Read Lelemi Kɔgya 33 Bible Online

Kɔgya 33 - Lelemi bible

Kɔgya 33

¹Amii bani nsiaku-nwu kama siin bibo lɛlɔyɔ kudu na bɛsu lɛla lɛni na Unwoti ɔ́bla úte-mii. Na amii bani muunú-nwu litemi ni, bimwi-nwu lɛnyi.

²Bimwi Unwoti ku bina lɛbentaa. Na bɛgya asiwa na bidie lɛnu bimwi Unwoti.

³Bidie ɔnu ɔwɔdi bite-nwu, na bina enu ata na bina agyala lɛlɔ na bibo lɛlɔyɔ kudu momoomo.

⁴Ɔsika Unwoti Katɔti litemi lise siin. Na nwuna ablala ƒui adi ulu geen ɔmmɔ.

⁵Ɔɔtɛ litemi ulu lɛlɔ na ɔɔyɔ́ lɛla biala lɛni nse siin. Na nwuna bɔyɔ bɔni naaavumana bɔ́ƒɔ kayawi ƒui.

⁶Unwoti Katɔti údie lɛdi. Na ɔkɛnku nwuna kenye butemi lɛlɔ údie katɔ ku ɔƒɛ ku kɔbuli ku ayabi.

⁷Ɔ́sala ɛpu ntu bɔmmɔ ƒui úse liku linwi. Na ɔ́ya na buwi ubu bonwu ɔdi kemmo aani kalɛ na baasála ala teewi ala kesekɔ.

⁸Amii kayawi ala ƒui, bɛyia Unwoti Katɔti. Na amii bekyuli bani nkya kayawi kammɔ kemmo ni, bɛbu-nwu.

⁹Ɔsika ka údie lɛdi ni, lɛla biala lɛ́da lɛ́lɛ. Na ɔkɛnku nwuna kenye butemi kemmo na lɛla biala linye nina kenyekɔ.

¹⁰Unwoti úbile kadi bekyuli kasusu ku kɔkwɛ biala na baakya kemmo. Na ɔɔyá na kulalɛ ɔbuni.

¹¹Nsu nwuna kasusu aka kalávumana na nwuna kayi lɛyɔla kani ndubunye ute kaba bekyuli ƒui.

¹²Lɛlɔ lɛdubɔyɔ kadi bekyuli bani mɔɔbu Unwoti kani, ama bani na ɔ́ƒuna aani nwuna bebi!

¹³Unwoti ɔɔnu bayawine ƒui taasiku katɔ.

¹⁴Ɔɔnu-ma taasiku kesii kani na ulie ɔɔdi lɛlɔ mmɔ.

¹⁵Anwu návɔ bana ƒui kɔyi. Na ɔgyi bana ablala ƒui ɔni na lɛla lɛdi lilábɛ-nwu.

¹⁶Ɔga ɔdi uládi lɛlɔ na nwuna bekpone bumomo ɔyikun ɔsu. Lɛni kani na ukpone lɛnɔ uládi lɛlɔ, ɔsika ubo ɔyikun unengudi ɔdi ɔsu.

¹⁷Kekpo bapɔnkɔ baaadi lɛla lɛni na basia anu bete kekpo lɛlɔ bɔdi. Na bana ɔyikun bonwu ɔmmɔ lɛnɔ ulakana na waƒɔ-nwu na kekpokɔ.

¹⁸Nsu Unwoti anumi asia bekyuli bani ƒui mɔɔbu-nwu na bana anu asia nwuna bɔyɔ bɔni naaavumana kudii lɛlɔ.

¹⁹Uudie-ma taalɛku kukpi kemmo na uute-ma adila na kɔka uwi.

²⁰Abu ni, Unwoti lɛlɔ na bula anu asia. Na ɔdi bula ɔgyumanane ku bula ubunkune.

²¹Ɔsika nwuna lɛlɔ na bula kayi kaakɛ́ ebiti. Na nwuna lɛnyi kedee lɛlɔ kani na bula anu asia.

²²O Unwoti, ya na ƒula bɔyɔ bɔni naaavumana kudii bɔsiaku-bu, ɔsika ƒula lɛlɔ kani na bɔsia anu.