Read Lelemi Kɔgya 97 Bible Online

Kɔgya 97 - Lelemi bible

Kɔgya 97

¹Unwoti ɔɔdi lɛga! Amii kayawi bekyuli ƒui, lɛlɔ lɛyɔ-mii. Na amii bani nli ntuntɛ kɔlɔ ƒui, lɛlɔ lɛyɔ-mii.

²Ulɔyɔ litigbli suu lɛdi lɛ́ka lɛ́mana-nwu. Na nwuna lɛga kadikɔ kenye kete ka ɔbla ala siin, na ɔtɛ litemi ulu lɛlɔ.

³Ogya bonwu ɔdi ɔtɔ-nwu anumi na ɔɔkyula nwuna bekisine ƒui taamana-nwu.

⁴Na nwuna kɔnyi kɔ́ya na kayaa kaabwɛ ogya teewi kayawi, na liƒu bonwu líƒie bayawine.

⁵Na abi ammɔ aabwɛ na Unwoti anumi aani kalɛ na kɔma kɔɔnani. Na Unwoti ɔni mɔɔdi kayawi ƒui lɛlɔ anumi na ala ammɔ aalɛ́.

⁶Kayaa ku kana ala eebó kudu na kalɛ na Katɔti use siin lɛlɔ. Na bayawine ƒui baanu kalɛ na uukeye.

⁷Ɔ́ya na kɔƒa kuukpó bani ƒui mɔɔkun lɛmɛnɛ na baakpá baƒiɔ. Amii baƒiɔ bammɔ ƒui, bɛkya lili kalɔ bite Unwoti.

⁸Bekyuli bani nkya Sion ku Yuda lɛma ƒui bénu ka Unwoti ɔ́tɛ litemi ulu lɛlɔ na lɛlɔ lɛ́yɔ-ma.

⁹Unwoti Katɔti, awɔ mɔɔdi kayawi ƒui lɛlɔ na ƒula lɛnyi lɛ́kɔ katɔ litulo baƒiɔ ƒui.

¹⁰Unwoti ɔɔyɔ́ bekyuli bani nkisi likpidi. Na ɔɔgyumana bekyuli bani nsiaku-nwu kama siin. Na uudie-ma taalɛku balalane enu kemmo.

¹¹Bekyuli bani mɔɔdi Katɔti litemi lɛlɔ na baabla ala ulu siin lɛlɔ ni bana kasiakɔ keekeye na lɛlɔ lɛɛyɔ́-ma.

¹²Amii bani mɔɔbla ala ulu lɛlɔ ni, lɛlɔ lɛyɔ-mii na Unwoti ɔni nse kedee lɛlɔ na bɛgya-nwu enu.