Read Lelemi Kɔgya 55 Bible Online

Kɔgya 55 - Lelemi bible

Kɔgya 55

¹Katɔti, buvele se atu na enu mina bɔkpali. Na teni ala ani muuvele-ɔ.

²Nu-mi bɔkpali, ɔsika etemila pii eekpóku-mi na lɛ́ta líƒu

³na mina bekisine kɔvanu ku kalɛ na baabla-mi kalala ɔsu. Na béti kɔnyi bákya-mi kati kati.

⁴Kayi kaakpulu-mi na muunú ɔlɛ geen na use aani bukpi muedi na ndubo.

⁵Liƒu ku bɔyia bonwu búƒie-mi na lɛlɔ lɛɛtɔ́-mi kpakpaakpa.

⁶Na lɛ́su nnii si avwi na nka mbo aani abloduma ni, nka ndubuveyi lɛtɔlɔ ntélie kesii kadi ntaanwuna.

⁷Ndubusie na ntélie kalɔ kakwiidi kemmo na ɔgyu kakaaka.

⁸Ndubo bɔbabla na lɛwia kabɛkɔ na ɔƒɛƒɛɛ kpakplaa ku ɔnantu ɔni mɔɔna ɔsu.

⁹Unwoti, ya na mina bekisine bammɔ beƒu. Na ebile bana kɔkwɛ kɔni na baakya kemmo ku kadɔ ku kekpo ku bekyuli ala bubile bɔni na mɔɔnu na ɔma ɔmmɔ kemmo.

¹⁰Bakɛ ɔma ɔmmɔ kemmo baaví usien ku ɔƒɛ. Na bakɛ awodu ammɔ lɛlɔ aani bagyumanane. Na baabla udunkpi ala amɛni.

¹¹Na ɔkɔ banyine ku ala bebilene ku bani mɔɔta teenye bekyuli lɛlɔ ɔkplu bɔdi báƒɔ-nwu lɛblɔnu lɛlɔ ƒui.

¹²Si nka mina bekisine muudumi-mi muedi na báta bénye-mi lɛlɔ ni, nka naaasu lɛla lɛdi na ndubɔbɛ mmomu.

¹³Nsu mina ɔvinkpana geen ɔni lɛ́ƒɔ lɛ́di lítulo mɔɔbla-mi ɔmɛni udu.

¹⁴Ami ku-nwu bɔ́vi ku kubiti aani bakpana na bɔ́sala lɛlɔ ku bekyuli bamba na bútákpa na Katɔti kakpakɔ.

¹⁵Unwoti, bekyuli bani ƒui na báta bénye-mi lɛlɔ ni, ya na kukpi kuyu-ma kɔtu na bayu kekpine ulu kɔnakunwi. Ɔsika kalala bɔbla bɔ́ƒɔ-ma kaduli ku bana kɔyi kemmo.

¹⁶Nsu ami amu ni, Unwoti Katɔti, mɔɔkpali-ɔ nnii ƒɔ-mi, na adubɔƒɔ-mi sɔsɔ!

¹⁷Ɔtanta ku ɔƒiiwi ku usien ƒui ndubɔkpali Katɔti, na liwulo lɛkya-nwu na ala ani muukpóku-mi ɔsu. Na ɔdubunu ute-mi.

¹⁸Na ɔdubɔƒɔ-mi na kekpo kani na ami ku mina bekisine bani na mina lɛƒɛnyi ƒui buukpó, na naaaƒɔ ɔlɛ ɔdi.

¹⁹Unwoti Katɔti ɔni mɔɔdi lɛla biala lɛlɔ úsela uwi ƒui ni, ɔdubunu-mi bɔkpali na ɔni-ma kɔtu. Ɔsika baláyia Katɔti na béni lɛnɔ banii balavumana kudi kudii na bataabu-nwu.

²⁰Mina ɔvinkpana ɔ́ta únye-mi lɛlɔ ɔmmɔ ɔsu úbile ami ku-nwu kɔkpana.

²¹Nwuna kenye kemmo etemila ebo emini aani nnɔ eku. Nsu kekpo kasusu nkya-nwu kayi. Na nwuna etemila ese ƒɛƒɛɛ aani nnɔmii. Nsu eekúlo aani kewii.

²²Ti ƒula ala ani muukpóku-ɔ kya Unwoti enu kemmo. Na ɔdubo-ɔ bubunku na ɔda-a kpakplaa, ɔsika ulaya na bekyuli bani nsiaku-nwu kama siin baasɔ taakya lɛbibo kemmo.

²³Nsu ni, O Katɔti, adubɔya na bekyuli badune ku ɔkɔ banyine bamɛni bekpi na bakya-ma kaƒiɔtɔ kemmo na bayii udu ɔni na bana ngba bulene. Nsu ami ni, mina anu ƒui adubɔsia-a lɛlɔ.