Read Lelemi Agba 17 Bible Online

Agba 17 - Lelemi bible

Agba 17

¹Si ákɛ lɛla lɛni uwi utu-ni lɛlɔ ádi ku kayi ƒaa ni, ɔdia utulo si ésie kadikɔ bonwu ku ala lidu lidu na kadɔ kakya mmɔ.

²Kabla ɔblane ɔni na ɔ́da anu ni, ɔɔdi ɔtɔlati bebi bani mɔɔbla kɔƒa ala lɛlɔ, na anwu ku bebi bammɔ muule bana ɔti ala.

³Ogya kemmo baakya sika ugyiedi ku ɔƒualadi taanu-nwu bɔdia. Nsu Unwoti ni, ukyuli kayi na ɔɔkɔ́ku taanu-nwu bɔdia.

⁴Alaekpidi bablane ni, likyulikpi atɛ na beesé atu teenu. Na ɔkɔ banyine ni, beesé atu teenu atɛ ani muubile ala.

⁵Bekyuli bani muudumi bawabane taama ni, bana Unwoti ɔni nédie-ma na beedumi. Na bani mɔɔmá bekyuli na bana ɔgbankpi kemmo ni, Unwoti ɔdubo-ma kɔtu bɔni.

⁶Bawɔ bani na ukyuli ɔ́bi lɛlɔ ɔ́ƒɔ ni, ama ndi-nwu kagabwa kani muukeye. Na bebi bani mbo bawɔne babune ni, kɔƒa kulekpo-ma na bekyuli akɔ.

⁷Kɔtɛ bɔtɛmi pii ni, útamanku ɔdɔlɔdi. Na ukyuli ɔni mɔɔdi bekyuli lɛlɔ lɛnɔ ni, ɔkɔ bɔnyi bútamanku-nwu.

⁸Ala ani beete ukyuli na bɔbɛ kemmo ni, etulo kuvo ete bani mɔɔbla udu ɔmmɔ. Baasia ɔmmɔ lɛlɔ na ala aatɛ teete-ma.

⁹Si alásia ukyuli bamba alaekpidi anu ni, bɔyɔ buláyii udu. Na si aaká ukyuli bamba ekpidi taasu bekyuli ni, eegyingya bakpana babuni muedi ntɛ.

¹⁰Si ádɔnku ukyuli ɔni muunú ala kalɔ kunwi pɛ ni, uubunku-nwu teetulo si ébo ɔdɔlɔdi kugyiimi eti anyɔ.

¹¹Bekyuli bekpidi baawia bata benye lɛlɔ badine lɛlɔ, nsu badubo-ma kɔtu bɔni geen.

¹²Si awɔ ku ebuo ukpidi ɔni na lɛla lɛdi líƒie-nwu bebi bɛ́sa ni, ebo bɔƒɔ utulo ka enwini ɔdɔlɔdi kasusu na nwuna kɔdɔlɔ ulu lɛlɔ.

¹³Si éti likpidi áƒɔ lɛbuni lɛni na ukyuli ɔdi ɔ́bla-a kayu ni, ɔgbankpi ulása-a kaduli kudii.

¹⁴Si ése kadɔ kalɔ ni, use aani kalɛ na baalɛmi kuƒi teete ketu kani báda-ka kavinkɔ ulu na kéyi.

¹⁵Unwoti ulayɔ bekyuli bani mɔɔyá na baanyonu bekyuli bani litemi neeebo ubo na baadú bekyuli babuni kɔtɔ.

¹⁶Si ɔdɔlɔdi ulásia lɛnunda ulu ni, ɔɔɔdi kasusu buni ka ebile egulabi anii ɔtɛya lɛla lɛdi.

¹⁷Ɔkpana buni ɔɔdi nwuna litemi lɛlɔ uwi ndi uwi. Na ukyuli ɔnwani ni, bɔwɔ na báwɔ-nwu ka ute kebunku uwi ɔni na ɔnwani ɔɔwia lɛla lɛdi.

¹⁸Si átákya kɔnu ɔku kemmo éte ƒula ɔkpana anii eenye-nwu kayu kenye ni, kasusu kammɔ kétedu-ɔ.

¹⁹Ukyuli biala mɔɔyɔ́ kadɔ ni, ɔɔyɔ́ likpidi. Na ukyuli biala mɔɔtɛmi taakun lɛmɛnɛ ni, ɔgbankpi na ɔɔwia.

²⁰Kayi kani naaasia ulu unwi lɛlɔ ni, ala alátɛku-nwu. Na unyemi ɔni mɔɔtu ala teenwini ni, ukyuli ɔmmɔ ɔɔbla gyoli gyoli teetéduo lɛbibo kemmo.

²¹Si áwɔ ɔdɔlɔdi ni, ɔdi lɛla lɛni muukpóku ukyuli. Na lɛlɔ lilayɔ ubi ɔti ɔni ubi mɔɔta teenye bekyuli lɛlɔ.

²²Ebiti bɔkɛ na kayi kemmo ɔdi kuvo ute ukyuli ɔmmɔ. Nsu kɔyu kɔni nsɔ neeebo lɛnunsia ɔɔyá na ɔyikun ɔɔsá ukyuli ɔmmɔ.

²³Bekyuli bekpidi baabɛ́ taaƒɔ ala bekyuli kudɔ kalɛ na batu litemi benwini.

²⁴Bekyuli bani mɔɔbla kasusu buni ni, bana anu aasia lɛnunda lɛlɔ uwi ndi uwi. Nsu badɔlɔdi ni, bana kasusu kelélie liku linwi, mmomu kakɛ ala ƒui lɛlɔ ɔɔwia lɛla lɛni na ɔɔɔdubo bɔkɛ.

²⁵Ubi ɔdɔlɔdi ni, ɔɔyá na ɔti uunú ɔlɛ na kayi kemmo. Na ngba bɔɔyu uni ɔdu.

²⁶Ɔɔɔdia munu munu ka ebo ukyuli ɔbuni kayu ka ɔsiaku lɛbuni ɔsu, iye ani ɔyikune kɔtu ka ɔ́di nwuna litemi lɛlɔ geen ɔsu!

²⁷Ukyuli ɔni náda anu geen ni, ɔɔkɔ́si bɔtɛmi. Na ukyuli ɔni mbo lɛlati na uunú ala kalɔ ni, nwuna kɔnyi kuse buɛɛ.

²⁸Badɔlɔdi muedi baatina-ma kalɛ na bada anu si bába lɛsɛ. Na si báda bana inye ni, baatina aani si bebo kasusu.