Read Lelemi Kɔgya 34 Bible Online

Kɔgya 34 - Lelemi bible

Kɔgya 34

¹Ndubuteemwi Unwoti uwi biala kemmo. Na lɛɛɛdubo-nwu enu bɔda bɔgya bɔya kudii.

²Na mina lɛlɔ kemmo ƒui kadubuyi ku lɛlɔyɔ na nwuna lɛlɔ. Bekyuli bani na ala eekpóku benu ɔmɛni na lɛlɔ lɛyɔ-ma.

³Bibunku-mi na bumwi Unwoti lɛnyi na bɔkɔli-nwu lɛnyi katɔ bɔsala.

⁴Lɛ́kpali Unwoti na únu úte-mi na údie-mi ɔ́lɛku ala ani ƒui mɔɔkya-mi liƒu kemmo.

⁵Bani ƒui na bana anu asia Unwoti lɛlɔ ni, bana anumi adubukeye na kɔƒa kulékpo-ma.

⁶Bekyuli bani nánu báti ka básɔ ni, bákpali-nwu na únu úte-ma na údie-ma lɛbibo ƒui kemmo.

⁷Unwoti ɔtu ɔɔnu taamana bekyuli bani mɔɔyia Unwoti na uudie-ma.

⁸Bɛni bide Unwoti na bɛnu kalɛ na ɔdia. Ukyuli ɔni néti Unwoti ɔ́bla nwuna katamikukɔ ni, lɛlɔ lɛdubo-nwu bɔyɔ.

⁹Bɛyia Unwoti amii bekyuli bani mɔɔdi nwuna litemi lɛlɔ. Ɔsika bani ƒui mɔɔyia-nwu ni, baláyaki lɛla lɛbuni lɛdi.

¹⁰Bagyata ɔyikun ɔɔyii udu na baayaki lɛdila na baatɛ kɔka. Nsu bekyuli bani ƒui mɔɔwia Unwoti kama ulu ni, balayaki lɛla lɛbuni lɛdi kudii.

¹¹Amii mina bebi, bibo na binu lɛla lɛni na mɔɔsu-mii. Ndubɔtina-mii kalɛ na baayia Unwoti.

¹²Si ukyuli ɔdi ɔɔwia ka ulie ngba gyɔlɔɔ na keyi kayɔku-nwu ni,

¹³ɔlɛka ɔda nwuna unyemi kaduɛ na ulatɛmi enyekpi iye utaanyi ɔkɔ lɛnɔ.

¹⁴Ɔda likpidi bɔbla ɔya na utaabla lɛbuni, na ɔsia ulu biala lɛlɔ na nwuna kayi kabla ƒaa ku bekyuli ƒui.

¹⁵Unwoti ɔɔnu bekyuli bani nse siin lɛlɔ, na uunú bana bɔkpali.

¹⁶Nsu bekyuli bekpidi ni, Unwoti uléti anumi abuni taanu-ma. Mmomu si békpi ni, bana anyi ayii.

¹⁷Na Unwoti bekyuli bani nsiaku-nwu siin ama ni, baava taalɔ-nwu na uunú teete-ma kɔnakunwi. Na uudie-ma na ala ani nda-ma kemmo.

¹⁸Unwoti ude bani na enu áƒɛ-ma na ala étulo-ma. Na ɔɔƒɔ́ bani na bana lɛnunsia ƒui lɛ́sa.

¹⁹Ukyuli ɔni nsiaku-nwu siin ni, ala lidu lidu akana na ekpoku-nwu nsu Unwoti ɔdubudie-nwu kede kede.

²⁰Ɔdubo-nwu bɔgyumana ɔni na nwuna kesii kadi kaláƒɔ ɔlɛ.

²¹Alaekpidi ani na ukyuli ɔɔbla ni, anya kani ndubo-nwu bɔdu. Na ukyuli ɔni muukisi ukyuli ɔni nsiaku Unwoti kama siin ni, Unwoti ɔdubɔdu-nwu kɔtɔ.

²²Unwoti uudie nwuna kabla bablane ngba na ɔgbankpi kemmo. Na bani ƒui muukeli taatamiku-nwu ni, uládu-ma kɔtɔ.