Read Lelemi Kɔgya 72 Bible Online

Kɔgya 72 - Lelemi bible

Kɔgya 72

¹O Katɔti, tina ƒula ɔga kalɛ na ɔtɛ litemi ɔsiaku ƒula ulu siin lɛlɔ kalɛ kani na awɔ aabla.

²Na ɔtɛ ƒula kadi bekyuli etemila na ulu siin lɛlɔ. Na ɔdi litemi geen lɛmmɔ lɛlɔ ute bekyuli bani nse kpɛtɛ kpɛtɛ.

³Ya na kalɔ kammɔ ƒui ku abi ammɔ adia edula ete ƒula kadi bekyuli na ɔtina kalɛ na ƒula ɔga ku bekyuli bammɔ baabla ala siin.

⁴Na unye kpakplaa ute bawabane na ubunku bani mɔɔyaki ala na ɔyila bani mɔɔnya bekyuli taakya ulikplu kemmo udu!

⁵Kɔlɛ kɔlɛ kɔni na ɔƒɛ ku kɔbuli kɔɔtu teekeye ni, ƒula ɔga lɛgadi lise liteesie ɔ́si kaba úsie kaba úsela uwi ƒui kemmo.

⁶Na aya na ƒula ɔga bekyuli bɔtɔnku bɔbla aani kalɛ na ɔnantu ɔɔna teewi kemmo edula lɛlɔ iye uuwi na kalɔ kaayɔ́.

⁷Ya na ala bɔbla siin bɔƒɔ kalɔ kammɔ ƒui lɛlɔ na nwuna lɛga bɔdi butu uwi. Na atu bɔyɔ ku keyi buɛɛ kaƒɔ-bu akɔ wetédu ka kɔbuli kɔ́da bɔtu teewi-bu lɛlɔ kɔ́ya.

⁸Ɔdi lɛlɔ ɔsi ɛpu ɔvi unwi útédu ɔkladi. Na ɔsi Euƒrate Ketu bonwu kɔtu útédu kalɔ kesii biala.

⁹Bekyuli bani nli kalɔ kakwiidi lɛlɔ ƒui badubo babakya lili kalɔ bete-nwu na ɔdi-ma lɛlɔ. Na nwuna bekisine ƒui bayu bebi kalɔ na ɔtumu akɔ na nwuna anumi.

¹⁰Tarsis ɔga ku ntuntɛ kɔlɔ baga ƒui bataaƒɔ lɛlɔ bɔdi kayu teete ƒula ɔga. Na Sieba ku Seba baga lɛnɔ beti etela beboku ɔga ɔmmɔ.

¹¹Na baga ƒui bakya lili kalɔ bete-nwu. Na kadi ƒui babla-nwu kabla.

¹²Ɔsika uudie bekyuli bani ƒui mɔɔyaki lɛla lɛdi na bana lɛbibo kemmo ku bani nse kpɛtɛ kpɛtɛ ku bani neeebo bebunkune.

¹³Ɔɔnu bani nse kpɛtɛ kpɛtɛ kɔnyana na uudie bana ngba na ɔgbankpi kemmo.

¹⁴Na bani na beekpóku na baanya-ma taakya ni, uudie bana ngba na lɛbibo ku kukpi kemmo.

¹⁵Ya na Ɔga ulie ngba gyɔlɔɔ na beti sika ugyiedi basiku Seba beboku-nwu. Na bekyuli bataakpali Katɔti uwi ndi uwi na nwuna lili. Na beteete-nwu kusɛ kusɛ limeyi ndi limeyi.

¹⁶Ya na kalɔ kammɔ kadia edula pii. Na edula ammɔ aƒɔ abi lɛlɔ. Na adingyii ammɔ alɛ lili abla aani Lebanon lɛku egyii. Na bekyuli bemomo na lɛma linengudi lɛmmɔ kemmo aani kalɛ na livo lɛɛƒɔ́ kemo.

¹⁷Ya na ƒula ɔga ɔƒɔ lɛnyi na lisie ɔgyu lɛkya bekyuli akɔ uwi ƒui kalɛ kani na ɔƒɛ ɔɔtu teekeye. Ala atɛnku kadi ƒui bekyuli na beteete ɔga kusɛ kusɛ.

¹⁸Bimwi Unwoti Israel Katɔti, ɔsika anwu kani mɔɔbla akɔla ala budie taatina amɛni udu.

¹⁹Bemwi-nwu lɛnyi lɛni muukeye úsela uwi ƒui. Na nwuna bukeye bɔƒɔ kalɔ lɛlɔ ƒui. Ɔsia lɛni! Na ɔsɔ ɔsia lɛni!

²⁰Lɛni na Yese ubidi Ɔga Dawid ɔ́wɔlɔ Katɔti bɔkpali.