Read Lelemi Agba 10 Bible Online

Agba 10 - Lelemi bible

Agba 10

¹Salomo agba bamba ndi amɛni. Lɛlɔ lɛdubɔyɔ bawɔne bani bebi mɔɔdá anu. Nsu ubi ɔdɔlɔdi bawɔne ni, badubuwulo ku kɔnyana.

²Lɛkɛ lɛni na ukyuli ɔ́sia ulu ukpidi ɔdi lɛlɔ ɔ́kɛ ni, liiibo kɔsia. Nsu si elie ngba na ulu ɔbuni lɛlɔ ni, adubɔkɛ ngba bɔƒɔ.

³Unwoti ɔɔɔdubo bɔya na kɔka kɔdu nwuna ukyuli ɔni mɔɔbla nwuna lɛƒɔyɔ. Na bekyuli bekpidi ama ni, Unwoti ulenu-ma ala ani na beevele-nwu.

⁴Bakɔsɔne beeebo bawabane bunwini. Mmomu bagyoklone mɔɔkɛ́ lɛkɛ.

⁵Okloƒu ɔni na ɔ́da anu ni, uunye kabla lɛlɔ kpakplaa ɔtumawi ƒui. Na okloƒu ɔni mɔɔtɛ taalɛɛ uwi ɔni na nka katuma kuƒi kɔ́lɛmi-nwu ni, kɔƒa na uuboku kaduli.

⁶Kusɛ kusɛ ɔɔsiaku bekyuli bani mɔɔbu Unwoti. Na bekyuli bekpidi baabɛla bana kasusu kekpidi kɔkwɛ.

⁷Bekyuli kasusu kaasia bekyuli babuni lɛlɔ, nsu balalane anyi muedi aayii kede kede.

⁸Ebiti aada banundane si baalɛ-ma. Nsu katɛ batɛne badɔlɔdi ni, beebuli teeti anumi teebi kalɔ.

⁹Na bekyuli bani mɔɔdi litemi lɛlɔ ulu lɛlɔ ni, balánya teegyiile. Nsu bani kasiakɔ nse gontii ni, badubo bugyiile bubuli.

¹⁰Bekyuli bani mɔɔnu likpidi taamana bekyuli lɛnumi ni, baakya lɛsɛ. Nsu si átanu ukyuli anumi na ádɔnku-nwu mmomu na likpidi lɛdi ɔsu ni, eeboku keyi buɛɛ.

¹¹Bekyuli babuni etemila aakpanku ukyuli teesienku ngba kemmo. Nsu bekyuli bekpidi beeti ala teebi bana kasusu kekpidi.

¹²Ukyuli bukisi bɔɔkya kadɔ ɔgya. Nsu bɔyɔ bɔsɔ bulánu likpidi na ukyuli lɛlɔ.

¹³Bekyuli bani muunú ala kalɔ ni, baatɛmi lɛnunda etemila. Nsu badɔlɔdi ama ni, kegyiimi na badubuti bani-ma kɔtu.

¹⁴Lɛlati lɛ́ƒɔ banundane kuye, nsu badɔlɔdi adɔlɔtɛ eeboku lɛlɔ bukpoku.

¹⁵Balakɛne baanu bana lɛlakɛ aani kɔbi bonwu kɔni na ukyuli ɔdi ulakana bɔƒuaala. Na bawabane kɔwaba ndi bana ɔgbankpi.

¹⁶Bekyuli babuni lɛyuƒɔla muubunku bana keliela. Nsu bekyuli bekpidi ama ni, likyulikpi ala bɔbla lɛlɔ beewiakun bana egulabi.

¹⁷Bekyuli bani mɔɔtuna na baalɛ-ma ni, baasia ngba ulu lɛlɔ. Nsu bani muuní ɔmɛni ni, baakpanku bekyuli bamba lɛnɔ taatáyila.

¹⁸Ukyuli ɔni muukisi ukyuli na ɔɔbɛla-mu ɔdi ɔkɔ ɔnyine. Na ukyuli ɔni mɔɔlɔ bekyuli anyikpi ɔdi ɔdɔlɔdi.

¹⁹Sɔ tatɛmi pii, ɔsika atɛ pii aadanku likpidi. Da anu na akɔsi atɛ bumomo!

²⁰Bekyuli babuni etemila ese aani sika ɔƒualadi ɔni bekyuli bánu ka ɔdia. Nsu ukyuli ukpidi kayi kemmo ni, kɔsia kɔdi kulalɛ.

²¹Bekyuli babuni baalɛ ukyuli ulu ɔbuni lɛlɔ. Nsu bekyuli bekpidi ama baayii udu na bana lɛla tati ɔsu.

²²Unwoti kusɛ kusɛ mɔɔyá na ukyuli uunwíni ɔlakɛne, na kɔnyana kɔdi kulásia ɔmmɔ lɛlɔ.

²³Badɔlɔdi ebiti ndi ka belie bataabla likpidi. Nsu banundane ebiti ndi ka bada udu buɛɛ na babla ala lɛnunda kemmo.

²⁴Ala ani na balalane baayia ka atalɛku-ma ni, anya geen ndubɔlɛku-ma. Na lɛni kani na bekyuli babuni ala ani lɛlɔ na bebo lɛnunsia adububo ete-ma.

²⁵Ɔgbankpi uubo bekyuli bekpidi lɛlɔ aani ɔƒɛƒɛɛ ɔni mɔɔkya ligede, na uuti-ma ƒui. Nsu bekyuli babuni kɔwodu kalɔ ɔka ɔni bákya uunye teetu uwi.

²⁶Bakɔsɔne baakya bekyuli bani kabla na baabla ɔlɛ. Na bese aani uyɔ ɔni muuduo ukyuli anumi iye ntɛ bɔnani bɔni mɔɔyá na kenye anyi aanyi.

²⁷Si aayia Unwoti ni, ngba buune-ɔ. Nsu balalane ngba bɔɔdá likuku.

²⁸Bekyuli babuni lɛnunsia liiboku ebiti, nsu ala ani na bekyuli bekpidi baasia anu eenwíni lɛƒua.

²⁹Unwoti ɔɔgyumana bekyuli bani nse siin, na ɔɔyila balalane udu.

³⁰Lɛla biala lɛɛɛdubo bekyuli babuni bukpoku. Nsu balalane ni, badubudie-ma bana kunyekɔ na kalɔ kamɛni lɛlɔ.

³¹Kasusu buni na ukyuli ɔbuni uute ukyuli. Nsu unyemi ɔnii mɔɔnyi ɔkɔ badubo-nwu bukulo budie.

³²Etemila ani mebunku ukyuli na ukyuli ɔbuni ɔɔtɛmi. Nsu etemila ani muusé lɛlɔ na balalane baatɛmi.