Read Lelemi Kɔgya 68 Bible Online

Kɔgya 68 - Lelemi bible

Kɔgya 68

¹Katɔti, ta na ƒula bekisine begyingya. Na bekyuli bani muukisi-ɔ bekeli batɔlɔ ƒula anumi.

²Bɔku-ma lɛku ƒula anumi aani kalɛ na uyɔ ɔɔyii taakya. Ya na belikplune bayii ku udu aani kalɛ na kɔma kɔɔnani na ogya lɛlɔ si áda álɛ-ma lɛlɔ.

³Nsu bekyuli bani nse siin ama ni, lɛlɔ lɛyɔ-ma. Na aya na balɛ lili na awɔ Katɔti anumi na ebiti aƒɔ-ma lɛlɔ kemmo ƒui.

⁴Bidie lɛnu bite Katɔti, na bidie bumwi lɛnu bɛkɔliku-nwu lɛnyi katɔ. Bidie bumwi lɛnu momoomo bite anwu ɔni nli katɔ liƒlukutu lɛlɔ ɔɔví. Nwuna lɛnyi ndi Unwoti. Bɛkɛ lɛlɔyɔ na nwuna anumi!

⁵Awɔ Katɔti, bekpinebi ɔti, awɔ mɔɔnu bekpinele lɛlɔ ɔ́si ƒula keliekɔ kedee kesii kani na elie.

⁶Katɔti ɔɔyá na bekyuli bani na bédie lɛti basɔ baasála ku bana bekyuli. Na bani na bákya aban ɔtɔ ni, ɔ́ya na bédie-ma ku lɛnu budie na bánwuna. Nsu bani náta bénye nwuna litemi lɛlɔ ni, kalɔ kakwiidi kani na káƒɔ ogya kemmo na bɔdubo bɔkya.

⁷Lɛni kani na átɔnku bula nana bene na kukuuku uwi ɔmmɔ na básia kalɔ kakwiidi kammɔ kemmo bálɛ na bánwuna.

⁸Uwi ɔmmɔ kemmo ni, kalɔ kákunku na kayaa kálɛmi na ɔnantu ɔ́na, ɔsika Sinai kɔbi Katɔti ɔdubo. Na anwu ndi Israel Katɔti.

⁹Áya na ɔnantu úwi na kalɔ kani nákwii mmɔ kásɔ kábla ɔwɔdi.

¹⁰Na ƒula bekyuli bákɛ keliekɔ. Na ɔkɛnku ƒula lɛƒɔndia ɔsu ni, bani ƒui mɔɔyáki ala bémo.

¹¹Katɔti údie lɛdi, na beleku pii badi básu lɛla lɛni nálɛ mmɔ na bégyingya-ni, banini,

¹²“Baga ku bana bekpone békeli bátalɔ na Israelƒuɔ beleku béle ala ani báda béwi ka kekpo kéƒie-ma.”

¹³Na beleku bani na nka bakya baƒonu akɔ baanu-ma lɛlɔ na bétesie kekpo ni, bákɛ sika ɔƒualadi ku ugyiedi ɔni na bánwamana bámana babloduma bani na bánwi avi lɛlɔ na eekeye na ɔƒɛ kemmo mmɔ.

¹⁴Na uwi ɔni na Katɔti Ɔyikune Ƒui ɔ́bɔku baga bammɔ lɛni ni, etubankɛ atakpɛ bonwu bonwu adi áyu éwi Salmon Kɔbi lɛlɔ.

¹⁵Basa Kɔbi, adi kɔbi kunengudi kɔni mɔɔdia bɔnu na ƒula eli ébo ánu na ákɔ álɛ kangyaa.

¹⁶Bi ɔsu na anumi asɔ eegyie-ɔ na Sion Kɔbi kɔni na ami Katɔti lɛ́ƒuna ka lilie lɛlɔ úsela uwi ƒui lɛlɔ?

¹⁷Uwi ɔni na Katɔti ɔ́yu úbo nwuna bekyuli kudɔ na Sinai kɔbi lɛlɔ ni, ɔkɛ ku nwuna bapɔnkɔ kɛɛkɛ linengudi mpim mpim lɛlɔ.

¹⁸Uwi ɔni na ákɔ ésie katɔ ƒui ni, éti bekyuli bani na ékpo áƒɔ ƒui átɔlɔku. Na éte-ma etela. Na ƒula bekisine bani naaayɔ ka elie mmɔ muedi lɛnɔ béte-ɔ ala.

¹⁹Bɛya bumwi Katɔti, ɔsika anwu muubunku-bu limeyi ndi limeyi. Na anwu ndi bula Katɔti ɔni mɔɔƒɔ́-bu ngba.

²⁰Unwoti ɔni ntulo ƒui ndi bula Katɔti ɔni muubunku-bu na uudie-bu kukpi kemmo.

²¹Katɔti ɔdubɔbwɛ nwuna bekisine bani nnye likpidi bɔbla lɛlɔ uwi ƒui eli.

²²Unwoti ɔ́su ɔnini, “Ndubunwini ku bina bekisine liboku-mii lɛsiku Basan kalɔ lɛlɔ ku ɛpu kalɔ kemmo kesii kani na bábɛ bakya.

²³Na bɛdubusie bɛvi bana ubugya ɔni bɛdubuwi kalɔ kemmo. Na bina bakpewɛ lɛnɔ badubɔyalɛ-ma ubugya.”

²⁴O bula ɔga ku Katɔti, bɔ́nu kalɛ na bekyuli lisu bonwu lɛdi bakɛ badubo babasiaku-ɔ na ƒula kakpakɔ kedee.

²⁵Na lɛnu bediene batɔ anumi, na bagyane bakpɛ kama. Na belekubi bani nda akasaa bakya-ma ntɛ.

²⁶Amii kasalakɔ kammɔ bekyuli ƒui, bimwi Katɔti. Na amii Yakobo kɔdua kemmo bebi ƒui, bimwi Unwoti lɛnyi!

²⁷Na Benyamin kɔdua kɔni nse blii suɛ ntulo ƒui ntɔ-ma anumi. Na Yuda ku nwuna benengu basia. Na bani nsia ndi Sebulon ku Neƒtali benengu.

²⁸O Katɔti, die ƒula ɔyikun keyi tina ƒula bekisine bammɔ. Ɔyikun ɔni kani na éti ékpo éte-bu.

²⁹Na édie-nwu keyi ásiku ƒula kakpakɔ kedee, kesii kani na baga beeti etela teeboku-ɔ.

³⁰Bɔku bula bekisine bani nse aani beƒiebuo na ketudɔ alakpi akɔ. Bese aani bakɔ ku bebi. Bɔku-ma tédu ka béboku lɛlɔ kalɔ na béti bana sika ɔƒualadi béboku-ɔ. Na egyingya bekyuli bani na kekpo ogya kani na beli baakya.

³¹Bagabi badubɔsi Egyipte bebo. Na Etiopia kadi bekyuli badubo enu katɔ bɔkɔliku na bakpali awɔ Katɔti.

³²Amii kayawi lɛga kadikɔ ƒui bekyuli, bidie lɛnu bimwi Katɔti bula Unwoti.

³³Anwu nli kayaa liƒlukutu lɛlɔ ɔɔví na katɔ ɔ́si kukuuku. Mmɔ na uudie nwuna lɛdi lɛni mbo ogya taasiku.

³⁴Bibo Katɔti ɔyikun kudu, ɔsika nwuna lɛgadi lɛka lɛ́mana Israel kalɔ ƒui. Na nwuna ɔyikun uudie lɛlɔ taatina nwaa na kayaa.

³⁵Katɔti lɛlɔ libo líƒu na nwuna keliekɔ kedee kemmo. Na anwu ndi Israel Katɔti. Anwu muute nwuna bekyuli ɔyikun na ɔ́ya na bebo kenyekɔ. Bimwi Katɔti!