Read Lelemi Kɔgya 65 Bible Online

Kɔgya 65 - Lelemi bible

Kɔgya 65

¹O Katɔti, ɔ́manku ka bekyuli ƒui bemwi-ɔ na Sion. Na babla basia kenye kani na bése béte-ɔ ƒui lɛlɔ na mmɔ.

²Ati, awɔ muunú bekyuli ƒui bɔkpali si beevele-ɔ ala anwuɔsu na ukyuli biala ɔdubo kenye budie na nwuna alaekpidi lɛlɔ.

³Na si uwi ɔni na bula alaekpidi aayu-bu unu taagya ni, awɔ muuti-nya taakyie-bu.

⁴Lɛlɔ lɛdubɔyɔ bekyuli bani na awɔ ɔlati áƒuna ka bebelie-ɔ kudɔ na ƒula kakpakɔ kedee kaduli. Na badubɔkɛ ebiti geen na ƒula kudɔ bulie kemmo na mmɔ.

⁵O Katɔti, bula ɔƒɔne, eenú-bu bɔkpali na eebunku-bu ɔkɛnku ƒula akɔla budie taatina lɛlɔ. Kayawi bekyuli ƒui anu asia-a lɛlɔ ku bani na beli ɛpu ɔvi.

⁶Ebo ɔyikun, na ƒula ɔyikun ɔmmɔ lɛlɔ na áya na abi ƒui enye ana kenyekɔ.

⁷Kalɛ na eeboku ɛpu ɔni mɔɔnwanɛ lɛlɔ na uubó ku kudu kalɔ buɛɛ ni, lɛni kani na eeboku kadi bekyuli lɛsɛ lɛni na baakya kalɔ.

⁸Na bekyuli bani nli ɔgyu kalɔ bénu ƒula akɔla budie taatina ammɔ na baayia. Na bekyuli beebó ƒula ablala amɛni kudu ku lɛlɔyɔ ɔ́si ɔtanta útédu ku useyi uwi.

⁹Aanu kalɔ kammɔ lɛlɔ kaduɛ. Na aaya na ɔnantu ɔɔna teewi-ka lɛlɔ na kaadia edula. Na ntukpa buubo ntu na aayá na edula lidu lidu aalɛ́.

¹⁰Aayá na bula mmo bɔɔƒɔ́ ntu na kalɔ kaayɔ́ teete alakpi ku egyii lidu na aalɛ́ lili.

¹¹Lɛkwa lɛɛdianku bekyuli na baaƒɛ edula pii. Na bekyuli baalɛ́ku-nya taasiku lɛƒɛnyi ƒui lɛlɔ.

¹²Bebuo kadikɔ ƒui kálɛ livo lɛbuni na abi ammɔ aatina aani lɛlɔ mɔɔyɔ́-nya.

¹³Baƒonu báƒɔ abi lɛlɔ ƒui. Na anta ku edula bamba áƒɔ ɔkwalɛ ɔmmɔ lɛnɔ na use aani ebiti mɔɔda lɛla biala na beebó kudu ku lɛlɔyɔ.