Read Lelemi Agba 11 Bible Online

Agba 11 - Lelemi bible

Agba 11

¹Unwoti ukisi uyedine mɔɔnya ukyuli akya. Nsu lɛlɔ lɛɛyɔ́-nwu si ɔɔkɔ́ku ala teete-ma.

²Si aatalaku lɛlɔ katɔ ni, kɔƒa bɔdi nsia. Nsu si eeboku lɛlɔ kalɔ ni, na aadá anu.

³Bekyuli babuni ni, bana litemi lɛni lɛlɔ baadi ulu lɛlɔ mɔɔtina-ma kasiakɔ. Na balalane ama ni, bana litemi lɛlɔ tadi mɔɔyila-ma udu.

⁴Ukyuli lɛkɛ lɛɛɛdubo-nwu bubunku Unwoti litemi bɔtɛ limeyi. Nsu ngba buni bulie muudie ukyuli na kukpi kemmo.

⁵Bekyuli babuni ni, bana litemi lɛlɔ bɔdi ulu lɛlɔ mɔɔtina-ma kasiakɔ. Na balalane ama ni, bana ekpidi unu mɔɔsia-ma lɛlɔ.

⁶Ngba buni bɔni na bekyuli babuni belie muudie-ma ɔgbankpi kemmo. Na lɛla lɛni lɛlɔ na balalane anumi eegyie ni, ani muunwíni kakpagyuɛ teedie-ma.

⁷Si balalane békpi ni, ama ku bana lɛnunsia ƒui lɛ́yii udu, ɔsika bana ɔyikun ɔni neeenye ligeen lɛlɔ kani na basia anu.

⁸Unwoti uudie bekyuli babuni na ɔgbankpi kemmo. Na balalane ama uunye taanu na beesié taatátua ɔgbankpi ɔmmɔ.

⁹Enyekpi aayila ukyuli ɔkpana udu. Na ala bɔnu bɔti na lɛnunda kemmo uudie bekyuli babuni.

¹⁰Si ala aatɛ teete ukyuli ɔbuni ni, ɔma ɔmmɔ bekyuli baakɛ́ lɛlɔyɔ. Lɛni kani si ukyuli ukpidi úkpi ni, kaƒɔ kaayɔ́-ma.

¹¹Bekyuli bani nse siin beete ɔma kusɛ kusɛ na ɔɔlɛ́ lili. Nsu balalane etemila eele bekyuli ntɛ na balakana bɔsala.

¹²Si eedie ukyuli kalɔ ni, kɔdɔlɔ kɔdi. Na ukyuli ɔni na ɔ́da anu ni, uubile nwuna kenye kpoo.

¹³Katɛ ɔtɛne keeke mɔɔví teebo abɛla kudu. Nsu ukyuli ɔni báƒɔ bádi ka ulátɛmi kalɛ kalɛ ni, baasu-nwu kɔbɛtɛ.

¹⁴Si kadi badi bekyuli beeebo ɔtɔnkune ɔnundane ni, ɔma ulábla ɔma. Nsu si bébo kasusu betine pii ni, ɔma ɔmmɔ uusié kaduɛ.

¹⁵Aawia ɔgbankpi teete lɛlɔ si éténye ɔƒɔ ɔdi kama na nwuna kayu ɔsu. Si ébulo ni, ɔdia utulo ka ebeteebo abi adi kama.

¹⁶Beleku bani mbo lɛƒɔndia baakɛ́ ɔbu teetulo banana bani mbo ulikplu na baakɛ́ egulabi.

¹⁷Si aabla lɛƒɔndia ni, awɔ ɔlati ƒula kɔyu mɔɔlɛ́ lili. Nsu si aabla kalala ni, aayila lɛlɔ udu.

¹⁸Bekyuli bekpidi ni, uwi klukui kani na bana lɛkɛ liilie. Nsu bekyuli babuni akɛla ni, eetu uwi.

¹⁹Bekyuli babuni baakɛ́ ngba. Na bekyuli bekpidi baasiáku kukpi.

²⁰Unwoti ukisi bekyuli bani na bana kayi kaaakɛ ulu unwi. Nsu bani mɔɔdi nwuna litemi lɛlɔ ulu lɛlɔ baayɔ́-nwu kaƒɔ.

²¹Ɔbla-a nwaa ka Unwoti ɔdubɔni bekyuli bekpidi kɔtu. Nsu bekyuli babuni bebi ni, badubɔlɛ sɛɛn ɔni na lɛla lɛdi lilabla-ma.

²²Uleku ɔni mɔɔdia bɔnu na ɔɔɔgyi lɛbuni ku likpidi kavumana ni, nwuna ablala ese aani sika kakwɛnimi kani nda ɔplakuo enwu kemmo.

²³Bekyuli babuni mɔɔsia anu ka badubɔkɛ ebiti. Na bekyuli bekpidi ama ni, kɔtu bɔni kani na badubɔnu ulu bete.

²⁴Bekyuli badi bakya na beete bekyuli ala ku kaƒɔ, nsu bana lɛkɛ limomo teebu. Nsu babambadi lɛnɔ baabla lɛnumi, nsu baayila lɛla biala na bebo.

²⁵Bekyuli bani muute bekyuli ala ƒaa ni, ala aadianku-ma na eedú-ma ɔkwɛ. Lɛni kani na bekyuli bani muubunku bekyuli kalɛ na belie ku kayi ƒaa ni, ama alati lɛnɔ badubulie ku kayi ƒaa.

²⁶Beyedine bani mɔɔbɛla ala teese na basɔku beye kuye kpakplaa ni, bekyuli beewida-ma. Na bani muuyé ala teete-ma uwi ɔni na baayaki ala ammɔ ni, bekyuli beete-ma kusɛ kusɛ.

²⁷Si aawia lɛbuni teete bekyuli ni, bekyuli badubɔnu-ɔ kɔnyana. Nsu si aawia-ma likpidi ni, ɔgbankpi ndubo-ɔ bɔsiaku.

²⁸Si éti anu ásia ƒula egulabi lɛlɔ ni, adubo bɔyii udu! Nsu bekyuli babuni badubɔlɛ lili aani ketudi evete wɔwɔɔwɔ.

²⁹Bekyuli bani mɔɔkya lɛsɛ na beeti kayu teeboku kaduli ni, lɛƒua na beesé-ma kama. Na badɔlɔdi ni, ama muunwíni banundane kabla bablane.

³⁰Bekyuli babuni bese aani egyii ani mɔɔnwu ebi buni ani baadi teelie ngba. Na bani muudie bekyuli na ɔgbankpi kemmo ni, báda anu.

³¹Si ɔdubɔyu bekyuli babuni muedi ɔkplu na kalɔ kamɛni kemmo ni, bi malɛku ala ekpidi bablane ama?