Read Lelemi Kɔgya 96 Bible Online

Kɔgya 96 - Lelemi bible

Kɔgya 96

¹Amii kadi ƒui bekyuli, bɛtu ɔnu ɔwɔdi bite Unwoti.

²Bidie ɔnu bimwi-nwu na bɛsu bekyuli limeyi ndi limeyi kalɛ na ɔ́ƒɔ-bu ngba.

³Bɛkɔ lɛsa bite bekyuli kalɛ na uukeye na kadi ƒui akɔ. Na bɛsu akɔla ala budie taatina ani na ɔ́bla na bekyuli ƒui akɔ.

⁴Ɔsika bula Unwoti úbomo na nwuna lɛnyi lɛ́kɔ katɔ, anwuɔsu na ɔlɛka bumwi-nwu na bɔyia-nwu butulo baƒiɔ ƒui.

⁵Ɔsika baƒiɔ bani mɔɔdi kadi bamba bekyuli ƒui lɛlɔ badi ala avɔdi ku anwidi sɔɔn ani naaadi ku lɛla. Nsu Unwoti nédie kayaa ala ƒui.

⁶Unwoti úbomo geen na nwuna bukeye bɔ́ka bɔ́mana-nwu. Na nwuna ɔyikun uudie lɛlɔ keyi kalɛ na ɔɔdia bɔnu na nwuna kakpakɔ

⁷Amii kadi ƒui bekyuli, bidie Unwoti kenyekɔ kani muukeye bɛtina ku kalɛ na ubo ɔyikun.

⁸Bimwi Unwoti lɛnyi lɛni muukeye! Na biti etela biboku-nwu na nwuna kakpakɔ.

⁹Amii kalɔ lɛlɔ bekyuli ƒui biboku eli kalɔ na bimwi Unwoti ɔni nébomo na use kedee. Na lɛlɔ litaatɔ-mii ku liƒu na nwuna anumi.

¹⁰Na bɛsu na kadi ƒui bekyuli akɔ bɛnini, “Unwoti Katɔti mɔɔdi lɛga.” Na kalɔ kemodi kammɔ kenye kana lɛgba lɛlɔ kpi na kalákunku kudii. Ɔdubɔtɛku bekyuli ƒui litemi na ulu siin lɛlɔ.

¹¹Na ebiti ataada awɔ, kalɔ ku kana ala ƒui. Na ɛpu ɔmmɔ uteedie lɛdi momoomo ku ala ani ƒui nkya-nwu kemmo.

¹²Na egyii ku livo ku mmo bɔmmɔ ƒui, bidie lɛnu ku lɛlɔyɔ bite yiiduu ku ala ani nkya aku ammɔ kemmo ƒui.

¹³Bidie lɛnu na bibo kudu na Unwoti ɔni ndubo anumi. Ɔsika ɔdubo ubatɛku kayawi bekyuli litemi na ulu siin lɛlɔ. Na ɔdubɔsia nwuna litemi geen lɛmmɔ lɛlɔ ɔtɛ litemi lɛmmɔ.