Read Lelemi Kɔgya 63 Bible Online

Kɔgya 63 - Lelemi bible

Kɔgya 63

¹O Katɔti, awɔ ndi mina Katɔti ɔni kama ulu na mɔɔwia kpakplaa aani kalɛ na utukwɛ ɔɔda ukyuli na kalɔ kakwiidi lɛlɔ.

²Ɔmmɔ ɔsu ya na mina anumi anu-ɔ na ƒula kakpakɔ na lɛnu kalɛ na ebo ɔyikun na eekeye.

³Kalɛ na aayɔ́-mi uwi ndi uwi ni, ɔɔyu-mi kayi teetulo ngba bɔni alati na nli. Ɔmɛni ɔsu na ndubumwi-ɔ.

⁴Na ndubo-ɔ enu butaagya uwi biala na nli ngba. Na ndubɔtala enu katɔ na lɛkpali-ɔ.

⁵Ndubudie lɛnu ku ebiti limwi-ɔ na kayi kayɔ-mi buɛɛ aani ukyuli ɔni na bálɔ bésienku limeyi kadikɔ na ɔ́kɛ ala abuni ƒui ɔ́di na émo-nwu kaduɛ.

⁶Na si ntɛ mina lɛtɛla lɛlɔ ni, naaayiƒala-a mmomu mɔɔkali taanu-ɔ usien umodi.

⁷Ɔsika awɔ kani muubunku-mi uwi biala na ƒula avwi ɔyuli kalɔ na muudie ɔnu na lɛlɔ lɛɛyɔ́-mi.

⁸Awɔ na líƒie nda kpakplaa, na awɔ lɛnɔ ada-mi kpakplaa ku ƒula kɔdianu kɔni mɔɔtina ƒula ɔyikun.

⁹Nsu bekyuli bani mɔɔwia-mi ngba bayila ni, ama ndubo kaƒiɔtɔ kemmo buduo.

¹⁰Kekpo kadubo-ma buƒie. Na kuwii kenye na badubo bɔtɛ. Na beƒiebuo ndubo-ma ɔlɔna bɔkun.

¹¹Nsu lɛlɔ lɛdubɔyɔ ɔga ɔni na Katɔti ɔ́ya na ɔ́di lɛlɔ. Na bani ƒui nése kenye ɔkɛnku Katɔti lɛnyi lɛlɔ ni, badubo-nwu lɛnyi bumwi. Nsu ɔkɔ banyine ama balakana kenye bubimi.