Read Lelemi Kɔgya 69 Bible Online

Kɔgya 69 - Lelemi bible

Kɔgya 69

¹O Katɔti, die-mi, ɔsika ala eekpóku-mi aani si ketu néyi kábadanku-mi limɔ.

²Na lɛba lɛɛyɔ́ liƒie-mi, ɔsika mina lɛgba lilakɛ kenyekɔ. Ligyu kemmo na ḿbedu na ntu bɔni mɔɔgbá momoomo mmɔ bɔɔyɔ́ butiku-mi.

³Lɛ́ɛkpali lɛ́nɔ na ɔkwɛ ɔ́kwii-mi. Na anumi aanwú-mi ɔni na líinye mɔɔnu-ɔ anumi taanɔ.

⁴Na mina bekisine bani muukisi-mi keeke bemomo betulo mina lili linwini. Na bani mɔɔwia-mi ngba bayila lɛnɔ bebo ɔkplu, na ɔkɔ ala sɔɔn na baasu taasiku-mi lɛlɔ. Na béƒie-mi ala ani na ɔɔɔdi buyu na líyu-nya baƒɔ-mi kudɔ.

⁵O Katɔti, agyi alaekpidi ani na lɛ́bla na kɔdɔlɔ kemmo lɛ́ƒiɔ-ɔ, na átabɛ-ɔ.

⁶O Israelƒuɔ Katɔti Ɔyikune Ƒui, taya na kɔƒa kukpo bekyuli bani na bana anu asia-a lɛlɔ na ami ɔsu.

⁷Ɔsika awɔ ɔsu na bekyuli beedumi-mi na kɔƒa kɔ́ƒɔ-mi anumi.

⁸Línwini ɔƒɔ na ami ɔlati bekyuli akɔ. Na mina benibi baanu-mi sɛsɛɛ.

⁹Ƒula ɔtɔ lɛlɔ bɔnu anumi adubo-mi bugyie aani ogya ɔni mɔɔda na mina lɛlɔ kemmo. Na edumi ani na bekyuli bédumi-ɔ ni, ana ƒui ébo ábasia-mi lɛlɔ.

¹⁰Uwi ɔni na línyimi kenye na muuwulo na líboku lɛlɔ kalɔ líte-ɔ ni, bekyuli bákɛ-mi lɛlɔ edumi.

¹¹Na ka líni mina ɔlɔna adala abuni na línyimi adikpi ni, línwini lɛmala líte-ma.

¹²Mina lɛlɔ litemi kani na litemi batɛne ku benengu bada baasu.

¹³Nsu ami ni, awɔ kani mɔɔkpali teevele, O Unwoti. Na uwi ɔni na awɔ ɔlati ánu ka ɔ́manku ni, enu-mi bɔkpali na ƒula lɛƒɔndia bonwu kemmo. Na ka aadi ƒula litemi lɛlɔ na eebunku ukyuli ɔsu ni,

¹⁴die-mi ngba lɛku lɛba bonwu lɛmɛni kemmo. Na edie-mi na mina bekisine enu kemmo na ketu keleƒie-mi.

¹⁵Taya na ketu keyi kavi-mi lili na ligyu lɛmmɔ lɛnyina-mi, iye liduo kaƒiɔtɔ kemmo.

¹⁶O mina Unwoti, nu-mi bɔkpali na kalɛ na aayɔ́ bekyuli uwi ndi uwi na aanu kɔnyana pii lɛnɔ ɔsu.

¹⁷Teti ƒula lɛlɔ tabɛla ami ƒula kabla ɔblane, ɔsika nkya lɛbibo bonwu kemmo. Anwuɔsu yile-mi bubebunku.

¹⁸Ni de-mi, na aƒɔ ete-mi na lɛkɛ bɔnwuna lɛsiku mina bekisine enu kemmo!

¹⁹Awɔ ɔlati agyi kalɛ na beedumi-mi na baakya-mi kɔƒa na nsɔ ntaƒɔ kuye kɔdi na bekyuli anumi. Na agyi mina bekisine ƒui.

²⁰Edumi émo-mi na kayi kaakpulu-mi, na nsɔ liiibo lɛnunsia lɛdi. Lɛ́nu ulu ka ukyuli ɔdi wabanu-mi kɔnyana, nsu keeke. Na lɛ́nu ulu ka ukyuli ɔdi ubasia-mi kɔnu, nsu anwu lɛnɔ keeke.

²¹Béti likpila béte-mi banii adila. Na béti ntɛ bɔnani béte-mi banii ndu utukwɛ.

²²Ya na bana limeyi kadikɔ kani báklibi bése kenwini kubu kubi-ma lɛlɔ na betulo na bebuli beduo ɔgbankpi kemmo.

²³Na aya na bana anumi abwɛ na batanu lɛla lɛdi batati, na aya na bana lɛbibo linwini etila asia-ma lɛlɔ uwi biala.

²⁴Ya na ƒula kɔnyi kubo-ma lɛlɔ. Na bebo abi na kalɛ na éti kɔnyi ákya-ma kenye.

²⁵Bɛsia bana liku kɔnu bise, na ɔdi biala utelie mmɔ.

²⁶Ɔsika ukyuli ɔni na áani kɔtu ni, ama basɔ benye beekpóku-nwu. Na alɛbi ani na ɔ́ƒɔ ku ɔlɛ ɔni na uunú únwini-ma agyolo na baatu taama.

²⁷Ya na bebo abi basia kama, na batakɛ ƒula bɔƒɔ bɔdi.

²⁸Nine bana anyi die ƒula ngba ɔku kemmo. Na taƒɔ-ma takya ƒula bekyuli babuni akɔ.

²⁹O Katɔti, kɔliku-mi tényene kesii kani na lɛkɛ bɔnwuna na aƒɔ-mi, ɔsika muubó abi na lɛ́yila lɛnunsia ƒui.

³⁰Ndubudie ɔnu limwi Katɔti, na lɛgya-nwu enu, na libo-nwu kudu lite kadi ƒui kalɛ na ubo ɔyikun.

³¹Na ɔmɛni ɔdubɔƒɔ-nwu anu utulo ka liti bebuo iye akɔ ku ese kangya lɛkpa lite-nwu.

³²Na si bekyuli bani muubó abi na bekyuli enu kemmo bánu ɔmɛni ni, kubiti kɔdubɔda-ma.

³³Ɔsika Katɔti uunú bawabane bɔkpali na ulédie nwuna badi atu na basɔ bakya lɛbibo kemmo.

³⁴Katɔ ku kalɔ ala ƒui bimwi Katɔti, ku ɛpu ku ala ani ƒui nkya-nwu kemmo.

³⁵Ɔsika Katɔti ɔdubɔƒɔ Sion na ɔsɔku Yuda lɛma linengudi lɛmmɔ ƒui ɔtu. Na nwuna kabla bablane ƒui badubɔkya mmɔ na beti mmɔ benwini bana ɔdi.

³⁶Nwuna kabla bablane bebi ndubo mmɔ buti bɔbla bana ɔdi. Na bani mɔɔyɔ́-nwu lɛnyi ƒui badubulie ɔma ɔmmɔ kemmo.