Read Lelemi Kɔgya 73 Bible Online

Kɔgya 73 - Lelemi bible

Kɔgya 73

¹Geen geen ni, Katɔti ubo lɛƒɔndia ute Israel kadi bekyuli bani nse sɛɛn na bana kayi kemmo.

²Nsu ami ni, lɛ́ya bugyiile bubuli.

³Ɔsika anumi égyie-mi na bekyuli bani mɔɔtalaku lɛlɔ katɔ ku bani na bebo kalala lɛlɔ ka ala aatɛku-ma ɔsu.

⁴Belebo abi adi, anwuɔsu bebo ɔlɔkplu na lɛla lɛdi lilekpoku-ma.

⁵Ɔgbankpi ɔdi ulasiaku-ma aani bekyuli bamba.

⁶Ɔmmɔ ɔsu baakun lɛmɛnɛ na baatina lɛlɔ. Na kalɛ baatú bekyuli na baanu-ma anumi únwini awu na bakya.

⁷Anumi élie-ma lɛmwi na alaekpidi kabla ku kasusu káƒɔ-ma kayi kemmo. Na likpidi kɔkwɛ sɔɔn na baakya.

⁸Baamá bekyuli na baanu-ma kalɔ kalɔ na baanya-ma taakya.

⁹Baatɛmi enyekpi na Katɔti lɛlɔ na baabɔku bekyuli taavinku kalɛ kalɛ na kalɔ lɛlɔ.

¹⁰Na ɔmmɔ ɔsu Katɔti bekyuli bammɔ lɛnɔ beenwíni teewi na balánu bana bɔƒiɔ taati mmomu baaƒɔ́ lɛla lɛni na básu mmɔ aani litemi geen.

¹¹Na baabla ɔtɔtɔ ukpidi taasu ka Katɔti ɔɔɔdubo ala ani baabla bɔnu bɔti.

¹²Na lɛni geen na belikplune bamɛni bese. Bebo ala pii, nsu bétemo tɔ na baawia abambadi teebu.

¹³Na kalɛ mɔɔkya ɔkplu nnii mɔɔbla lɛlɔ sɛɛn kalɛ na naaabla likpidi ni, keeke na ami mɔɔbla ɔmɛni.

¹⁴O Katɔti, enye aanu na muubó abi limeyi limodi. Na aaní-mi kɔtu ɔtanta biala.

¹⁵Si enyekpi ammɔ udu na mɔɔtɛmi ni, na naaabla ala aani ƒula bekyuli akɔ unwi.

¹⁶Na muuti kasusu na lɛla lɛmɛni lɛlɔ uwi ndi uwi, nsu neeenu-ni kalɔ

¹⁷úti útédu ka líduo ƒula kakpakɔ kedee kemmo. Mmɔ na ntánu lɛ́ti lɛla lɛni ndubo balalane bammɔ bɔbla.

¹⁸Adubo-ma buti buse kesii kani na kegyiile na begyiile betéduo kesii kani na badubɔyii udu.

¹⁹Liƒu ala bonwu aadá taalɛ bekyuli bammɔ udu lɛlɔ na baayii kɔnakunwi.

²⁰Na bana uwi use aani kalɛ na ukyuli ɔɔtɛ teegye kɔna na si ɔ́ta ni, ɔ́sa lɛla biala lɛ́vi.

²¹Uwi ɔni návi ni, ntaanu ala amɛni na éteekpoku-mi na aatu-mi kayi.

²²Nsu kɔdɔlɔ ku lɛla tati ala na lɛ́bla. Na lílieku ebuo na ƒula anumi.

²³Nsu ina amu ni, nsiaku-ɔ kama uwi ndi uwi na ada-mi kɔnu lɛnɔ.

²⁴Awɔ mɔɔtɔnku-mi ɔkɛnku kasusu kani na aakya-mi kemmo. Na kawɔlɔkɔ ni, adubɔƒɔ-mi na liduo ƒula bukeye kemmo.

²⁵Liiibo ukyuli bamba ɔdi na katɔ liiitulo awɔ. Na lɛla lɛdi lɛnɔ liiibo kalɔ kamɛni lɛlɔ na mɔɔwia teetulo awɔ.

²⁶Mina kasusu ku ɔlɔna ɔdubɔyuɛ, nsu Katɔti ndi mina ɔyikun na anwu kani ndi lɛla lɛni na mɔɔwia uwi ƒui.

²⁷Na bekyuli bani mɔɔlɛ́-ɔ kama ni, ɔkɔ uuubo-nwu kemmo ka badubo bɔyii ku udu.

²⁸Nsu ami ni, ɔdia ute-mi geen ka lɛ́ni líde Katɔti. Na ndubɔkɛ katamikukɔ na Ɔyikune Ƒui Katɔti kudɔ. Na libo ala ani ƒui na ɔ́bla kudu lite bekyuli.