Read Lelemi Kɔgya 32 Bible Online

Kɔgya 32 - Lelemi bible

Kɔgya 32

¹Lɛlɔ lɛdubɔyɔ ukyuli ɔni na Katɔti úti nwuna bɔƒiɔ ɔ́kyiɛ-nwu na údie ekpidi nwuna lɛlɔ.

²Na lɛlɔ lɛdubɔyɔ ukyuli ɔni ekpidi na Blɔti ulábu teese-nwu na ɔkɔ ala bɔbla bɔdi buuubo-nwu lɛlɔ kemmo.

³Uwi ɔni na ntedie tɔ mina ekpidi kalɔ ni, mina kayi kemmo kémii na muuwulo momoomo limeyi limodi ɔsu mina ekubi átɔ na ɔlɔna kemmo.

⁴Unwoti, usien ku ɔƒɛ ƒui ni, aaní-mi kɔtu na mina ɔyikun ɔ́sa na lɛ́ta lɛ́bla aani kalɛ na ntu bɔ́kwii taasa kaƒɛndi uwi kalɔ.

⁵Amu na lɛ́nu mina alaekpidi lɛ́ti na lɛ́su nnini, “Ndubudie mina bɔƒiɔ ƒui kalɔ lite awɔ Unwoti.” Lídie-nya kalɔ líte-ɔ sɔsɔ na nteti ɔdi ntabɛla-a. Anwuɔsu awɔ lɛnɔ ti kyiɛ-mi.

⁶Anwuɔsu ukyuli biala mɔɔdi ƒula etemila lɛlɔ ɔsia anu na ɔkpali-ɔ uwi ndi uwi na adubunu ete-nwu. Na si ina ɔgbankpi ɔdi na ɔdi aani ketu néyi na kaanwanɛ lɛlɔ kalɛ kalɛ muedi, ntu bɔmmɔ bɔɔɔdubo bɔni bude-nwu na buƒie-nwu kudii.

⁷Awɔ ndi mina kabɛkɔ. Na adubɔgyumana-mi na ɔgbankpi uwi. Na ndubudie lɛnu lɛtina kalɛ na éti áƒɔ-mi.

⁸Unwoti ɔnini, “Ndubɔtina-a kesii kani ɔlɛka asia ku lɛla lɛni na ɔlɛka abla. Na ami ɔlati ndubutaanu-ɔ lɛlɔ.”

⁹Bitabla aani bapɔnkɔ iye bebuo ala betine kalɛ. Ɔsika kabuli na baabala-ma kenye taatina-ma bana kavinkɔ ka beeebo kasusu ɔsu.

¹⁰Balalane badubo abi bubo geen. Nsu bekyuli bani meti bana anu masia Unwoti lɛlɔ ni, nwuna bɔyɔ bɔni naaavumana kudii bɔdubɔka bɔmana-ma.

¹¹Ebiti ada-mii na lɛlɔ lɛyɔ-mii na Unwoti lɛlɔ, amii bani nsiaku-nwu kama siin na bina kayi ayɔla akɛ ulu ɔbuni lɛlɔ. Bɛva momoomo na bidie lɛnu ku ebiti.