Read Lelemi Kɔgya 48 Bible Online

Kɔgya 48 - Lelemi bible

Kɔgya 48

¹Bula Unwoti Katɔti úbomo geen. Anwuɔsu ɔlɛka bɔkɔliku-nwu lɛnyi katɔ na nwuna ɔma unengudi kemmo na nwuna kɔbi kedee lɛlɔ.

²Sion Kɔbi kɔdi bula Katɔti kɔbi kɔni lɛlɔ na uli. Na kɔbi kɔmmɔ kɔ́kuku na kɔɔdia bɔnu sɔsɔ. Na ɔdi bula ɔga ɔma unengudi. Kesii kamɛni mɔɔyɔ́ kayawi bekyuli ƒui kaƒɔ.

³Katɔti ɔ́tina ka nwuna kaduli kadi katamikɔ kabuni geen kesii kani na ɔdubɔgyumana-bu.

⁴Baga badi básala lɛlɔ banii betékpoku Sion Kɔbi kɔmmɔ.

⁵Nsu ka béduo mmɔ ni, ɔ́bla-ma kalɛ kadi na liƒu lɛ́da-ma amu na békeli batɔlɔ.

⁶Na lɛlɔ lɛɛtɔ́-ma aani uleku ɔni ntɛ kɔwɔ.

⁷Iye aani Tarsis lɛkɔlɔ libendi lɛni nábwɛ na ɛpu anumi ɔni na ɔƒɛƒɛɛ kpakplaa ɔ́si ɔƒɛ katukɔ úbekpo na mmɔ.

⁸Lɛla lɛni na búnu ni, ani kani na bɔ́nu ku bula anumi na bula Katɔti ɔni ndi Unwoti Katɔti Ɔyikune Ƒui ɔma ɔni ntulo kemmo. Na ɔdubɔgyumana ɔma ɔmɛni uwi ƒui.

⁹O Unwoti Katɔti, bɔɔkali taanu ƒula bɔyɔ bɔni naaavumana kudii na ƒula kakpakɔ mɛni.

¹⁰Na kalɛ na ƒula lɛnyi líbomo ni, lɛni kani na buumwi-ɔ na kayawi kesi kesii. Édie ƒula kɔdianu kɔnu na ábla ɔyikun ala ala ani nse siin.

¹¹Amii bani nkya Sion Kɔbi bɛya ebiti ada-mii. Na lɛlɔ lɛyɔ amii bani nkya Yuda lɛma. Ɔsika Katɔti ɔɔtɛ litemi ulu lɛlɔ geen.

¹²Bɛka bɛmana Sion ɔma ɔmmɔ na bɛka nwuna kɔgyumanakɔ kɔmmɔ.

¹³Na bɛsia ɔma ɔmmɔ anu na bɛnu awodu kpakplaa ani náka ámana-nwu ku katu taasia lɛtɔ kpakplaa bonwu lɛni na bátu bényene. Na bɛnu kɔgyumanakɔ kɔmmɔ kalɛ bɛti lɛla lɛni na bɛdubɔsu bina kaba kemmo bebi bani nkpɛ badubo.

¹⁴Ɔsika Unwoti Katɔti ɔmɛni ndi bula Unwoti ɔsi ɔƒɛni úsela ƒui. Na anwu ndubɔtɔnku-bu uwi biala.