Read Lelemi Kɔgya 66 Bible Online

Kɔgya 66 - Lelemi bible

Kɔgya 66

¹Amii kayawi bekyuli ƒui, bibo Katɔti kudu ku lɛlɔyɔ.

²Na bidie lɛnu bimwi nwuna lɛnyi na bɛtina kalɛ na uukeye.

³Bɛsu Katɔti bɛnini, “Ƒula ablala adi akɔla budie taatina. Na ƒula ɔyikun bonwu ɔni na ebo ɔsu ni, ƒula bekisine béboku lɛlɔ kalɔ béte-ɔ ku bɔyia.

⁴Kayawi bekyuli ƒui beeboku lɛlɔ kalɔ teete-ɔ na beedie lɛnu teemwi-ɔ.”

⁵Bibo na bibanu akɔla budie taatina ani na Katɔti ɔ́bla na bekyuli akɔ.

⁶Ɔ́ya na bula nana bene bábwɛ bávi Ɛpugyie ntɛ na bakɛ lɛgba básia kalɔkplu bávia. Bibo na bɔkɛ ebiti na lɛla lɛni na ɔ́bla ɔsu.

⁷Nwuna ɔyikun unengudi kemmo na ɔɔdi kayawi bekyuli ƒui lɛlɔ úsela uwi ƒui kemmo. Na nwuna anumi aanu kadi ƒui bekyuli ablala na lɛdi lítabɛ-nwu. Kayi katatɔlɔ batuɔkplune na bata benye-nwu lɛlɔ kudii.

⁸Amii kadi bekyuli ƒui, bimwi Katɔti ku kudu momoomo.

⁹Anwu nda-bu na bɔmu buli ngba na bunye bute-nwu na bútebuli.

¹⁰Katɔti, ákɔku-bu ánu aani kalɛ na baakya sika ɔƒualadi ɔgya kemmo taabla-nwu sɛɛn kalɛ na ɔdia bɔnu.

¹¹Áya na búduo lɛbibo kemmo aani kalɛ baanú kakpagyuɛ. Na bɔ́nɔ aani kalɛ na beeti etila ku unu bonwu ɔdi.

¹²Áya na bekisine bákɔ bánya-bu lili na use aani ntukpa bɔni néyi kemmo ku ogya kemmo na bɔkɛ. Nsu kawɔlɔkɔ ni, bɔ́da bɔ́lɛ kalɔ kani lɛlɔ na ala abuni pii akya.

¹³Ndubuti akpala liboku mbakyula lite-ɔ na ƒula kakpakɔ. Na ndubuti ala ani kenye na líse liboku-ɔ.

¹⁴Ala ani na líbimi mina kenye lɛ́su na líse kenye uwi ɔni na nkya lɛbibo kemmo ni, ndubuti-nya liboku.

¹⁵Ndubɔkyula bebuo bani nélie lɛmwi aani akpala lite-ɔ. Na baƒonu bagyani bani makyula mmɔ uyɔ ɔkɔ ubo-ɔ kudɔ. Ndubuti ɔmantɛ bakɔ ku bese lɛnɔ lɛkpa-a.

¹⁶Bibo na bibenu, amii bani mɔɔyia Katɔti, na ndubɔsu-mii ala ani na ɔ́bla úte-mi.

¹⁷Lɛ́kpali-nwu momoomo nnii ubunku-mi. Na lɛni kani na muumwi-nwu lɛnyi kedee.

¹⁸Na si likpidi nkya-mi kayi iye kasusu kemmo ni, nka Unwoti útakpete-mi.

¹⁹Nsu geen geen ni, Katɔti únu-mi bɔkpali na ɔ́bla lɛla lɛni na muuvele-nwu úte-mi.

²⁰Muumwi Katɔti, ɔsika úteni ɔnii ɔsɔ ulabla-mi lɛƒɔndia aani kalɛ kani na ɔɔbla teete-mi uwi biala ka lɛ́kpali-nwu.