Read Lelemi Kɔgya 36 Bible Online

Kɔgya 36 - Lelemi bible

Kɔgya 36

¹Alaekpidi bablane ɔbladu ulátina ka baayia Katɔti. Mɔɔnu ka likyulikpi kasusu kani na beeti.

²Na kalɛ na baanu lɛlɔ katɔ katɔ ɔsu ni, bana likyulikpi líse-ma lisusu na balánu alaekpidi ani na baabla taati na beni-nya.

³Alaekpidi ku ɔkɔ ala sɔɔn na baatɛmi. Na bédeyi bálɛ lɛnunda ulu lɛlɔ na basɔ balábla lɛbuni lɛdi.

⁴Balásia lɛbuni bɔbla ulu biala lɛlɔ. Na si batɛ bana atɛla lɛlɔ muedi likpidi lɛlɔ kasusu kani na baatɛ teeti. Anwuɔsu lɛnɔ na béni ka bada bana alaekpidi bɔbla baya.

⁵Unwoti, ƒula bɔyɔ bɔni naaavumana kudii ku kalɛ na aadi ƒula litemi lɛlɔ ulu lɛlɔ úbomo geen aani kalɛ na bɔɔnu kalɛ na kayaa kébomo.

⁶Kalɛ na ese siin ɔ́da lidu kalɔ utulo abi ani nnye na bɔɔnu. Na kalɛ na aatɛ litemi taasiaku ulu lɛlɔ utulo kalɛ na ɛpu kemmo kágyu. Na awɔ kani mɔɔnu bekyuli ku bebuo ƒui lɛlɔ.

⁷Ƒula bɔyɔ bɔni naaavumana kudii bɔ́ƒɔ kuye butulo lɛla biala. Na ƒula avwi akɔ na bekyuli ƒui baakɛ́ kabɛkɔ.

⁸Eete-bu adila taasiku ala pii ani néyi-ɔ kaduli mmɔ na bɔɔdi teemo. Na áya na bɔɔní ntu taasiku ƒula ketu kani ntu mɔɔyu kayi buɛɛ kemmo.

⁹Awɔ muute lɛla biala ngba. Na ƒula bukeye mɔɔyá na bɔɔnu nwaa.

¹⁰Unwoti, buuvele-ɔ bɔnii taatina bekyuli bani ngyi-ɔ ƒula bɔyɔ bɔni naaavumana kudii mmɔ. Na eteete bani ƒui mɔɔbla ƒula lɛƒɔyɔ ku kayi sɛɛn ala abuni.

¹¹Taya na ukyuli ɔni mɔɔtalaku lɛlɔ katɔ ɔdi ubekpoku-mi. Na ukyuli ukpidi ɔdi utabɔku-mi.

¹²Aanu kesii kani na alaekpidi bablane bébuli batɛ ɔni na basɔ balakana bɔta!