aƒɔ-mi, ɔsika ƒula bɔyɔ bulávumana.

¹⁷O mina Unwoti, taya na kɔƒa kukpo-mi, ɔsika ƒula lɛnyi kani mɔɔlɔ. Nsu balalane ama ni, ya na kɔƒa kukpo-ma na batátɛ kaƒiɔtɔ kemmo kpoo.

¹⁸Bala ɔkɔ banyine bammɔ ƒui kenye, ɔsika baakun lɛmɛnɛ na baatalaku lɛlɔ katɔ. Na baalɔ bekyuli bani nsiaku-ɔ kama siin anyikpi.

¹⁹Áklibi ala abuni geen ése bekyuli bani mɔɔbu-ɔ na békeli bábatamiku-ɔ. Na adubuti-nya ete-ma na bekyuli ƒui anumi.

²⁰Aabɛla-ma na ƒula kudɔ kalɛ na ukyuli ɔdi ulakana-ma kakpagyuɛ kadi bɔkywɛ. Adubɔkya-ma ƒula lɛgbanya kemmo kalɛ na bana bekisine basɔ balanu ɔdi beledumi.

²¹Bimwi Unwoti, ɔsika údie nwuna lɛƒɔndia bonwu ɔ́tina-mi uwi ɔni na mina bekisine báka bámana-mi aani kalɛ na baaka ɔma taakya.

²²Ɔsika uwi ɔni na ala étulo-mi ni, lɛ́su ka asɔ aaadaku-mi lɛda. Nsu énu-mi kɔnyana buwulo uwi ɔni na lɛ́kpali-ɔ nnii bunku-mi.

²³Amii bekyuli bani mɔɔdi Unwoti litemi lɛlɔ ƒui bɛyɔ-nwu. Ɔsika ɔɔgyumana nwuna badi bani mɔɔdi nwuna etemila lɛlɔ kpakplaa. Na bani mɔɔkɔliku lɛlɔ katɔ ni, Unwoti ɔɔƒɔ-ma kayu kani néduku-ma.

²⁴Ɔmmɔ ɔsu amii bani ƒui néti anu bɛ́sia Unwoti lɛlɔ ni, bise kayi na bɛkya ɔkplu.