Read Lelemi Kɔgya 74 Bible Online

Kɔgya 74 - Lelemi bible

Kɔgya 74

¹O Katɔti, bi ɔsu na éni-bu ƒui lɛni? Na éti ƒula kɔnyi ákya abu bani na ada aani baƒonu lɛni?

²Tayiƒala ƒula kadi bekyuli bani na awɔ ɔlati áƒuna na édie-ma ése aani kaba bekyuli bani ndubɔdi ƒula ala. Kali nu Sion Kɔbi kesii kani na ábla na ɔdi ƒula keliekɔ dii.

³Bo na abanu ala ani ƒui na bekisine bébile na áyii udu na ƒula kakpakɔ.

⁴Bekisine béduo ƒula keliekɔ kedee na benye mmɔ baayoli momoomo. Na bábla ekposela bényene mmɔ baatina ka bádi lɛlɔ.

⁵Na benye beebile ala aani egyii ɔdane ɔni nda kadadi ɔɔƒɛ egyii teewi kalɔ.

⁶Na bébo ala ani bánwi bákya ƒula keliekɔ kedee mmɔ ƒui bábwɛ. Na béti bana kɔdadi ku abuala bamba ani na bada na báƒɛ akladi béwi kalɔ.

⁷Na bákyula ƒula kakpakɔ kammɔ ƒui. Na bébile kesii kani na eelie mmɔ ekisila.

⁸Básu lɛnɔ ka badubo-bu bususu kpɛtɛ kpɛtɛ na bɔyii udu. Na kesii kani na aasála-bu na ƒula anumi ni, bákyula mmɔ bene ƒui na kalɔ kammɔ lɛlɔ.

⁹Na bɔsɔ bulánu akɔla ala budie taatina adi, na ƒula kenye bediene badi lɛnɔ basɔ beeebo. Na bula akɔ ɔdi ɔɔɔgyi uwi ɛlɛ ɔni na ɔmɛni ɔdubuse lɛni utédu.

¹⁰Katɔti, adubunye ataanu na bula bekisine bataama-a na beteebile-ɔ lɛnyi uwi ƒui?

¹¹Bi ɔsu na éni anii alani-ma kɔtu na éti enu ákya lɛgba akɔ.

¹²Katɔti, awɔ ndi bula ɔga ɔ́si kukuuku ƒui na awɔ kani mɔɔƒɔ́ teete-bu uwi ndi uwi na kalɔ mɛni kesi kesii.

¹³Awɔ náya na ɛpu úle lɛlɔ akpa anyɔ ku ƒula ɔyikun. Na ketu kemmo beƒiebuo bammɔ ƒui ábwɛ-ma eli.

¹⁴Na liƒu kebweyi kani nkya ɛpu kemmo na ubo kɔlakpi udu mmɔ ni, ábwɛ-nwu lili na éti nwuna lɛna éte bebuo bamba bani nkya kalɔ kakwiidi kemmo aani bana lɛdila.

¹⁵Áya na abiɔ ku ntukpa ƒui bɔ́ƒɔ ntu na bɔɔgbá. Na ntukpa bonwu bɔ́kwii.

¹⁶Awɔ nédie usien ku ɔƒɛ. Na áya na ɔƒɛ ku kɔbuli benye bana kunyekɔ.

¹⁷Na ásia kalɔ kammɔ ƒui lɛmii. Na ábla ewulu ku kɔyɔ uwi.

¹⁸O Unwoti, kali nu kalɛ na bekisine badɔlɔdi bamɛni baama-a na baalɔ-ɔ lɛnyikpi.

¹⁹Tanyonu ƒula kadi bekyuli bani na ada aani abloduma ɔni na aláƒianku takya bekisine enu kemmo na bunwini adila bute-ma baduli aani beƒiebuo.

²⁰Tayiƒala bunyimi bɔni na ényimiku-bu. Ɔsika balalane bábɛ bákya kesi kesii ka bekpoku-bu.

²¹Taya na kɔƒa kukpo bekyuli bani na baanya taakya ku lɛbibo. Mmomu ya na bawabane bammɔ ku bani mɔɔyáki ala mmɔ bemwi-ɔ.

²²O Katɔti, ta na edie lɛlɔ kenye na bekyuli benu. Na tayiƒala kalɛ na badɔlɔdi bamɛni baamá-a uwi ndi uwi.

²³Nwini nu kalɛ na ƒula bekisine baakwanyi ku kɔnyi na bana kudu kɔda momoomo ƒui.