Read Lelemi Agba 2 Bible Online

Agba 2 - Lelemi bible

Agba 2

¹Mina ubi, si áƒɔ mina etemila, na áklibi mina ɔda bubo ése éte lɛlɔ,

²na ƒula kɔtu kɔsia lɛnunda etemila lɛlɔ na áya na ƒula kayi kasia ala kalɔ bunu lɛlɔ

³na eevele ala kemmo bɔnu taati na eevele ala kalɔ bunu kpakplaa

⁴na aawia-nya aani kalɛ baawia sika ɔƒualadi na asia-nya kama aani akɛla abɛladi ni,

⁵na ɔdubɔya na enu kalɛ na baayia Unwoti kalɔ na ati-nwu lɛnɔ.

⁶Ɔsika Unwoti muute lɛnunda! Na nwuna etemila aayá na ukyuli ɔɔtí lɛla na ɔɔdá anu.

⁷Bekyuli bani nse siin ni, uusé-ma kama ka badi lɛlɔ. Na ɔdi lɛgyumanala ute bekyuli bani na lɛla lɛdi lɛɛɛda-ma na bana kasiakɔ.

⁸Na bekyuli bani mɔɔdi nwuna litemi lɛlɔ siin ni, ɔɔgyumana-ma na bana kasiakɔ. Na ɔɔda bani nsiaku-nwu kama siin taasiaku bana kɔvinkɔ.

⁹Na adubunu lɛla lɛni ndia na lɛdi ulu lɛlɔ siin kalɔ na ulu buni biala lɛlɔ.

¹⁰Ɔsika lɛnunda lɛdubuduo-ɔ kayi kemmo na lɛlati lɛƒɔ-ɔ kɔyu kemmo ku ebiti.

¹¹Na ala anu bɔsia taabla-nya ulu lɛlɔ ɔdubɔgyumana-a na ala kalɔ bunu bɔda-a kɔkɔɔkɔ.

¹²Lɛnunda lɛmmɔ lɛdubɔƒɔ-ɔ lɛsiku bekyuli bekpidi kasiakɔ, na alásala lɛlɔ ku bani mɔɔtɛmi enyekpi.

¹³Bekyuli bamɛni udu baada ulu geen ɔmmɔ taava na beeti ulu ukpidi ɔni néti-ma úselaku kasuudikɔ.

¹⁴Na ebiti aada-ma ka bataabla likpidi na lɛlɔ lɛɛyɔ́-ma na bana likyulikpi ala bɔbla lɛlɔ.

¹⁵Bana ala bɔbla ƒui buse gontii na bana ablala adi likyulikpi sɔɔn.

¹⁶Lɛnunda lɛdubɔda-a lidie uleku ɔsɔnɔdine unyemi kudɔ, uleku ɔmmɔ ɔdi ɔgya uliene ɔni mɔɔlɛ́ ɔgyani kama katɔlɔ.

¹⁷Ɔ́lɛ nwuna ligblebi uwi kɔgya kɔni na úlie na údie lɛla lɛni na únyimiku-nwu na Unwoti anumi atu.

¹⁸Nwuna ɔtɔ kemmo buduo ɔdi ulu ɔni néti úsela kekpine, na nwuna kavinkɔ ƒui kadi bekpine kakyakɔ ulu.

¹⁹Ɔdi uleduo-nwu kudɔ taasɔ teenwini iye ɔsɔ ɔnu ngba ulu geen ɔmmɔ ɔsia.

²⁰Sia bekyuli babuni kasiakɔ mmomu, na asia bekyuli bani nse siin kavinkɔ.

²¹Ɔsika bekyuli bani kayi kemmo ablala nse siin kani ndubulie ngba na kalɔ kammɔ lɛlɔ. Na bani na lɛla lɛdi lɛɛɛda-ma kani ndubɔkya-ka kemmo.

²²Nsu belikplune ama ni, Unwoti ɔdubɔda-ma udie kalɔ kammɔ lɛlɔ. Na bani mɔɔlɛ́-nwu kama ni, na ɔkpɛ-ma ɔlɛku-ka kemmo.