Read Lelemi Kɔgya 58 Bible Online

Kɔgya 58 - Lelemi bible

Kɔgya 58

¹Amii kalɔ lɛlɔ bayikune, bɛɛtɛmi taasiaku ulu geen ɔmmɔ lɛlɔ? Na bɛɛtɛ bekyuli etemila na ulu siin lɛlɔ?

²Kudii uuuse lɛni, mmomu kalɛ na binwini ala kekuma kasusu kani na biilie teeti uwi biala. Na bina enu aata pla pla kalɛ na bɛbla kalala na bayawine akɔ.

³Bekyuli bekpidi ni, likpidi kani na beelie taabla uwi biala. Na baanyi ɔkɔ lɛnɔ ɔ́si bana bɔwɔ uwi ƒui.

⁴Ugyulo ukpidi ɔkya-ma kenye aani balakpi kalɛ. Na atu éti-ma aani kalɛ na avan atu eeti.

⁵Na use-ma aani kalɛ na avan ulenu si bekyuli bani mɔɔkanti taakya balakpi baakanti taakya-nwu. Na ulenu si beedie bana bɔkanti lɛnu lɛnɔ.

⁶O Katɔti, mina bekisine bese aani bagyata bani na bana anumi égyie anwuɔsu na muuvele-ɔ nnii ƒɛ-ma anyi.

⁷Ya na bana uwi ɔvi aani kalɛ na ntu bɔɔgbá taatɔlɔ. Na bayii udu aani livo lɛni na banya lɛgba bávi-ni lɛlɔ na lɛ́yɛyɛ.

⁸Ya na babla aani ɔkɔɔkɔ evuo ani kemmo na lɛna liiibo. Na babla aani kaƒɔ kani nébie na kelenwini ubi ɔni muulie ngba taanu ɔƒɛ.

⁹Na kalɛ na libui lɛni na básia liyu ogya lɛlɔ liiibo ogya bɔƒɔ ni, Katɔti ɔyila-ma udu na ɔbabla utulo lɛni.

¹⁰Na lɛlɔ lɛdubɔyɔ bekyuli bani nse siin si bánu kalɛ na baaní belikplune bamɛni kɔtu. Na bana ubugya ɔni nwi kalɔ ɔɔgbá ni, bekyuli babuni badubɔkya lɛgba bavi-nwu kemmo.

¹¹Na bekyuli badubɔsu banini, “Sɔsɔ ni, báƒɔ bekyuli babuni kayu. Ɔsika Katɔti ɔni mɔɔtɛ litemi ulu lɛlɔ mɔɔdi kayawi lɛlɔ.”