Read Lelemi Agba 19 Bible Online

Agba 19 - Lelemi bible

Agba 19

¹Ɔdia si adi ɔwabane na aadi litemi geen lɛlɔ utulo si adi ɔdɔlɔdi na aanyi ɔkɔ.

²Si anumi égyie-ɔ kabla lɛlɔ na eeebo lɛlati ni, ɔɔɔdia. Na si eesié pla pla taagya ni, adubɔkana na ayii ulu.

³Bekyuli beebile bana ngba na bana kɔdɔlɔ ɔsu, na beeti kɔnyi taakya Unwoti.

⁴Lɛlakɛ liiboku bakpana pii, nsu kɔwaba kɔɔgyá-ma.

⁵Ukyuli ɔni mɔɔnyi ɔkɔ teedie etemila kenye ni, ulékeli kɔtu bɔni. Na ɔkɔ ɔnyine ɔdi ulakana na wekeli.

⁶Bekyuli pii beevele ɔga ubi ka ɔbla-ma lɛƒɔndia lɛdi. Lɛni kani na ukyuli biala uudie ukyuli ɔni muute bekyuli ala kɔkpana.

⁷Si ɔwabane lɛlɔ bekyuli beení-nwu ni, bi ɔsu na nwuna bakpana beléni-nwu? Ɔwabane ɔmmɔ ɔdubo bɔkpali-ma, nsu bana ƒui badubukeli-nwu.

⁸Si ákɛ lɛnunda ni, ɔɔtina ka aayɔ́ lɛlɔ. Na bekyuli bani muunye kpakplaa ka bakɛ lɛlati na beteenu ala kalɔ ni, enu ku akɔkɔ adubuyi-ma.

⁹Ukyuli ɔni mɔɔnyi ɔkɔ teedie etemila kenye ni, ulékeli kɔtu bɔni. Na ɔkɔ ɔnyine ni, badubo-nwu bɔyila ku udu.

¹⁰Utalɛ ka ɔdɔlɔdi ulie kesii kani muukeye na utaadi ngba iye kabla ɔblane ɔdi utaadi baga bebi lɛlɔ.

¹¹Bekyuli bani mbo kasusu buni baabala bana kɔnyi. Na bekyuli badubo-ma bɔbu na baƒɔ lɛnyi si bédie bekyuli ekpidi atu.

¹²Si ɔga úti kɔnyi ni, use aani kalɛ na gyata uubó lɛdi. Nsu nwuna lɛƒɔndia lise aani amii na livo lɛlɔ.

¹³Ubi ɔdɔlɔdi ɔdi ɔgbankpi ute ɔti. Na uleku ɔni mɔɔkya unyeƒi use aani ɔtɔ ɔni muudú.

¹⁴Lɛlakɛ ku kaduli kani na bawɔne badubɔkana na bese bana bebi kama. Nsu uleku ɔbuni ɔni muunú ala kalɔ bɔkɛ buti ni, Unwoti kudɔ na ɔɔsí.

¹⁵Ɔkɔsɔne mɔɔtɛ teesie ɔgyu, na anwu lɛnɔ kɔka kɔɔda.

¹⁶Si ádi Unwoti ɔda bubo lɛlɔ ni, adubɔkɛ ngba. Nsu si éni-mu ni, adubo bukpi.

¹⁷Si ébunku bawabane ni, Unwoti na eevó ala teete, na ɔdubɔƒɔ kayu kammɔ ɔsɔku ute-ɔ.

¹⁸Tumini ƒula bebi kpakplaa na uwi ɔni amu ebo-ma lɛlɔ ɔyikun. Si ɔɔɔdi lɛni ni, adubo-ma ngba bubile.

¹⁹Bekyuli bani muuti kɔnyi pla pla ni, badubɔƒɔ ama alati lɛtuni kayu. Si áƒɔ-ma kunwi ni, agyi anii asɔ adubo-ma bɔƒɔ kunyɔdi.

²⁰Bɔlɛ ku ala ani ƒui na badubɔtina-a ni, ƒɔ-mu kalɛ na adubɔkana, na adubɔda anu ƒula ngba emeyi akladi ƒui.

²¹Adubɔkana na eti kasusu kɔkwɛ pii, nsu Unwoti lɛƒɔyɔ kani ndubo bunye.

²²Ukyuli lɛlɔ lɛɛda kubiti si aadi ƒula linyese lɛlɔ. Si adi ɔwabane ni, ɔdia utulo ka ataatuala na ataasu inye inyɔ inyɔ.

²³Si aayia Unwoti ni, ɔɔyá na eelie ngba na ɔɔgyumana-a kalɛ na ɔgbankpi ulálɛku-ɔ.

²⁴Kɔkɔsɔ kɔɔdi ɔkɔsɔne lɛlɔ geen ɔni na kalɛ na ɔmini adila ɔkya kenye muedi ɔɔda-nwu kɔkɔsɔ.

²⁵Ukyuli ɔni muudumi bekyuli taakya-ma lɛlɔ lɛma, si áni-nwu kɔtu ni, bekyuli bani na bana kasusu kásɔ badubɔtɛya lɛla lɛdi. Na si ádɔnku ɔnundane ni, ɔdubo anu bɔda bubu.

²⁶Bebi bani mɔɔbla bana bati ulikplu iye benwini benye bana beni lɛlɔ ni, kɔƒa kɔdi-ma kadi anumi na bénwini lɛla lɛni mɔɔdu bekyuli lili.

²⁷Ubi, si éni anii ukyuli utatina-a lɛla ni, énwini kama ákya lɛlati.

²⁸Ukyuli ɔni mɔɔnyi ɔkɔ teedie litemi kenye ni, uudumi na ɔɔmá litemi bɔtɛ ulu ɔni ntɛ nse. Na balalane baaƒɔ́ likpidi teebweli aani adila.

²⁹Bekyuli bani muudumi bekyuli taama ni, Unwoti ɔdubo-ma kɔtu bɔni. Na badɔlɔdi kama kadubo kugyiimi butaaƒɔ.