Read Lelemi Kɔgya 76 Bible Online

Kɔgya 76 - Lelemi bible

Kɔgya 76

¹Yudaƒuɔ bagyi Katɔti geen na bana kalɔ. Na Israelƒuɔ baasu kalɛ na Katɔti ubo ɔyikun.

²Ɔ́bla nwuna keliekɔ na Yerusalem na Sion Kɔbi lili.

³Mmɔ na ɔ́ƒɛ bekisine bammɔ atula ku abuala kɔlɛkɛ ku kuwii ku bana ekpola ƒui.

⁴O Katɔti, eekeye geen. Na ƒula ɔyikun ku bukeye butulo abi ani lɛlɔ na bebuo ku ala abuni áƒɔ mmɔ.

⁵Éƒie bekpone bayikune ekpola aƒɔ. Na bekpone bammɔ alati békpi ƒui ɔni na basɔ balakana lɛla lɛdi bɔbla.

⁶Katɔti ɔni na bula nana Yakob ɔ́kpa, uwi ɔni na ákwanyiku-ma ni, bekpone bammɔ ku bana bapɔnkɔ ku kɛɛkɛ ƒui bébuli na bágyini batɛ kpoo.

⁷Unwoti, ƒula lɛlɔ kani mbo liƒu na ɔdi ulakana-a anumi bunye si éti kɔnyi.

⁸Ébo ƒula litemi bɔtɛ kudu ásiku ƒula keliekɔ na katɔ. Na liƒu lɛ́da kalɔ lɛlɔ bekyuli na bébile kenye kpoo

⁹uwi ɔni na awɔ Katɔti áta anii aatɛ litemi na edie bani na ala eekpóku.

¹⁰Geen geen ni, kɔnyi kati kati kɔni na bekyuli bákɛ kɔdubunwini enugya ku bumwi ute-ɔ. Na si éti kɔnyi muedi ákya-ma ni, badubumwi-ɔ.

¹¹Bise Katɔti kenye, na bɛbla bɛsiaku lɛni kani. Na amii kadi bekyuli bani na amadɔ ƒui biti bina etela biboku Katɔti ɔni kani na ɔlɛka bayia ku ɔbu.

¹²Uuboku bagabi bani mɔɔkɔliku lɛlɔ katɔ kalɔ. Na ɔɔyá na baga benengudi ƒui baayia-nwu.